Accueil
Envoyer à un ami
Version imprimable
Partager

I Beatles in Corsica...

"We all live in a yellow submarine" cantavanu i Beatles in u 1968... Tandu, mì : nò sussai, micca penseri, tizzoni longhi cum'è u caminu di ferru, camisgi fiurati è tralalà... Ma hè scorsu u tempu è a passata di u sottumarinu giallu face ride ! Eppuru, a zampa di i Beatles, a risentimu sempre avà, in u cantu nustrale. Ùn mi cridite?



I Beatles è a cultura culturale corsa...

Pare cusì ma trà i Beatles, è a Corsica, hè una longa storia...

Da signalà chì i primi stamponi, sò stati elli, i Beatles. "Lady Madonna", si pò dì ch'ella hè figliola di u nostru "Diu vi salvi Regina", nò? Ci devenu dunque un qualcusella à a so fama.

Ma u fattu si stà chì dopu, sò stati elli i mudelli di i culturali nustrali di u Riacquistu... Tenite :

A canzona di Michel Mallory , "l'amore solu", in corsu è in francese incù a vuciaccia di Johnny ùn vi dice nunda? Sti dui cumpari, pare chì per scrive sta canzona, s'anu arrubbatu, à l'appiattu, e parolle di "All you need is love"... Ancu un pocu ci ripigliavanu a canzona "Michelle". Averiate intesu tandu Johnny à voce rivolta : "O Dumèèèèèèèèèè"...

Ma ùn sò i soli à avè stampatu e parolle di e canzone di i Beatles...

Hè longa a cumpagnia...

I Muvrini: ùn anu ripigliatu u titulu "Come together" in a canzona "Venite cù mè"? Anu stampatu! Eppò, "Wait", hà propiu listessu sensu chè "Aspettà mi"... S'è vo'guardate i ritratti, Ghjuvan'Francescu, pare tuttu John Lennon. Ùn anu listessa cuppa?

L'Arcusgi, mancu à dilla. A so canzona technò "Rivuluzione", hè una copia dissalivata di "Revolution"...

Felì Travaglini, di e volte, hà pocu laziu... Hà stampatu ancu ellu. A so canzona "O cari", vene da "Oh, Darling !".

Maì Pesce, incù e so canzone di l'anni sessanta... Ci hà burlatu à tutti... Una di e so canzone chì pare esse napulitana, tradiziunale, dimmula, sputica : "O sole mio", ghjè solu un remix di "King sun"... Torna ellu ma incù i Chjami Aghjalesi. I cridiamu appassiunati da l'America suttana... Sò fole è bugie. Sò l'americanate chì li piacenu... "L'Emiliana" è u "Che Guevara" di Diana di l'alba, ùn sò altru nunda chè "Sgt Peppers" à l'usu corsu!

Ma d'altri anu cupiatu nant'à i Beatles, nanzu à i Chjami Aghjalesi. A cunniscite a canzona "Doctor Robert"? I fratelli Vincenti, ùn anu cantatu "Duttore Simeoni" dopu l'affare d'Aleria??? Invece di mette u nome anu messu a casata chì Edmond, hè pocu è micca fascionu ma bon, anu stampatu !!! Ma ci hè dinù "Ritornu" d'Antone Ciosi. Ùn s'assumiglia micca à "Back In The U.S.S.R"? Soca, John Lennon ùn averà a so voce ma e parolle sò vicine assai ! Aiò !

Ancu i più grandi l'anu fatta. "Accross the universe", pare ch'ella fussi ella chì appia datu l'idea à Poletti di scrive "l'Alta strada"... Eppò, mì, avà palesu tuttu. Tenite : "Girl" è "She said she said" anu datu nun solu a canzona di Natale Luciani "Donna" ma dinù "A serva" di Voce Ventu... Ci si mettenu ancu i giovani...

D'altri cum'è Tavagna s'anu ripigliatu a canzona "Birthday", per travestisce la in "l'anniversariu di Minetta".

Ci aviate cridutu à u Riacquistu? Ah, i nostri cusì detti "culturali", ci anu tutti purtatu di fole in canzone...


u 1mu di Ghjugnu 2008
Sbanditu



1.mandatu da Cumpalliols u 01/06/2008 18:05

2.mandatu da GWM u 01/06/2008 22:40
iè, è per cumpone "Guerrieri", I Chjami anu ripigliatu à "The Trooper" d'Iron Maiden....

3.mandatu da 2B3 u 02/06/2008 21:11
Anu stampatu e canzone ma unepoche di donne, e s'averanu stampate tutti sti cantadori?

4.mandatu da Baretta misgia u 23/07/2008 19:49
A Mallory li piacìa subratuttu " the Boss" Springsteen.Saria quissu u prezzu a paga ?

5.mandatu da Attrachjata u 25/07/2008 16:47
ah ah bravu per l'articulu !

ié, 'po scrivendu "Sciringa", l'Albinu pinsava à "the needle and the damage done" di Neil Young !

6.mandatu da lustucru u 07/02/2009 22:44
allora a stu contu custi si po di chi :
nougayork = senti u niolu
so for di strada = on the road again
lamentu di u prigiuneru = les portes du penitencier!
stew ball = i mulatteri d'ulmetu???
opium= l'alta strada
hein???
aio
arristate appena!!!!!!!


7.mandatu da australopicorsu u 08/02/2009 01:07
U riacquistu :
- invenzione d'una pseudo cultura "che guevarescha" da qualchi bobo di l'epica...
- Musica sud'Americana abuminevule
- A nuzione (soprarealista) di "militante culturale"... Custi si, u periculu !

I "Beatles" in Corsica ?
Quandu sarremu pronti... (in lu 2094 ?)

Novu cumentu :