Accueil
Envoyer à un ami
Version imprimable
Partager

Internet rende connu ?

Vi piace à cuntà a vostra vita nant'à i vostri spazii Facebook è Twitter, ch'è vo mettite à ghjornu cù u vostru iPhone ? Attenzione, hè sempre ora di sbrancavvi.



Internet rende connu ?
Per principià femu un test. Chì hè u vostru primu gestu quand'è vo v'arrizzate a matina ?

S'è vo rispundite ch'ellu hè d'accende u vostru ordinatore è di cunsultà u vostru prufilu Facebook, cumminciate male.

Ùn pudete stà senza cunsultà i vostri messagi, u vostru forum preferitu, i cummenti lasciati in a notte nant'à u vostru blog ? Mettite parechje volte à ghjornu u vostru statutu nant'à Facebook cù u vostru iPhone (d'altronde grazia à ellu plasticate u vostru forfait...) ?

I vostri "amichi" di FB (chì di siguru, ùn avete mai vistu...) vedenu i vostri ritratti di vacanze nanz'à i vostri "veri" amichi ? Vi site digià tagatu nant'à un ritrattu ?

Ancu peghju : chjamate i vostri "veri amichi" per parlà di ciò ch'è vo avete scrittu è fattu nant'à Facebook ? Quandu site fora, ùn pudete stà 5 minuti per vede s'elli ci sò stati cummenti nant'à u vostru prufilu ?

Tandu ci hè da trimà da veru. Fate parte di sta generazione d'ultrà-cunnettati, di Facebook addict chì cummencianu à inchietà.

U primu à inchietassi hè statu Nicolas Carr, giurnalistu americanu cù un articulu intitulatu Est-ce que Google nous rend idiot ?. S'interrugheghja nant'à a nostra capacità di cuncentrazione, sminuita nant'à internet. A lettura è l'anàlisi di l'infurmazione sò cambiate di manera prufonde nant'à a tela.

Cuntinuveghja un antru americanu in Wired, giurnale di riferenza per ciò chì tocca à u net : "l'ultrà cunnettività hè un sìmbulu di puvertà". Glups.

Pocu dopu si pudia leghje in u New York Times : "quelli chì anu una vera è ricca vita si prutegenu è si tènenu luntanu da u chaos di u web". Pigliatevi què !

Dunque à voi chì vi piace di fà tutti sti testi cumplettamente inùtili di Facebook, di scrivevi à i gruppi sempre più ridìculi è di carcavvi di points cool à difettu di points culu, cumminciate forse à riflette.

Allora hè forse u mumentu di spenghje u vostru PC è di fà certe cose ch'è vo ùn faciate più dapoi qualchì tempu : ascultà un discu, leghje un libru, spassighjavvi appena, mette una turnata à u comptoir. O ancu megliu : ùn fate assolutamente nunda.

Bon, eiu sò decisu, spengu tuttu : internet, iPhone è ordinatore. Almenu per un'ora...

u 15 di Ghjugnu 2009
u webmaestru



1.mandatu da filidatu u 15/06/2009 09:15
Sò giovanu è ùn aghju micca prufilu nant'à facebook?? forse seraghju anurmale ??

2.mandatu da circinelludiguagnènativupèliguagnesusosanguaversatu u 15/06/2009 10:52
uffà ! Eiu ch'ùn aghju nè i-phone, nè prufile faccialibru , è chì dogu un falsu indirizzu elettrònicu pà scrìvami à un forum, cuminciavu à dumandammi s'è fussi beddu nurmali eiu ...!
vecu ch'ùn sogu micca solu, in fin di contu !!!
a prùssima rivoluzioni d'u seculu: u sbrancamentu tutali !!! D'altronda mi pari chì i militenti... marginali, anu capitu chì 'ssa civilizazioni di a cunnessioni, era sopr'à tuttu quidda di a fliccazioni.
uskeubeu

3.mandatu da filidatu u 15/06/2009 12:05
civilazione di a fliccazione è sopr'àtuttu di a cunneria di massa
Eo di tutta manera mi sfidu in generale di tuttu ciò chì hè à a moda o chì piace à a maggiurità

4.mandatu da sumenta u 15/06/2009 13:03
Aio zitelli pudete campà voi senza i punti cool o (u mio preferitu) quandu a ghjente manda basgi??? Quessa si riscalda a mio ghjurnata!! So basgiata tutti ghjorni da centu parsonne!! Chì successu!! Eppoì simu tutti amichi, aduniti nant’à facciabook !! Ritruvemu cio ch’ hè statu persu di fraternita è di spartera è chì era u puntellu di a vita corsa !!! chì piace di leghje i cummenti è i statuti ricchi d’insignamentu: “face u caldu”…”po chì pezzo stu tipu”…”s’annuia”…”hà fattu una pizza tremenda (mai mischjà pastizzu è whisky pff)”…”acapulcooooo”… hà dicu forte : facciabook hà scambiatu a mio vita!

5.mandatu da Piratella u 15/06/2009 14:09
Eiu ùn vò chè nantu à uni pochi di siti : A Piazzetta (indispensevule), foru corsu (dinù) ,
eppo...euh...cinque o sei siti...pochi pochi...hum.

Faccia à beccu hè vera chì ci ne pudemu passà senza prublemu...A facciu centu volte à ghjornu. Hè un pocu cum'è a sigaretta : ùn arrestemu mai d'arrestà, nò? LOL

Iè hè una forma di droga, di sicuru!!

6.mandatu da Peggy A Luviona u 15/06/2009 17:56
Comu? V'arrizzeti a matina è vo viditi prima di tuttu, un beddu culu capicursinu mandatu dà Pamela Pinna via l'applicazioni Points CULU !!
Ùn la so micca par vo, ma à me mi rinfrinscheghja à zira da bon'ora.

7.mandatu da mazzulettu u 15/06/2009 22:19
facebook, hè pè i ghenti ch'anu una vida senza gioia, mi face pensa a stu film incu sylvester stallone chi si chjamava " demolition man" induve a donna e stallone facenu l amore aduprendu un elmu, facebook hè u principiu, in 30 anni saremu cum'elli!!!!

8.mandatu da sumenta u 15/06/2009 22:36
mi dumandu quale hè u piace di fighjà cusì a vita di l'altri? è piu che tuttu perchè stende u so quotidianu davant'a ghjente chì omu ùn cunnosce micca?

9.mandatu da à pusà u 15/06/2009 23:11
ahè ! facebook site tutti à criticallu, ma ci site tutti ficcati nantu in permanenza ! hin hin hin

10.mandatu da ziu santu u 16/06/2009 13:19
Un ci vole micca generalizà nant'à l'utilizatori di facebook
facebook mi serve pè a macagna, piglià nutizie è stà in cuntattu cù ghjente chì forse ùn vecu chì sò luntani. Mai ùn contu a mo vita cum'è certi chì quasi scrivenu ogni attu di a so ghjurnata nantu à u so "profilu" dicenu ancu quand'elli vanu à cacà.
Si pò cuntrulà l'infurmazione è e fotò ch'è no' publichemu. Avà s'è a ghjente hè scema pè cascà in a trappula di BIG BROTHER u peghju hè per ella.
Leghje è sapè a vita di l'altri mi scumuda à pena forse ùn sò vizziosu o curiosu
Hè un peccatu chì certi si sbagliessinu trà arnesu di cumunicazione è ghjurnale persunale


Ancu senza dà e so idee nant'à internet simu schiedati ( fisciati s'è vo priferite )

11.mandatu da ziu santu u 16/06/2009 13:23
è perchè a maior' parte di a ghjente dice faccia beccu ?
facebook face = faccia book = libru

12.mandatu da quellu u 16/06/2009 16:20
iè, ma book, si pò leghje bouc=beccu. nò?

13.mandatu da Piratella u 16/06/2009 17:30

Pensu chì ùn hè Internet chì rende connu, un connu hè un connu, è nantu à Internet si vede cum'è in carrughju, à u Bar, à u travagliu, ecc.

S'elli ùn avessinu Internet per esse abrutiti, truverianu (è anu sempre trovu) altri affari.

Eiu per un dettu, prima di spirità i siti web, mi facia centu sudoku à settimana! Hè ancu più connu, nò???

14.mandatu da Marylin Panzonu u 16/06/2009 21:56
Vi possu fà una cunfidenza?
eu aghju 950 "amichi" nantu à "faccialibru" è ùn ci n'hè manc'unu chi mi cunnosci!
iè...ci n'hè una...scuseti...ci hè Peggy à Luviona è basta! à ella li dicu tuttu!

15.mandatu da Elvira u 17/06/2009 06:18
U scopu maiò di facebook ùn saria micca di lampà ci in faccia a noscia propia vanità di i volti? accinditi à fb, ch'idd'hè curativu, ma spinghjiti senza tardà .....chì u troppu stroppia...

16.mandatu da MAM u 17/06/2009 22:03
vi ringraziu d'esse cusi numerosi à fà a vita nantà face book, à mè m'hà permessu d'ùn fammi cacà cù "edvige".

17.mandatu da yes we canistrellu u 17/06/2009 22:19
iè, fate i macchi ma :

18.mandatu da marylin panzonu u 18/06/2009 21:48
Eu, pà risponde à Elvira, diciaraghju piutostu chi facebook a riisciutu induve tutti i servizii sicreti di u mondu sanu hanu fiascatu : piazza una "camera" in ogni ciarbellu di i facebookisti !! cusi sani ancu à a siconda cio che no femu, no pinsemu è cio che no c'iappruntemu à fà!

19.mandatu da Culomba u 20/06/2009 10:10
Per esse menu conni nantu à Internet, scrivitevi in u gruppu Facebook "la Corse contre le fichage des élèves à l'école maternelle et primaire" : a "base élèves" hè un scandalu in una demucrazia, a Francia vene di riceve usservazione da u Cumitatu di l'ONU nantu à i diritti di u zitellu.

Aiutate à sparghje l'infurmazione,
http://cabec.blog.mongenie.com/

Ci sò riunione urganizate un pocu da da pertuttu.

Novu cumentu :