Accueil
Envoyer à un ami
Version imprimable
Partager

Koh-Lanta : Raconti è fole di l'isula persa vol.2

Quessa sì chì ghjè una prova di quelle !
Anu mandatu una banda di meze cazzole nant’à un pezzerellu d’isulaccia persa per vede s’elli a si fàcenu à tene u colpu è firmà à pocu pressu in vita. Un percorsu d’erdiàvule per i cuncurrenti è un bellu carciu in culu à chì vince u ghjocu.



Koh-Lanta : Raconti è fole di l'isula persa vol.2
Anu sceltu u pezzu più gattivu è selvàticu di u so Imperu. L’ambizione di a Pruduzzione è di u Guvernu hè di ralegrà è rassigurà i so sugetti nant’à a so cundizione mìsera fènduli vede à sinu à induv’ella pò andà a dicadenza umana. È cusì anu mandatu una banda di cazzi vestuti à u provu di una vita infernale. Sopr’à locu ùn ci sò ch’è vechji è flicchi, una tràppula senza nome.

Eppuru à guardallu cusì u paisagiu pare bellu. U Creatore hà pigliatu u so tempu è s’hè appiegatu da veru… Ma hè tutta rupaccia avvilinata sottu à u papier-cadeau ! Si sfòndanu muri è casali ancu in piena cità chì mancu in Gazà, basta una libicciata per chì u mare si possi manghjà terra à fanne u ripastiu di a so vita. A strada principale chì face a leia trà e duie cità più impurtante si ne fala tutta tutta, ospidali pochi o micca. Basta un’acquata à caccià lume inghjilocu, i capitribbù sò i listessi dipoi seculi è nimu i caccia fora postu ch’elli sò elli à nutrisce a ghjente à granone. Sò propiu cundizioni pèssime…

I scrianzati di ceppu lucale, chì pratecanu sempre a lingua di u locu sò quant’è l’indiani, chjosi in una riserva à manghjà e caccauette lampate da i turisti meravigliati di scopre sta riserva naturale di vacanze, cum’elli a chjàmanu l’abitanti stessi di l’isula.

U castigu finale : À l’èpica di a stagione più calda è fastidiosa a produzzione hà privistu di mandà truppe di pumataghji scatinati in vacanze. A prova murtale… Ci vole à avè u stòmacu da veru per resiste in questa a tupaghjola…

Cumu a chjàmanu digià l’emissione ? KOH-RSIKA ? Ah iè…

Koh-Lanta : Raconti è fole di l'isula persa vol.2

u 29 di Ghjenaghju 2009
Ussamà Ben Lazezu



1.mandatu da zisì u 29/01/2009 16:41
i cuncurrenti ùn si chjamanu "funziunarii" ?

2.mandatu da Culomba u 30/01/2009 19:53

Sò miraculi, e risolze di l'essare umanu per resiste, o u so masuchisimu : u fattu si stà chì i cuncurrenti, malgratu i spaventi ch'elli patenu, UN VOLENU PIU LASCIA L'ISULA DOPU A U GHJOCU! Sò miraculi....

3.mandatu da altore u 30/01/2009 21:15
o culomba ùn partenu più ch'anu digià ghjucatu à Kho-ntinente. ghjè assai peghju!!!

Novu cumentu :