Accueil
Envoyer à un ami
Version imprimable
Partager

Hè rilanciata a squadra naziunale corsa di ballò !

L'aviamu sunniata... hè di ritornu ! À l'iniziativa di u giurnale Corse Sport, u prugettu d'una squadra naziunale di ballò hè rilanciatu.



Hè rilanciata a squadra naziunale corsa di ballò !
L'ultima volta ch'ellu s'era vista una selezzione corsa, era 10 anni fà. In u 1998 u Camerun prepara a cuppa di mondu di ballò è scontra una squadra di ghjucadori corsi (0 à 0 in Furiani). Di poi più nunda...

Ma l'idea face u so caminu in e mente di a ghjente. Didier Rey avia sugeritu a creazione d'una squadra naziunale ricunnisciuta da a FIFA. Ma l'affare ùn hè pussutu sbuccià tantu ci sò ostàculi (u più impurtante si chjama FFF...)

Pianu pianu, sta brama s'hè fatta di più in più forte. D'aprile 2007 i sustenidori bastiacci è aiaccini prisenti à u derby in Furiani pè SCB - ACA anu surtitu striscioni dumandendu una squadra naziunale corsa. Da signalà dinù un gruppu nant'à Facebook cun più di 1000 membri...

Sì a dumanda c'era, mancava a vuluntà. Finalmente, hè à l'iniziativa di u giurnale Corse Sport chì l'affare hè pussutu fassi. Si a ricunniscenza di a FIFA hè troppu difficiule à ottene, l'idea ritenuta hè quella di u mudellu di e selezzione basche è catalane : una partita amichèvule una o duie volte à l'annu.

Hè l'associu Corsica Football Association, purtatu da Lucien Felli, Dédé Di Scala è Patrice Paquier chì si n'hà da incaricà. Parechji ghjucadori anu datu u so accordu (François Modesto, Ludovic Giuly, Yannick Cahuzac, Grégory Lorenzi...)

Ne saperemu di più in e settimane à vene.

Alè, aspettendu u match ritornu, ùn vi scurdate chì à l'andata, a Corsica hà battutu a Francia 2 à 0 in Marseglia, in u 1967...

Hè rilanciata a squadra naziunale corsa di ballò !

A selezzione chì ghjucò contr'à a Juventus in Mezavia in u 1992 :
Hè rilanciata a squadra naziunale corsa di ballò !

u 17 di Marzu 2009
U Sgaiuffu



1.mandatu da antò drobnjack u 17/03/2009 00:48
EVVIVA A SQUADRA NAZIUNALE CORSA !!!

Penneteau - Squillacci, Modesto, Lorenzi, Martinetti - Cahuzac, Ghisolfi, Flamini, Berenguer - Giuly, Mandrichi...

feremu megliu ch'è San Marino, Andorra, u Liechtenstein o Malta, nò ???

2.mandatu da crapulax u 17/03/2009 00:52
è à Pierre-Yves André, li demu a naziunalità corsa nò ?

u situ per seguità l'evenimentu hè quissu :

3.mandatu da Ismael Triki u 17/03/2009 08:55
Cahuzac è ghisolfi un sò micca corsi ! Cahuzac hè natu in Corsica ma ancu Ben Saada allora... ah scusate Ben Saada hè un arabu è un arabu un può micca esse nant'a squadra naziunale corsa ma un francese sì ! Ghisolfi un ha nimu parenti corsi è un hè micca natu in Corsica.

4.mandatu da KDice u 17/03/2009 09:04
@3 : Bravu !! T'aspettanu in Sant'Ornellu... Cahuzac hè natu quì, si sente Corsu, ha di più l'anima Corsa chè l'Aiaccini, mà un hè micca Corsu ?

5.mandatu da Balaninu u 17/03/2009 11:37
è a mamma di Cahuzac hè corsa !

Chì li manca ...? Ùn sò micca salami, sò umani, nant'à a pelle ùn ci hè micca scrittu : "centu per centu corsu". S'elli si sentenu corsu, ùn avemu nunda da dì, sò corsi puntu è basta.

O sinnò sariamu belli pochi.

6.mandatu da Antò u 17/03/2009 12:48
In CORSPORT dice che Mathieu Flamini u mezzu Corsu/Marsigliese che ghjoca in Milan, si dice : "Cela dépend de ma situation avec l'EDF.", qualessu mi stumaca ! (Et c'est mn idole!).

Corsica - Camerun ghje terminatu su 1-0 per i verdi no ?
Speru che la CFA (ghje micca u campiunatu francese !) chjamata JF Grimaldi.

7.mandatu da Antò u 17/03/2009 12:50
2. Posté par crapulax le 17/03/2009 00:52
è à Pierre-Yves André, li demu a naziunalità corsa nò ?

u situ per seguità l'evenimentu hè quissu :
http://evenementiel.corse-sport.com


PY André a ghjocata una volta cun a "Bretagne" mi sembra ?

8.mandatu da altore u 17/03/2009 17:36
ùn sò micca sè un tale o un tale hè corsu o pinzutu ma pè certi ch'o vecu scrive quì ùn mi pongu mancu più a quistione... oimè disgraziata Corsica! un mischju di frencese è di talianu ùn hà mai fattu a lingua corsa! è per ciò chì tocca à a selezzione quellu chì si sente corsu hè corsu è basta... s'ellu parla ghjè ancu megliu ma ùn ci vole micca à sunnià... un'ecchippa (è micca una squadra! avete digià dettu una squadra di comptoir?) corsa a ci vole. è in Corti !

9.mandatu da schemu bastiaccia u 17/03/2009 21:21
cahuzac he micca pinzuttu mezzu corsu e che qu ellu que ghjocca pa a testa mora e micca pa i soldi a prestu

10.mandatu da altore u 17/03/2009 21:23
oimè ! oimè!

11.mandatu da viculese u 17/03/2009 21:26
@ altagna : di siguru ch'ellu si dice "squadra", cf "a squadra d'arozza"...

12.mandatu da altore u 17/03/2009 21:29
ai po esse a regiò... eiu aghju sepre intesu un'ecchippa ma ùn sò micca di vicu... eppò ghjera pè ride ma certe bombe oooo! ùn ne simu più nè à echippa nè a squadra custì!!!

13.mandatu da Kugùrn u 18/03/2009 09:41
muderatori

14.mandatu da circinelludiguagnenativupeliguagnesusosanguaversatu u 18/03/2009 12:49
"oimè ! oimè ! oimè !" Ma quali sarà 'ssa fiminedda chì briona cusì ? ùn capiscu mancu una parodda di ciò ch'edda dici... "ai po esse a regiò" (?) !!! Chì lingua sarà ? Accidenti à i femini ! ùn sò mai cuntenti, sempri sò à lagnassi è à minaccià ! è più mughjani, menu si capiscia ciò ch'eddi dicini...

15.mandatu da altore u 18/03/2009 14:20
"ai po esse a regiò" serebbe "t'a podassi a raghjò" ma a sfarenza trà mè è tè ghjè chì eiu capiscu ciò chè tù dici chì sò corsu ... a lingua corsa hà parechje manere d'esse parlata è scritta ma i corsi a sanu ricunosce... avà ci sò e manere di parlà (ùn parlu mancu di scrive chì ghjè menu grave) ch'ùn sò micca corse (ùn parlu micca per tè custì)... é mi rompenu l'arechje quandu e sentu... ghjè u mo dirittu à dilla o nò..? è altore hè maschile (sè tù sai ciò ch'ella vole dì...) dunque ùn sò micca una feminetta..

16.mandatu da Armand sene u 18/03/2009 16:26 (da un teleffuninu)
Un he qui u dibatitu, quiddi chi un so boni a scriva o quiddi chi so corsi ,micca corsi etc... primu di rifa una selezzioni corsa, ci voli a da a sti corsi a so scianza vali a di una piazza nantu a u terrenu. Vogliu di chi dipoi l epupea bastiaccia corsi ind e u sporting,gfca o aca un si so guasgi piu visti. Sarani "toccards" i ghjucadori corsi sicondu a i presidenti e l intrenadori? Beneforti, Zambernardi,Ettori e tant altri ...a veda i risultati di vint anni passati feti u bilanciu: d2 o ancu cfa par certi, e purtantu un c erani chi "gran ghjucadori" pinzuti o stranieri .un si po fa altrimenti chi com eddu dici Antonetti( u gran naziunalistu) , in Corsica a populazioni ghje troppa mino e un si po truva tanti talenti; quissa he pivana. Alora sporting,aca,gfcoa laceti a piazza a i Corsi !!!

17.mandatu da circinelludiguagnenativupeliguagnesusosanguaversatu u 19/03/2009 08:47
altore, altore, altore... fiminedda scrianzata d'u me cori... Ti magagnavu par fatti capiscia chì, in quantu à me, lezziò di lingua ùn n'avemi bisognu quì à nantu à a Piazzetta. Sopr'à tuttu nantu à fili ch'ùn parlani di a lingua...
facciu quantunqua rimarcà chì a Piazzetta ferma u SOLU blog chì si scriva in una lingua "urali" senza troppu sbagli, chì tutti l'altri (in francesu vogliu dì) sò carchi à SMSerii (je tM, à +, ki è tu ?, altor)
s'è a lingua hè menu parlata in carughju sarà forsa chì prufissò ci n'hè statu troppu ind'i generazioni passati, è chì certi, a maior parti sò bluccati.
Avà chì u corsu si sparghja nantu à a reta mundiali, pensu chì i locutori boni cum'è te avarìani da aiutacci micca da bluccacci
à prestu
uskeubeu

18.mandatu da Zorba u grecu u 19/03/2009 17:33
sia cum'ella sia, FFF = Federazione Francese Fora !

19.mandatu da altore u 19/03/2009 21:03
o circinè... ai po esse a regiò... ma quandu facciu un sbagliu di corsu o puru di frencese è chì calchissia mi ripiglia ùn la pigliu micca male, provu à arrigistralla ... ghjè cusì d'appressu à mè ch'ella s'ampara una lingua. avale simu intesi, prufessori spiegatuttu ci n'hè statu troppu... sopr'à tuttu quelli ch'ùn parlavanu tantu corsu in cherrughju è chì impiegavanu parolle cumplicate è scunisciute à l'unversità... anu arruinatu a lingua "naturale"! è a piazzetta ùn casca micca ind'è sta trappula ghjè per ciò ch'o a leghju... alé "sans rancune" dice u pinzutu...

20.mandatu da circinelludiguagnenativupeliguagnesusosanguaversatu u 20/03/2009 07:24
a dice cusì u pinzutu, ma ùn la pensa micca... :)
pà vultà à u sugettu d'u principiu, pensu chì pà una volta hè una bona idea chì hè stata lintata quì: custruimu pian pianinu. U prima passu hè d'aduniscia a squatra echippa è cum'è si dici "a soma s'acconcia viaghjendu".

21.mandatu da ghisonesi u 20/03/2009 20:57
Una pruposta di selezzione naziunale:

Penneteau-Lorenzi-Schillacci-Modesto-Martinetti-Flamini-Cahuzac-Berenguer-Cavalli-Giuly-Mandrichi.

Dopu ùn la sò, ma per una squadra tippa diciaraghju mi pare esse una bella squadra.
È ùn aghju micca pensu à tutti di sicuru, chì ne pensate?

Luzi, Gaffory, Pierazzi...

Fate e vostre pruposte è suniemu inseme...

22.mandatu da ghisonesi u 20/03/2009 21:00
D'una bella vittoria contru à a Francia!!!

23.mandatu da ghjan lucca vialli u 21/03/2009 23:55 (da un teleffuninu)
Schillacci? sara corsu com e u so ziu Toto

24.mandatu da ziu santu u 31/03/2009 16:19
ùn pensu micca chì ci vulerebbe ghjucà subitu contr' à a francia.
Prima ci vole à fà ci qualchì amichevuli pè fà ci piacè è in fine ghjucà contra à francia è sciappà tuttu. Postu ch'è Ludo Giuly ùn hè micca chjamatu in squadra di francia ( tantu megliu ) mustrerà ciò ch'ellu sà fà.

E fate un sforzu pè amparà a vostra lingua :
terminatu = hè compiu
speru = spergu (1ma pers irr )
echippa = squadra
u primu hè un francisume, u segundu esiste in talianu certu ma hè a vera parulla
schemu = scemu
comptoir un esiste micca in corsu si dice cuntornu o bancu dipende s'ellu hè di caffè o di stabilimentu ( scagnu, banca )


Novu cumentu :


Seguitateci nant'à Facebook


L'articuli

Abbunatevi à a newsletter

Circà nant'à A Piazzetta