Accueil
Envoyer à un ami
Version imprimable
Partager

Infine s'entra in l'inguernu !

Finita a cumedia bling-bling di l'estate, u capatoghju di i turisti, di e croce nant'à e strade, di i paesi pieni di diaspò pretensiunuti. Finitu u carnavale di u beach-volley, di i montasega body-buildati è brunzati à u mare è di i pinzuti rancichi chì ùn mettenu a soia à u comptoir. Eccu l'inguerna ch'affacca !



Infine s'entra in l'inguernu !
Prima, ci hè u rituale di l'ora d'inguernu. Cummencia bè : si vince un'ora di sonnu, o di briachina in più, cum'ella vi pare.

Dopu ci a festa d'Halloween. Serà l'occasione di distrubuisce qualchì panetta à i lonzi chì ùn anu nunda d'astru à fà ch'è di vestesi in Dracula o in strega. Ci vole à dassi un ogettivu pè a sera d'Halloween : tutti quelli ch'è vo vidite cù a maschera di Scream, un sciambulone ! È per i zitellacci chì venenu à sunnà à a vostra porta per dumandavvi i bombò, postu ch'elli li piace à avè a paura, fateli piacè. Apreteli a porta mughjendu è alzendu un fucile in manu, minaccenduli di finisce in tianu di fasgioli. Normalamente, site tranquillu per una decina d'anni.

Si cuntinuveghja cù a manghjusca : e prime castagne, fatte in ballotte, fasgiole o sbuchjate. Aspettendu a farina per fà frittelle, pulenda, brìlluli nicci o torte pisticcine cù un bonu brocciu, ci serà u figatellu. S'è vo avete a furtuna di truvanne bona è micca falsa sciarcutteria corsa made in China.

Averete tutta l'estate per fà calà u Cholesterol, à tichjavvi di rubbaccia à l'Oméga 3. Allora prufittatene bè !

Infine, ci hè a gioia di a notte chì casca prestu. À cinque ore face notte, eccu una bona ragione d'attaccà l'apperitivu ! Francamente, vi vidite in traccia di cummandà un pastizzu à st'ora quì l'estate, cù u sole chì pichja ? D'inguernu almenu, hè pussibule ! Chì piacè di ritruvassi in caffè, cù u freddu fora è senza tutta sta ghjente ch'ella ci arreca a statina !

Allora, ùn ci hè di chè ralegrassi ? N'avete micca da fà cum'è tutti sti depressivi chì si lamentanu chì l'estate hè luntanu, nò ?

u 29 d'Utrovi 2008
U Sgaiuffu



1.mandatu da anto di sarrula u 29/10/2008 09:48
ghjè veru chi l'inguernu semi beddu megliu , eppo in piu di què ci ghjugnenu i culombi è i becazzi :)

2.mandatu da renusinca u 29/10/2008 13:07
no!!! aiò!!!face u freddu !!! parimu tutte cipolle cù i nostri mantellacci!!!! isciaaaaa!

3.mandatu da Benghjè u 29/10/2008 13:37
"chì piacè, stu sole di merda si ne và..." dicia quellu.

4.mandatu da Elvira u 29/10/2008 14:09
si ni sò andati i basgiacula scrianzati..............tandu cum'è i ciuddi.......SPUDDEMU CI!!!

5.mandatu da uomudibiendadaccuanustrale u 29/10/2008 17:19
Stanu binissimu ancu è nostre mogliè.cusi un le vèdè nimu fora chi un anu più nunda a diciulà in cu sti corsi impinzutiti o sti pinzuti incursiti.Cusi si miteranu ancu èdè ad'accupassi di i so mariti a faddi a so suppa è ancu andà a coglie è castagne mentre chelli so a caccia a u ciglale o ancu a gjiucà a cuntrata in caffè. Ma si po bèiè u pastizu tranquilli in cu l'amichi .E nostre mogliè si ne stanu a è so faciendè è si sentenu megliu sole a di fà cio quelle volenu.E VIVA A LIBERTA !! ! ! ! !

6.mandatu da Paulu Francè u 29/10/2008 19:16
Ma mai m' hà piaciutu l' estate à mè : u callu, a traspirazione, i pumataghji... Ghjè una stagione di conu què!

7.mandatu da heliofobu u 29/10/2008 23:38
Eccu parolle belle ! Un c'hè nunda da aghjustà...

8.mandatu da u tintu u 04/11/2008 11:37
Cume u pastizzu a 5 ore? E i belli ghjorni d'inguernu allora? Quandu casca la neve? Quandu face u frettu.. Si pò cumanda i pastizzi ghjustu dopu 14 ore..

9.mandatu da vanessa guerrini u 15/11/2008 21:33
ancu a me mi piacce di piu l'inguernu , ci so e feste di natale , di u 31 , l'estate face tropu calu , crevu !! un si parla ché di " via notte " !!!!! e bè via notte , bellu locu , grande e tuttu ...... mà e pienu di turisti , di croce , di rancichi , ancu certi disgraziadi!!! l'iinguernu e piu tradiziunale e po tuttu u mondu si cunosce !!!

stu situ e " super" so morta di risa !!!!!!!!

Novu cumentu :


Seguitateci nant'à Facebook


L'articuli

Abbunatevi à a newsletter

Circà nant'à A Piazzetta