Accueil
Envoyer à un ami
Version imprimable
Partager

In corte parolle : Basta à i pumataghji !



« A cumuna di Corti si pò paragunà à quella di New York, ùn dorme mai », hà dettu un ghjornu Xavier Poli, primu aghjuntu di u merre Tony Sindali.

Di fatti, quand’elli si ne vanu i studienti ghjughjenu i turisti da u mondu sanu. Ogni estate, parenu di più in più numerosi à chjappà per u corsu Paoli o u vechju carrughju di a Citadella o i chjassi mitichi di u GR20. Li piacenu e muntagne, i laghi, i pagliaghji, i fiumi…

Certi, à u longu à e so duie settimane di vacanze, dormenu in l’ostelle, manghjanu à l’osteria, piglianu i trenucci è u trinichellu, paganu un guida, visitanu i sfarenti lochi di u Centru di Corsica, vanu à u Museu, compranu ricordi, da cunnosce megliu a cultura è a storia di u rughjone, participendu à u so sviluppu ecunomicu. Di modu generale, quessi sò allemani, taliani, inglesi, per a maiò parte à a ritirata è chì anu i mezzi di cambià d’aria in una Isula cara è bella cume a nostra.

Una vera merdendella !

Ma ùn sò micca tutti cusì. Ci n’hè altri veradimente speziali. D’altronde, si pò parlà d’una razza assai strana di viaghjatori. Soldi ne anu pocu è micca, poi ùn volenu spende nunda nunda ! Tuttu l’annu, si techjanu di pomi è di carna rossa à bon’ pattu per mette a muneta d’accantu. Ponu allora accattà un billettu di battellu o d’aviò, è affacassi di lugliu ind’è noi. Invece di campà i so cungedii d’una manera beata è ripusante, si casticanu da per elli. Portanu sacchi chì pesanu un piombu, cù nentru da beie è da cacà, strappendu si e spalle è u spinu. A sentenu passà. È noi u sentimu passà l’odore di u so sudu quand'e nò i crucemu à u Super Casino o à u Coccinelle. Imbruttanu a natura, ghjittendu e so ramasuglie induv’elli campeghjanu è lachendu daretu à elli una vera merendella. Infine, si facenu sunnate in bordu di strada, n’importa indocu è ancu in l’assesti bagagli di l’autocarri (vede i nostri ritratti). Ohimè, chì vergogna : ch’ella sia in cità universitaria o in altrò, basta à u pumataghjisimu !

u 24 di Lugliu 2008
L’Alisgianincu



1.mandatu da estrimei u 24/07/2008 12:02
he vera chi per a majo parte , a ghjente chi prufitta di u turisimu in Corti, hé corsa , 'ncu assai cummerci di curtinesi; ma ch'ellu sia turisimu di ricchi o turisimu di piu disgraziati un pensu micca ch'ellu sia a càmpa di u Populu.Se vo pigliate ste piaghje ,custi corsi un ci n'he piu (o pochi, e s'elli ci so impiegganu quelli chi costanu u menu caru) , ch'elli sianu patroni o impiecati , so ghjente chi sboccanu da d'un si sà 'nduve , e chi , e borse piene , vannu a spendesi i so quatru soldi in astro.
a quandu un ecunumia sensata a pro di u populu Corsu?

2.mandatu da Stavroguine u 24/07/2008 15:25
Oh, ma seti sicuri ch'ùn hè micca mortu, quissu tontu straquatu in u coffru di u carru ?

3.mandatu da TonyMontana u 24/07/2008 19:02
Attenti ch'ellu ùn sia micca quellu chi hà scappatu di Casabianda

4.mandatu da orsufrancè u 26/07/2008 11:45
U megliu ghiè di invitali in casa è dadi anchu l'aloggiu ,è cusi puderanu dorme è mangghia a pro soiu sensa cuntraria a nimu. ho!!! hoooo!!!!

5.mandatu da ribella u 29/07/2008 00:26

E FOURNIRET INDUVE L'AVERANU MESSU? IN CASABIANDA !SERA ANCU PEGHJU CHE I PUMATAGHJI!

6.mandatu da Suffia u 07/08/2008 22:32
Chì tanti Corti!
Fighjate in Bastia! À chì dorme à nant'à una strapunta in lu parcheghju di Toga (attenti à garassi quallà!).
À chì si chjina in vittura, e porte aperte, u "levier" di vitezza in corpu...è i zitelli à u solu...in Figaghjola! Sò in ogni locu, marchjanu à mezu à ogni strada...

Ma dicemula, st'estate si more di caldu, forse m'aghju dà stracquà à nant'à un bancu di a piazza san niculà!


Novu cumentu :