Accueil
Envoyer à un ami
Version imprimable
Partager

In America dinù, e false precure sò pronte

Noi ci sciacchemu e "crêpes", e vultate, cum'ellu dice u nostru amicu webmaestru, ma in certi paesi, l'affari sò in francese. Vogliu parlà di u "Super Tuesday" americanu.



Durante quellu martitone, u primu marti di u mese di marzu di l'anni d'elezzione, votanu i stati (uniti) pè eleghje à i so rapresententi, chì anu da sceglie quale serà u candidatu unicu, sia di i Ripubblicani, sia di i Dimucrati.

I capizzoni dimucrati sempre in lotta per esse incaricati di a missione finale ùn sò più ch'è dui.

Hillary Clinton, a moglia di quale sapete, a prima donna à bramà a rispunsabilità suvrana ind'a storia mericana. A so campagna hè assai stampata dà a prisenza di u so maritu, l'ex presidente Bill Clinton. S'ella hà da vince, si dumanderà qual'hè chì hà purtatu u calzunettu. Avia vutatu pè a guerra in Iraccu ma per avà prova di move u dibattitu nant'à un terrenu più prupiziu per ella. Hà sempre dimustratu a so capacità di stà di fronte à e difficultà, prima di fà a pulitica. Rammintemuci l'affare Monica, quandu Hillary ùn facia mottu è incasciava.

Barack Obama anch'ellu hè un candidatu "storicu", micca perchè hè u primu candidatu di culore à l'elezzione mericane (arricurdatevi di Jessie Jackson) mà perchè hè u primu candidatu di culore à mettesi in pusizione seria d'esse elettu. Hè pè parlà chjaru u candidatu di e minorità, mà hè ghjuntu à guadagnà a simpatia di una parte impurtantissima di i vutanti bianchi. Pè finisce, pudemu dì ch'ellu hè u candidatu di l'intelletuali, l'artisti è di parechje stelle di Hollywood. Si presenta cum'è l'omu di u cambiu da veru.

Da u latu ripubblicanu, n'avemu trè.

John McCain, chì hè assai sfarente di George Bush, perchè hà sempre dettu chì si malfidava di l'influenza di i gruppi di prissione industriali è pulitichi. Si pì dì ch'ellu hè un cunservatore di un puntu di vista militare è suciale, mà piuttostu liberale nant'à e primure ecunomiche.

Quale serà a so pusizione di pettu à u sforzu di guerra americanu in u mondu, postu ch'ellu hè un veteranu di u Viet Nam, avendu passatu più di cinque anni prigiuneru casticatu dà i Viet Cong ? Avia vutatu pè a guerra in Iraccu ma hà sempre criticatu a diplumazia sfacciata di Donnie Rumsfeld. In più di quessa, hà fattu vutà un'emendazione contr'à i supplizi ind'e prigione militare mericane.
E po hè sustenutu da u nostru buddy Arnold Schwarzenegger, un amicu di a Corsica.

Si stacca in'avanza John McCain, abbastanza luntanu di i dui altri postulenti. U primu hè Mitt Romney, anzianu guvernatore di u Massachussetts, "mormon" è cunversatore. Omu riccu quant'è u rè Cresu, ùn hà mai riesciutu à alzassi in testa da i sundaggi. Pè compie sta crunichetta, parlemu di Michael Huckabee, cunservatore è pretinu (vogliu dì, assai di più ch'è l'altri), u predilettu di l'America religiosa, quella chì pensa chì a Bibbia deve superà e custituzione umane.

È voi, à quale vuterete ?

u 6 di Farraghju 2008
quellu chì si sciacca una Bud



1.mandatu da Petru-Anghjulu u 06/02/2008 03:35
Arnold si aghju bene capitu, c'he u neru republicanu chi he ancu a vietcong ?

2.mandatu da bastiacciu u 06/02/2008 12:15
cunfondi forse Arnold Schwarzenegger è Arnold di "arnold et willy", nò ? :-D

3.mandatu da estrimei u 06/02/2008 18:17
qui simmu cundannati a vutà per una republica chi un he micca a nostra, e tu volli ch'o voti ,o forse ch'o dia u mio parè nant'a i canditati americani .
so mi lasciava andà a mio simpatia seria per Obama,he giovanu,he negru e pare piu a manca che l'altri , ma ci'ole a esse cuscenti chi s'ell ' ha pussutu fà campagna , he ch'ellu maneghja i soldi a pallitade , e cume u soldu incarugnisce...

4.mandatu da bastiacciu u 07/02/2008 12:58
à nutà a creazione d'un gruppu "Corsica for Obama" nant'à Facebook !!!

forse ch'ellu serà capace à fà un gestu per noi s'ellu serà elettu...

Novu cumentu :