Accueil
Envoyer à un ami
Version imprimable
Partager

L'affare Baptiste Giabiconi

L'ultimu dibattitu chì face un sterminiu nant'à e rete suciale ùn hè nè u Padduc, nè u prucessu Orsoni, nè u novu record di disimpiegu ma... l'ultimu clip di Baptiste Giabiconi chì hà fattu una ripresa di "Sinfunia nustrale".



À chè si ricunnosce un Corsu mudernu ? Si sterpa in discussione nant'à Facebook à ùn finisce più. Sta volta u sugettu hè l'ultima ripresa (in corsu) di Baptiste Giabiconi.

Ma chì si passa ?

L'omu di u scandalu

L'omu chì hà fattu parlà d'ellu hè dunque Baptiste Giabiconi. S'era fattu cunnosce per a so carriera di "top mudellu", ma dinù per avè surtitu una cacciata ind'è Cauet.

Interrugatu à a dumanda "quel est l'hymne corse", risponde "Vengu versu tè".

Bon, hè vera, u tippu (chì hà campatu in Marseglia) esagereghja appena. Ma a vera surpresa, hè ch'ellu cunnosca sta canzona di u gruppu L'Albinu, nò ?


U clip scandalosu

Dunque, Baptiste Giabiconi s'hè decisu à cantà in corsu. A canzona scelta serà "Sinfunia nustrale" di Ghjuvancarlu Papi, arregistrata cun Canta u Populu Corsu


Ella stessa hè una ripresa di u gruppu irlandese The Wolfe Tones, chjamata "Celtic Symphony" :


È dunque eccu a ripresa giabicunista :


Riazzioni 1 : quelli chì sò in crisa nera

A nutizia cunnisciuta, a twitosfera nustrale hà cumminciatu à mandà i so scuds.



È e prime magagne...


Riazzione 2 : quelli chì sò in crisa contr'à quelli chì sò in crisa

Baptiste Giabiconi hà massacratu una canzona corsa ? Iè ma feranu megliu quelli chì u criticheghjanu ? Eccu ciò chì certi difendenu.

Cuscenza, u web giurnale di a Ghjuventù Indipendentista parla di "sindroma giabiconi" è s'interrucheghja : "Eppò, voi chì u criticate… Site veramente sicuri ch'è vo u parlate megliu chè ellu, u corsu ?"



Riazzione 3 : ùn si pò più dì nunda - on peupu rien dire

Altra riazzione spartuta nant'à e rete suciale sta dumenicata : "euh và bè, ùn si pò dì nunda ?". Vene in risposta à a riazzione 2.

Variante : "anch'eiu strappu u corsu, è mi futtu di Giabiconi, ti và ?"

Per elli, a ripresa di Giabiconi li piace pocu, è sò azezi d'ùn avè u dirittu d'esse azezi.


E rete suciale, l'ultimu locu per tazzassi

U casu di u "Giabiconigate" hè tippicu di u veru corsu di u 21esimu seculu. Ci vole à crede ch'ellu ci piace abbastanza di stirpassi in dibattiti à ùn più finì nant'à Facebook è Twitter (ma hè difficiule di fà megliu ch'è l'affare di u cane Whisky, a cascia à i culori di l'ACA in tribuna Petrignani ghjunghje in segonda pusizione).

Pè u dibattitu nant'à u Padduc, l'ecunumia, u spusessu fundiariu o a manumessa di u banditisimu nant'à a sucetà corsa, aspetteremu torna appena.

Eppo hè vera ch'ellu ferma u raportu cumplessu ch'è no avemu à a lingua corsa. Si sente di menu in menu in carrughju, ci vergugnemu di parlalla è di fà i sbaglii, è critichemu à quelli chì a parlanu ("ùn ci vole micca à dì cusì...").

È purtantu, s'è no a vulemu veramente salvà sta lingua, ci vulerà bè à cummincià à parlalla... è dunque à fà i sbagli.

Ci ne surteremu un ghjornu ?

L'affare Baptiste Giabiconi

u 1mu di Ghjugnu 2015



1.mandatu da evviva battì u 02/06/2015 08:49
ùn simu ancu pronti à sente a nostra lingua in ogni locu : in "un prophète" di Audiard, ci hè statu u scandalu è puru ci sò scene d'antulugia, per Acquaviva in "the voice" listessu affare..tuttu ciò chì hè fattu in lingua corsa attraversu i media naziunali ùn ci và!!! intantu quì inde noi a lingua more, perchè chì a mansa di carnavali ch'è no' simu ci piace à SFRANCISÀ è à pensà chì solu noi simu in capacità di parlà la quand'ella ci piace.....ciò chì hè falzu d'altronde!!!! perchè chì sò pochi quelli chì a cunnoscenu....

2.mandatu da andria u 02/06/2015 11:35
Ghjà chì l'originali dà u vomitu...

3.mandatu da andria u 02/06/2015 11:35
Ghjà chì l'originali dà u vomitu...

4.mandatu da francescu u 02/06/2015 13:52
simu cusi noi altri corsi, ci piace à tazzacci per nunda. in tantu...

5.mandatu da keep calm u 02/06/2015 13:58
hà raghjò "evviva batti". ùn suppurtemu di vede à l'altri parlà corsu

chi devenu dì l'inglesi quand'elli sentenu i francesi massacrà a so lingua ?

6.mandatu da u frullu u 03/06/2015 06:58
parlemu , cantemu,n'hé restara sempre qualcosa
ancu s'ellu hé giabiconi

7.mandatu da luciuccia u 03/06/2015 18:14 (da un teleffuninu)
A lingua corsa hè in periculu... Iè ci vole à parlà e à parlà bè, mà criticà quelli chì facenu sbaglii hà da finisce pa dà vergogna à tutti !

8.mandatu da gengis-cane u 03/06/2015 18:28
1 luciuccia
Un capiscu micca tutta sta rabbia

In tantu, ghjunghjenu 5000 pinzuti a l'annu, l'economia un esiste micca, a sucetà corsa si sprufonda....

Ma hè peghjju stu zitellu chi canta corsu

9.mandatu da Tom Simeoni Sawyer u 03/06/2015 18:53
L'affare hè chì, quelli chì anu criticatu Giabiconi (cume mè), ùn l'anu fattu per a so prununzia, ma per tuttu u significatu chì ci hè daretu. Un gruppu cume Canta chì si sprufonda inde u spiritu ch'elli cumbattianu nanzu...
Tandu quelli vechji cucchi di Canta si ghjucavanu di quelli "sumeri castrati" "chì cantanu tuttu l'estate" per piglià soldi, è avà ne facenu prumuzione.
Quì ghjè u patrimoniu francese chì s'arricchisce d'una pruduzzione in unu di so patuà.
Sò d'accunsentu di rende populare a lingua à ogni livellu musicale è di a sucetà. Ma serà a bona manera ? Ci ne serà una di fà la cù qualità ?
À mè mi pare chì quelli sgaiuffi di Corsica Sound eranu nantu à un bellu chjassu fendu a bo di Mafiosa. È forse ci ne serà d'altri...

10.mandatu da Corsicaturchina u 03/06/2015 19:12 (da un teleffuninu)
A me mi face piacè chi i furesteri parlanu corsu , preferiscu què che una canzone francese , un'''' c''''è male

11.mandatu da François 1er u 03/06/2015 20:07 (da un teleffuninu)
S''avia da fa una critica serebbi chi u clips video u va micca cu a canzona 😉

12.mandatu da Corcidelludiguagnenativupeliguagnesusosanguaversatu u 03/06/2015 20:27 (da un teleffuninu)
Hè megliu ch''è l''uriginale...
Hai a raggiò o Luciuccia, di sente criticà sempri a me mi da u vòmitu.

13.mandatu da tont''''e finu u 04/06/2015 05:38
"Listessu maghju".... quellu di i chapiteaux dusmaine ?
sta canzunaccia ùn vale manc' una baioca, for' di a cuntribuzione di u topu mudellu
U so clip impeghjurisce pocu l'innu uffiziale di a tonfia briaca nustrale.

Maguy Nadia Foot

14.mandatu da Nanettu u 05/06/2015 14:31
Eccu una lingua viva, quella ch' ognunu vole parlà è cantà.

Novu cumentu :


Seguitateci nant'à Facebook


L'articuli

Abbunatevi à a newsletter

Circà nant'à A Piazzetta