Accueil
Envoyer à un ami
Version imprimable
Partager

'I 4x4 basta !'...

U mere di Londra, Ken Livingstone, si ne caccia incù i cunduttori di 4x4. Li tocca oramai à pagà 25 £ o 33 € à ghjornu per pudè girandulà in a capitale di l'Inghilterra. Pensate appena s'è u futuru mere di Bastia o d'Aiacciu pigliava listessa decisione. O l'azzuffu!



Falerianu in carrughju tutti l'associ di difesa di u 4x4 corsu. Certi puderianu ancu fà un appiccicatoghju "Sò corsu, aghju u 4x4!". "Per a difesa di u 4x4 in Corsica". "Una terra, un populu, un 4x4!"...

D'altri, chjamerianu à a Liga di i diritti di l'omu per difende u dirittu individuale à cunduce un 4x4. U sinteriate voi à Andria Paccou, pigliendu a pratesa di sti cunduttori vittimi di discriminazione. Dopu a ricerca di l'ADN di i naziunalisti, si circherebbe à cunosce a lastra d'immatriculazione di i 4x4 di i Corsi. Annantu, ci hè a fanga di e nostre machje! Sò pruvucazione què!

Infine, cumu feriamu à girandulà per isse stradacce s'è ùn aviamu micca i 4x4? Ancu e nostre strade sò particulare, specifiche, identitarie. L'hà detta ancu Andruet, u vincitore di a Giraglia storica. "Avete certe strade. Ùn si ne vede più cum'è quesse. Hè un piacè !". O buffalò! Pare tuttu Mérimé quessu. "Les Corses ont des routes pittoresques". Ancu di grazia, di nustrale, ùn averemu solu e strade...

u 4 di Marzu 2008
Sbanditu



1.mandatu da GWM u 05/03/2008 00:46
cum'è dicia Norman Schwarzkopf, à quellu chi li dumandava cio chi ci era di megliu ind'a vita, "ùn'ci serà più bella cosa chi di marchjà in'furia cunducendu u so carru armatu, sottu à u sole"...I pruprietari di 4X4 forse a si scialeranu cusi...

2.mandatu da renusinca u 05/03/2008 14:48
iè u "quat'quatre" hè un pruduttu identitariu forte, seria cume pagà un impositu nantu à i canistrelli

3.mandatu da Cumpalliols u 05/03/2008 16:16
Per mè (è puru sò è Corsu, è indipendentistu), pinsu chì u quatru quatru ghjè un'vitturone chì cumuleghja parechj'incuvenienti : u primu hè chì per assai ghjenti, hè sol'una vittura per montassi a sega (s'è no guardimu tutt'i cunduttori di quatru quatru, ùn ci n'hè chè pocu chì u piglianu solu per andà à a macchja), dopu, incù vitturoni cusì grandi, ghjè un'castigu par garrassi in cità (è ancu in paese), è per elli, è per quelli chì anu vitture nurmale, chì venenu dopu, è ch'ùn trovanu micca piazze per via chì ci sò 7 4*4 chì piglianu dece piazze di vitture (per esempiu). Infine, diceraghju chì sta vittura cunsumma assai essenza (o piuttostu gasoil, (ùn sò micca cum'ellu si dice in corsu)), è dunque face assai puluzione.
À mè ùn mi dispiaceria micca tantu s'elli spariscianu i quatri quatri. Eiu, aghju un'Opel corsa, a sol'è unica vittura 100 % identitaria corsa.

Novu cumentu :