I più goffi di u mondu sò inglesi

Pessima ghjurnata per i nostri amichi inglesi. Si sò resi contu ch'elli sò a ghjente di u mondu i menu attiranti.

A nutizia face male ma sò e statistiche di u situ BeautifulPeople.com chì a dicenu.

L'idea hè sèmplice : nant'à stu situ di scontri "per belle persone" tuttu ognunu si pò arregistrà. Ma ùn serete micca tutti ritenuti : ci vole à mandà u vostru ritrattu è ùn sapete ch'è qualchì tempu dopu s'è vo site selezziunatu o nò.

Sàppiate chì 1,8 millioni di goffi chì sò stati messi fora durante e duie settimane passate Terribule nò ?

I paesi chì anu u più successu sò nòrdichi : Nurvegia (76% di riescita) è Svezia (65%), dopu ci hè u Brasile (45%).

I più gattivi sò dunque i Tedeschi è l'Inglesi (menu di 15% di riescita).

Cum'è di solitu, i Francesi sò mezani : solu 35% pè e donne è 20% per l'omi.

A storia ùn ci dice micca quantu Bustanichesi anu riesciutu à francà u test di a scrizzione. Eiu mi ne impippu, sò statu accettatu nant'à Beautiful People. È voi ?