Accueil
Envoyer à un ami
Version imprimable
Partager

I media ingabbiati !

Ùn hè una nuvità per nimu, più và è più hè inchjustrata l’infurmazione, sottumessa ch’ella hè anc’ella à e logiche periculose di u marcatu praputente.
U custattu hè statu fattu più d’una volta à epiche varie è in lochi sfarenti.
A Corsica dinù hè tocca da stu fenomenu. A resistenza d’una stampa libara hè debbule, ma soca ripigliarà fiatu cù l’internet ? In tutti i casi, pruvaremu ancu noi à u nostru picculu livellu à participacci.



Da a libertà di a stampa à a libertà di a Corsica...
A mossa naziunale in Corsica hè dinù stata una mossa à prò di a dimucrazia, è pare chì a libertà di i media si una guaranzia di quella è di e libertà in una sucetà.
A dicia Alexis de Tocqueville in a so opara maiò De la démocratie en Amérique, a libertà di a stampa hè un elemente essenziale per parà i sviamenti di stu sistema.
Per ellu, « a libertà di a stampa ùn fà solu sente u so putere nantu à l'upinioni pulitichi, ma dinù nantu à ogni upinione di l'ome. Ùn cambia solu e leggi, ma dinù e facende. »
Avia ancu privistu l'Affare Kébé : « Quandu chì parechji organi di stampa ghjunghjenu à viaghjà nantu à a listessa via, strada facendu a so influenza diventa pocu à pocu irresistibbile, è l'upinione publica, tocca sempre da u listessu latu, vene à cede sottu à i so colpi. » È cusì d'un affare di nunda prisintate da razzista una cumunità sana.
Hè quì l'intaressu di u sviluppu di media libari da upponesi à u pinsà unicu.

« Piattatemi sti fatti ch'ùn ne vogliu sente ! »
Ma c'avvidimu ch'a sfida ùn hè vinta, è l'esempii sò numarosi.
Pigliate sti black-out nantu à certe infurmazione : stu striscione chinese dumandendu a libertà di a Corsica cacciatu fatta fatta da u situ internet di u Figaro.
Figuratevi una disinfurmazione trimende in seguita à u focu messu à l'Assemblea di Corsica.
Si tratta di l'infurmazione à modu Sarkozy ch'ellu dinunciava u Cumitatu Contru à a Ripressione in una cunfarenza stampa : l'infurmazione hè fatta da u putere, postu chì u putere si busca per via di l'infurmazione data, sviata, tradita, rifatta eppò sguassata.
Cusì da l'arrestu di trè lasagnoni, i media annoncianu senza nisuna verificazione chì quelli ch'anu picciatu u focu ind'è u scagnu di Santini eranu stati arristati subbitu dopu a visita di u ministru di l'internu : quattru mesi dopu l'inchiesta ùn hè manc'appena avanzata è ùn si sente più nunda.
È dopu chì cuscenza, chì analisa sviluppà in pettu à ciò chì si sente ? Quellu chì t'hà a raghjò ghjè stu guignol di PPDA : « Fighjate troppu à televisione ! »

È a libertà di a stampa in Corsica ?
In Francia sò guasgi smariti i media d'uppusizione o critichi, senza parlà di a stampa d'upinione militente.
In Corsica a situazione hè listessa di modu più chjucu, vale à dì una manumessa di gran'gruppi nantu à l'infurmazione. St'andatura era statu dinunciata da u misincu Corsica ind'un interessantissimu articulu di Gilles Millet chjamatu « Grandes manoeuvres dans la presse régionale ».
In pettu à una logica di cuncintrazione, capite una ripresa di a stampa righjunale da gruppi cum'è Le Monde è Lagardère, sprufonda a diversità di l'infurmazione è dunque a libertà.
Accantu e difficultà sò terribule per fà campà un media di qualità chì esce di modu regulare chì l'attacchi sò tremendi. Ammintatevi sta rabbia da tumbà u sittimanale u Ribombu o u ricusu parechje volte di cuncede à Arritti.pdf/ u prezzu pustale prifirinziale cum'è à ogni publicazione.
Ancu assai chì certi cum'è Alta Frequenza cercanu da andà di più luntanu ind'a ricerca di a verità. Anu fattu sapè arrisera ch'in u quatru di l'interpellazione di militenti naziunalisti, ùn passava nisun infurmazione.
C'hè da ricunnosce dinù chì nantu à st'onde a parolla hè lacata à tutti è chì i temi trattati sò varii.

Allora ammintemuci torna una volta u pinsà di stu scemu di Tocqueville chì dava dui seculi fà à a Piazzetta a legitimazione di a so asistenza, femu schjattà u piombu di a manumessa di e multinaziunale è di u putere in piazza è lacemu corre l'infurmazione, cum'è l'acqua chì ci volenu dinù pigliassi à contu soiu. Ne riparlaremu...

u 29 d'Aprile 2008
Mazzone



1.mandatu da ribella u 29/04/2008 13:33
U scopu u piu impurtante di a furmazione di l'omi hé u sviluppu di u SPIRITU CRITICU.
A chi serve u nostru giurnale A NAZIONE ,
A CHI SERVE A NOSTR'UNIVERSITA ind'è u mondu oghjincu minacciatu dà a MUNDIALISAZIONE , è chi diventa a CORSICA ?
Eccu è vere quistioni !

2.mandatu da Zimacoglia u 29/04/2008 17:16
Et toi, tu stampes un peu?

3.mandatu da ciau! u 29/04/2008 17:54
PICASSO dicia stampes, stampes , un jour tu te trompera et là ce sera ton style!

4.mandatu da Mazzone u 30/04/2008 13:04
Felicitazione à Zimacoglia chì c'hà capitu tuttu hè sintettizatu di manera corta st'articulu :
Lagardère hè un stampone !

5.mandatu da JMA u 04/06/2008 11:38
Si tu ne viens pas à lagardère c'est lagardère qui viendra à toi!!!!!!!!!!!!!!!

Novu cumentu :


Seguitateci nant'à Facebook


L'articuli

Abbunatevi à a newsletter

Circà nant'à A Piazzetta