Accueil
Envoyer à un ami
Version imprimable
Partager

In Bastia chjodenu e librerie

Spassighjassi fendu u giru di e librerie serà un'attività chì appartene à u passatu ? Chjode "Le Roi Lire" in Furiani. In cinque anni, sò cinque e librerie à avè tiratu l'usciu in Bastia è u so circondu.



In Bastia chjodenu e librerie
Bastia, settembre 2011. Ùn l'avete mai lettu allora site decisu di cumpravvi Pesciu Anguilla, u rumanzu di Sebastianu Dalzeto. Avete a scelta, poche e librerie in u circondu bastiacciu. È chì piacè d'entre in una libreria, di fidighjà e scancerie, di piglià un libru, di riponelu, d'esse attiratu da una cuprendula, d'esse entratu cun l'idea di cumprà un libru è di sortene cù un altru.

In u 2011, avete a scelta. Ci hè "Terra Nova", carrughju Napuleò. Ma forse anderete nant'à a Traversa ind'è Papi o Album (l'antica "So.ba.di" diventata "Chez Sobàdi" o "Madame Sobàdi" pè i Bastiacci...). Più in sù ci hè "Les Deux Mondes" è in ghjò lamperete un ochju ind'è Marzocchi. Ma ci hè dinù "Le Point de Rencontre" vicina di u Tribunale è "Le Roi Lire", in a galeria cummerciale di La Rocade in Furiani.

Grazia à a magia d'internet, si trova ancu un filmettu chì mostra l'apertura d'una libreria nova, in Bastia. Semu in u 2009. Attenzione, hè diventatu un ducumentu storicu :


Di ste sette librerie, oghje ne fermanu trè.

"Terra Nova" hè stata a prima à chjode à u principiu di l'annu 2012, seguitata da Marzocchi è "Le Point de Rencontre". A libreria "Les Deux Mondes" hà tenutu sin'à u mese d'agostu di u 2016.

Serà un prublemu d'attrattività di u centru di a cità ? Micca solu. À a fine di stu mese, a libreria "Le Roi Lire" situata in a galleria di u centru cummerciale di Furiani chjuderà e so porte.

Firmeranu Album è Papi.

In Bastia chjodenu e librerie

In appena più di cinque anni, sò dunque cinque e librerie bastiacce à avè tiratu l'usciu. À u primu rangu di e cause ci hè a cuncurrenza d'internet è d'Amazon. Quella di l'hypermarchés ci hè per qualcosa dinù. È u fattu ch'ellu si compri di menu in menu libri.
Parigi, 2014
Parigi, 2014

Certe seranu forse trasfurmate in magazinu di scarpi "fashion" è "franchisé" o in cosu à sushis. È hè cusì chì torna appena di più, a cultura rincula in cità. È ùn parlemu mancu di u periurbanu bastiacciu, zona dedicata à a cunsumazione. Chì piazza pè u libru è a cultura trà Furiani è I Fulelli ?

Quandu "Les Deux Mondes" anu chjosu, Hervé Cheuzeville scrivia nant'à u situ di l'associu Musanotra :

"De grâce, chers lecteurs, abandonnez la solution de facilité que vous procure internet, reprenez le chemin qui conduit à l’une des dernières librairies de Bastia. Notre ville fut une cité de culture, il ne faut pas qu’elle se transforme en zone d’acculturation et de consumérisme."

l'8 di Sittembre 2017



1.mandatu da batistu u 08/09/2017 22:07
Ses trais un quiet an

Adieu culture

2.mandatu da O CORSU RIFLETTI u 09/09/2017 11:22
I cummerci chjodenu unu dopu à l’altru. Chì peccatu ! Eppuru ghjè cusì bè d’andà in ‘ssi cummerci induve si cunnosce u patrone. I grossi è internet si piglianu tuttu.

3.mandatu da Ghjunghjiticcia u 16/09/2017 08:59
Mi n'invengu l'ultima volta ch'e aghju pruvatu di cumprà un libru in Aiacciu, una quindicina d'anni fà. Ùn l'aviani micca in magazenu, va bè, l'aghju cumundatu malgradu un accoltu più cà frischettu. Dui settimani dopu ci sò vultata (è dighjà à l'epica ùn era micca faciule ghjunghje in centru, scansà a vittura) , a cumanda ùn era sempre micca ghjunta. Una settimana dopu aghju chjamatu, sempre nudda. Mi sò vultata versu à Amazon è dapoi aghju lettu una mansa di libri è avà incù Kindle leghju ancu di dipiù.

Novu cumentu :


Seguitateci nant'à Facebook



Abbunatevi à a newsletter

Circà nant'à A Piazzetta