Accueil
Envoyer à un ami
Version imprimable
Partager

I castichi di l'estate

Pensate chì ciò chì l’estate face di peghju sò i colpi di sole, u focu, e potte marine è e zinzale ? Manc’appena !



I castichi di l'estate
I camping car nant’à e strade
Un grande clàssicu di l’estate in Corsica : u turistu cù a so caravana o u so camping car. Quale ùn s’hè ritruvatu daretu à una lumaca à dui à l’ora impussibule à duppià ? Ùn vale a pena d’annerbassi è aspettate à settembre…

Tourist Invaders
Iè, a sintimu digià dì da quì : hè u turisimu chì face campà a Corsica. Ma perchè avè paura di dilla ? E centinaie di turisiti lampati nant’à e spiaghje di l’isula sò dinù un’agressione ! Chì tanti « Space Invaders » ! È sè no pruvassimu di campà d’altre cose ch’è di u turisimu ?

U « petit train »
Chì cità corsa si franca u so trinichellu colmu di turisti, vechji cucchi di preferenza, cuntenti cum’è pichji di fassi un giru ? U peghju hè ch’elli ùn si rendenu micca contu à chì puntu sò ridìculi…

I pippol
A grande cumedia di l’estate cummencia cù e pagine pippol di Corse-Matin. Ogni ghjornu, un pippulacciu. Sempre listessa falsitutine : li piace a Corsica, l’autenticità di stu bravu populu appena connu ma tantu sinceru. Tuttu què per campà in e so villà-bunker u più luntanu pussibule da i paesi. Poveri à noi, cuntenti di serve a suppa à sti mullizzi…

Tuttu ciò chì cummencia per « beach »
Beach soccer, beach party, beach volley… Ma perchè toccu l’estate ci vole à mutassi in tontu di i sport imbecilli, cun short è tàmbara à l’aria ? È ùn parleremu mancu di a cumedia di u jet è di u quad o di u carnavale di u « turisimu verde » (accro branche, via ferrata, canyoning…)

Cundannati à diventà un populu di muzzi per turisti ?
Cun 110 millioni di visitadori à l’annu, u Mediterraniu hè a più grande attrazzione turistica di u mondu, luntanu davanti à Disneyland. In i 20 anni à vene, stu sciffru serà multiplicatu per dui. U turisimu attira soldi faciuli è appititti d’investiscitori. Ma à quale prufittanu sti soldi ? Chì piazza per l’identità è a cultura in a Corsica di dumane ? Seremu cundannati à diventà i servi di stu turisimu ? Finalmente sò poche e differenze cù i paesi sottusviluppati.

I saccadò cun calzette è ciavatte
I campioni di u mondu di u gattivu gustu si danu tutti appuntamentu durante dui mesi in Corsica. Quandu averanu da capisce ch’ellu ùn ci vole à mette calzetta sott’à a sàndala ?

E buatte di notte
Altra pulluzione statinale, a cuncurrenza di e buatte corse à grande publicità di serate sempre più pazze è di DJnacci guizzi. « Et qui on est », dicia quellu…

Un scempiu eculògicu
Ùn si ne parla mai, ma chì serà l’impattu di u turisimu nant’à l’ambiu ? Cù una pupulazione duppiata à u più forte di l’estate, chì ne serà di u trattamentu di l’acque brutte, di e stazioni d’epurazioni ? Chì ne serà di a surfrequentazione di certi siti, in bor di mare cum’è in muntagna ? È dì chì per certi, ùn ci hè abbastanza ghjente chì ghjunghje…

U fresteru chì cerca à cumprà
Pensate stà tranquillu in paese, luntanu da u cumbugliu tontu di a piaghja l’estate. Ma eccu ch’elli scalanu unepochi di fresteri, in brama d’una casa da cumprà. Dimmula chjara : ÙN CI HÈ PIÙ NUNDA DA VENDE IN CORSICA.

Conclusione
L’estate rende sia connu, sia azezu. Sceglite u vostru latu !

u 16 di Lugliu 2009
U Sgaiuffu



1.mandatu da Urelianu u 16/07/2009 02:05
Aiò o figliò! Ghjunta l'estate, nant'a a stu situ un si vede chi insulti, disperazione e lamenti! Mettite appena di positivu in i vostri articuli! Un turistu hè connu, ghjè vera, ma hè connu sia in Corsica chi in altrò! Cumincemu a raghjunà appena e viderete chi pudemu vive ancu senza u turismu.... Cume? Muvendu u culu!!

2.mandatu da Mussor u 16/07/2009 02:41 (da un teleffuninu)
Eiu aspettu l'inguernu cun impazienza...

3.mandatu da petra matticcia u 16/07/2009 07:21
Ottobre sente castagne in paese fumicosu...

4.mandatu da Ochjisburlati u 16/07/2009 07:53

AIò aiò, è u piacè di l'ochji ? Tutte 'sse naiade sculturale è spugliate nantu à e spiaghje, ùn ci hè da maravigliassi di a vita?

5.mandatu da Ghjuvan' Filici u 16/07/2009 10:11
Aghju sceltu "azezu" eu...

6.mandatu da chì ne socu eiu u 16/07/2009 10:23
anch'eiu sò azezu.
Di più ùn sò micca in vacanze eiu.Travagliu ogni ghjornu, a duminicata dinù. :(

7.mandatu da piratella u 16/07/2009 20:42

E boatte puzzanu u sudore, i pedi, è astri affari dinù, dipoi ch'ùn si pò più fumà : da more in salute!

8.mandatu da Cumpalliols u 16/07/2009 21:49
Sia connu, sia azezu ?
Ùn sò micca troppu d'accunsentu.
Eiu, diceriu chì l'estate pò rende scemu.

È postu chì scemu, sò dighjà...

9.mandatu da culomba u 20/07/2009 23:41

Ai sminticatu a grippa purcina o Sgaiuffu. Hà messu u pede in Corsica cù i turisti, fate pianu caccighjendu !

10.mandatu da Rabbia u 29/07/2009 19:09
Allora ci vulerebbe à sapè à quale apprufitta u turisimu, fora di tutti quelli chì mettenu à pigiò e "chambre d'hôtes" à prezzu massimu senza dichjarà à l'impositi. U turisimu, cum'ellu ghjè oghje in Corsica, hè prima di tuttu assai inquinamentu/ puzzichime : battelli è aviò chì impuzzichiscenu u celu è u mare : quale hè chì si primureghja di a "couche d'ozone", tandu? nimu! E ùn parlemu di e vitture rese da i . Per u turisimu si custruisce n'importa cosa basta ch'ellu fussià prò di certi, è si facenu ancu palazzi per tutti quelli chì scalanu quì à travaglià dui mesi. I Stagiunari quant'è i turisti chì più và più sò pinzuti, facenu chì i nomi nustrali in particulare tutti i nossi nomi di lochi sò detti à a francese, è sò ancu tradutti in francese. E un parlemu di tutti quelli chì dopu si credenu ubligati di cumprassi una casa ind'è noi "parce qu'on adooooorrrrrrrrreeeeeeeee la Corse".

11.mandatu da miché-u-buzincu u 29/05/2010 17:23
l'estate mi rende scemu !!!!

Novu cumentu :


Seguitateci nant'à Facebook


L'articuli

Abbunatevi à a newsletter

Circà nant'à A Piazzetta