Accueil
Envoyer à un ami
Version imprimable
Partager

I Corsi soli contru à a Lica ?

Sè per u passatu sò state numarose e critiche di pettu à i capimachja di u ballò francese, a mossa anti Thiriez s’era per avale cunfinata à i sustenitori per via per u più di u muvimentu « ultrà ».
Sti gruppi dinunciavanu una manumessa suldaghja nantu à stu sportu sustinuta da u Prisidente di a Lica, è una vulintà franca di viutà u mondu di e tribbune di e so specificità per fanne solu un locu di spittaculu cum’è l’astri.
Pocu à pocu hè crisciutu di a sfera sana di u ballò u rimprovaru di cullusione cù e grande squadre, in particulare l’OL d’Aulas è u PSG.



I Corsi soli contru à a Lica ?
Sti pochi tempi u dispiacè s’hè spartu ancu à i dirigenti è intrenadori di squadre prufeziunale : guasgi tutti Corsi…

Sè no cacciemu à Philippe Ginestet, u Prisidente di Strasbourg, scuntentu assai di l’arbitraghju di pettu à a so squadra contru ghjust’appuntu à l’Olimpicu Liunese di Jean-Michel Aulas, chì hà dopu à ‘ssu scontru annunciatu a so demissione di a « task force » ingiru à l’arbitraghju, si trovanu bellu solu l’isulani per purtà una critica d’un sistema chì face di più in più a piazza bella à l’iniquità.

L’arbitraghju à prò di certi, u palesa dinù Frédéric Antonetti, intrenadore di Nizza.
Ma face dinù falà e cutrate in quantu à l’attitudine di i media di pettu à l’affare di razzisimu o cusì qualificate, di sti pochi tempi : punzichendu u Sporting, truvendu e scuse à i Pariggini è a Metz.

José Pasqualetti, l’anzianu tecnicu di u Squeubeu oghje à capu di Sedan s’attacca direttamente à Aulas, chì sicondu à ellu si piglia per u Papa di u ballò francee o per qualchì prisidente di a Ripublica, minacciendu d’ùn andà micca à ghjucà contru à a so squadra s’ella ùn hè cambiata a data di u macciu chì ùn li cunvene. i[« Ùn hè micca u patrone di u football francese. […] Ci vole ch’ellu pianti di rompemi e stacche ! »]i hà privinutu Ghjisè chì hà dinù fattu rifarenza à mezu voce à e suspizione di frauda ingiru à a tiratura di i scontri per a meza finale di a Cuppa di Francia. Difatti, Lacombe prisente per raprisintà Liò paria di cunnosce u so avversariu nanzu ch’ellu sia designatu.

Eppò ci sò state di sicuru e riazzioni in quantu à a cusì detta « Affare Kébé II » è u ritiru di dui punti di più à Bastia.
U nostru Jojo Bonavita hà scrittu à a Federazione fendu parte di u so stumacheghju davanti à sta decizione è hà dicisu di rende e so medaglie ricivute da a FFF. Cum’è Pierre-Paul Antonetti, u fratellu di Fred, dumanda di manera linda hè chjara à Thiriez di « demissiunà di u so postu è di parte per u sempre di u football francese, postu chì s’o mi ramentu bè ùn aviu mai intesu u so nome nanzu ch’ellu sia lampatu à a prisidenza di a Lica di Football Prufeziunale. »

Pare ch’ellu ci sia una prifarenza per e squadre praputente in u mondu di u ballò francese, ma quandu si vede a rabbia cù a quale si ne piglianu à e squadre corse, omu si pò dumandà cun raghjò s’ellu ùn c’hè dinù una forma mancu piatta di razzisimu anti corsu.
E riazzioni pulitiche di l’Assemblea di Corsica è di numarose urganizazione andarianu in stu sensu…

u 26 d'Aprile 2008
Mazzone



1.mandatu da estrimei u 26/04/2008 13:17
mi pare ch'ellu seria statu piu ghjuvevulle si l'assemblea di Corsica avia dinunziatu tutte e 'nghjullie fatte tutti i ghjorni apenna di piu a u nostru paese.quandu sentu parlà a Santini in maestà mi ghjunghje a cagga.
forse mi rimpruverete di un esse un passiunatu di u ghjocu a ballo, ma mi pare chi s'ommu un vole esse suttumessi a u razzisimu francese versu u nostru Populu un si entre nu u so sistema.
una dumanda a i passiunati di u ballo: a a tirata di e rete , quantu ci costa (in termini di soldi) u ghjocu a ballo prufezziunale ?

Novu cumentu :


Seguitateci nant'à Facebook


L'articuli

Abbunatevi à a newsletter

Circà nant'à A Piazzetta