Accueil
Envoyer à un ami
Version imprimable
Partager

Idule : James McClean, quellu chì dice di nò à u statu culuniale britannicu

Dumenica, i nostri fratelli – è surelle – d'Irlanda ghjocanu contr'à l’Équipe de France. Una partita savurita chì rilancia d'un colpu l'interessu per l'Euro in l'isula. Ghjucadore mezanu di Premier League, James McClean, 27 anni, duveria principià nant'à u bancu. Ciò chì ùn l'impedisce micca d'esse u ghjucadore u più emuziunante di a selezzione di Martin O'Neill.



Idule : James McClean, quellu chì dice di nò à u statu culuniale britannicu

Simu u 17 di lugliu di u 2015. James McClean, appena trasferitu à West Bromwich Albion in arrivu di Sunderland, hè in turnata di prumuzione à i Stati Uniti cù u so novu club. A timperatura hè piacente è McClean è i so cumpagni sò tranquilli nanzu d'affruntà a squadra lucale di Charleston Battery, in Carulina di u Suddu. Ma allora chì u solu luce in e tribune di u MUSC Health Stadium, l'Americani anu a bona idea di sunà ‘God Save The Queen’ nanz'à u macciu. Mentre chì i ghjucadori di West Brom s'alignanu cun rispettu, James McClean cala u capu, si gira di spinu, è tene l'ochji fissi nant'à l'erba verde.

Idule : James McClean, quellu chì dice di nò à u statu culuniale britannicu

À una decina d'ora di volu da quallà, à u Reame Unitu, l'affare face un scandalu. In i media falanu scutrate nant'à l'ala manca di 26 anni è riceve una matalza d'insulte nant'à Twitter. Ma quessa, James si n'infutte. Nè hà l'abitutine.

« You Are Now Entering Free Derry »

L'averete capita, James McClean hè Irlandese, è ùn ricunnosce l'innu britannicu cum'è soiu. Perchè ùn l'hè micca. Ma a storia hè appena di più cumplicata ch'è quessa. Ghjucadore di a selezzione di a Republica d'Irlanda, James hè natu in Derry, in Irlanda di u Nordu. D'altronde hà ghjucatu sette partite cù e selezzione di i giovani d'Ulster. Situata à un'ora è mezu à punente di Belfast, Derry hè cunnisciuta per esse stata u tristu teatru di u Bloody Sunday. U 30 di ghjennaghju di u 1972, in pienu cunflittu nord-irlandese, a British Army facia focu in u quartieru republicanu è catolicu di u Bogside. Era organizata una manifestazione pacifica pè prutestà contr'à i internements di i membri di l'IRA. Bilanciu : 13 feriti, 13 morti è una cità traumatizata.

Più di quarant'anni dopu, si sò appaciate e tensioni in a cità. Ma i catolichi republicani fermanu magiuritarii à l'ueste di Derry, scumpartuta da un fiume, a Foyle, mentre chì i prutestanti unionisti campanu à l'este. Cumu ne testimuneghjanu i murals di u Bogside, cum'è u famosu « YOU ARE NOW ENTERING FREE DERRY », tuttu mondu avanza, ma ùn si scorda nimu di u passatu. È sopr'à tuttu micca James McClean.

Free Derry Corner, Bogside, Derry. Autore : Ardfern / Wikimedia Commons
Free Derry Corner, Bogside, Derry. Autore : Ardfern / Wikimedia Commons

Pampasgioli è thatcherisimu

Toccu nuvembre di u 2012, 15 mesi dop'à u so trasferimentu da u Derry City FC à Sunderland, u giovanu ghjucadore facia digià ughjulà i tabloïds ricusendu di purtà u « poppy ». Elegante fiocculu chì l'amatori di Premier League cunnoscenu tutti, u pampasgiolu hè purtatu in pettu da tutti i ghjucadori di u campiunatu pè rende omagiu à i suldati britannichi morti à u cumbattu. McClean riceve minacce di morte è i so propii fans li cantanu « FUCK THE IRA » quand'ellu ghjoca in casa soia. Dui anni dopu, u zitellu di Derry ghjoca per Wigan è si ripete a storia. Scrive tandu una lettera per spiegà u so gestu à i fans, ma dinù à Dave Whelan, dirigente di u club è ammiratore di Margaret Thatcher. « Aghju u rispettu tutale per tutti quelli chì sò morti à u cumbattu durante e duie guerre mundiale. […] Ma u Poppy hè utilizatu per arricurdassi di e vittime d'altri cunflitti dapoi u 1945 è hè custì ch'ellu principia à ponemi prublema à mè.

Pè a ghjente chì venenu d'Irlanda di u Nordu cum'è mè, è in particulare da Derry, locu di u macellu di u Bloody Sunday in u 1972, u poppy hà un'altru significatu.
[…] À Derry, a ghjente campanu sempre in l'ombra d'unu di i ghjorni i più scuri di a Storia di l'Irlanda. […] Face parte di noi, tocca a nascita.

Mr Whelan, purtà u poppy per mè saria una mancanza di rispettu per tutti i nucenti chì anu persu a vita durante i Troubles
[…] uguale à quella ch'o sò accusatu di purtà di pettu à e vittime di e duie guerre mundiale. Saria cunsideratu cum'è una mancanza di rispettu contr'à sta ghjente, contr'à u mo populu. »

Idule : James McClean, quellu chì dice di nò à u statu culuniale britannicu

Un testu cummuvente, chì averà datu a carne pullina in u quartieru di u Creggan, sopr'à Derry, induve i suldati britannichi eranu tombi da i snipers di l'IRA bellu nanz'à a nascita di McClean. Ben'intesa, i media ùn capisceranu mai tuttu di l'affare. È u ghjucadore cuntinuveghja d'esse accusatu di « prufittà di u sistema » è di stupà nantu in u spinu. Una retorica chì l'Irlandesi cunnoscenu bè. È i Corsi dinù.

u 24 di Ghjugnu 2016
Tumasgiu d’Urbinu



1.mandatu da miseria u 25/06/2016 01:35
Iè mentre chì noi mittemu a marseillaise in lu nostru stadiu.
"I Corsi dinò" ùn credu micca...!
Quessu sì chì ghjè un populu.

Novu cumentu :