Accueil
Envoyer à un ami
Version imprimable
Partager

L'eletti corsi, più forti ch'è Bokassa

Sò parechji i merri o cunsiglieri generali corsi, à esse eletti cun 80, 90 o 100% di i voti, senza uppusizione nè dibattitu... è ùn stona à nimu. Ci hè un prublema nò ?



L'eletti corsi, più forti ch'è Bokassa
U situ Slate avia surtitu u top 10 des dictateurs les mieux élus du monde. Ci si trovanu parechji capimachja africani cum'è Bouteflika (90,2%), i presidenti di u Burundi (91,6%), di u Rwanda (93%), di a Ghinea (95,4%) o di Djibouti (100% di i voti !).

I paesi di l'anziana URSS ùn sò micca male non più : in Uzbekistan (88,1%), Azerbaïdjan (88,7%), Turkménistan (89,2%) o u Kazakhstan (91,1%) i dirigenti facenu tòmbula.

Di siguru, ùn si pò micca apparagunà a situazione in sti paesi induve ùn ci hè nè uppusizione, nè demucrazia, nè media lìberi, cù a Corsica.

Ma semu d'accordu : ùn hè micca perchè esistenu l'elezzioni ch'ellu ci hè una vera demucrazia. Eppò, quand'ellu si face più di 80% di i voti, hè ch'ellu ci hè un prublema, nò ?

Felicitemu dunque à Marcel Francisci, elettu cun 100% di i voti in u cantone di Zìcavu, senza nisuna uppusizione. Bravu ! Hè megliu ch'è Mugabé è Gbagbo. Ange-Pierre Vivoni riesce à fanne altr'è tantu.

À l'ultime elezzioni municipali, truvemu parechji risultati degni d'un Mobutu :
  • Stéphanie Grimaldi ghjunghje à 82% à A Porta.
  • Fanfan Vendasi 83% in Furiani.
  • Jérôme Polverini è Nicolas Alfonsi più di 85% in i so paesi.
  • Antoine Giorgi face un bellu 95% in Serra di Ferru.
  • Marcel Francisci (torna !) è Fanfan Mosconi in Conca anu francatu i 98% di i voti.
  • Dumènicu Domarchi in Sant'Andria di u Cutone ghjunghjia à 100%...

À cantu à questi quì, Paul Giacobbi (76% in Venacu), Paul Natali (76% in U Borgu) o Ange Santini (72%) parenu picculi amatori di a pulitica.

Face una bella stonda chì sti risultati ùn stonanu più à nimu. Serà perchè seranu cusì bravi ? O veramente forti ? Serà pussibule un paese induve tuttu u mondu pensa a listessa cosa ? Quantu sò e cumune impurtante, à più di 2000 elettori, induve ùn ci hè nisuna uppusizione ? Ùn hè micca sigura chì u tale "consensus" sia bonu pè a demucrazia.

Ma durmite tranquilli, tuttu và bè in Corsica, a demucrazia funziuneghja bè ! Quessa ùn hè pronta à smarisce...

Pudete verificà nant'à u situ elections-corse.com

u 4 d'Aprile 2011
U Sgaiuffu



1.mandatu da biutiful south u 04/04/2011 00:47
Francisci hè un tippu periculosu, vole fà di a Corsica un gigante burdellu à colpi di casino.
e so campagne e face à colpi di centinaie d'euros.

a vi dicu, l'avemu da rigretà u clanu di i Rocca Serra.....

2.mandatu da ANTO u 04/04/2011 09:01
Senza cuntà chi facenu travaglià i mercanti di frigo e di cucinare !Duv'hè passata a libertà ch'ognunu averebbe avè !

3.mandatu da FDJ u 04/04/2011 09:50
Mà indè i so "Casino" si vince à 100% o assai di menu...

4.mandatu da estrimei u 04/04/2011 10:47
ha capita chi sti percentualli ponnu impenserì , ma u rispunsevulle di sta situazione he a "démocratie française " :
ha vulsutu da forza a l'ellettu (he megli'a scumbatte incu un omu che 'ncu u populu) e per quessa nu i so calculli un piglia piu i voti bianchi ,. di stu fattu quelli chi vutavanu biancu un vanu piu a vutà.
di stu fattu quandu un candiatu he solu, face 100% di " l' exprimés".

nu a so s'ellu i spende ,ma Francisci he di una famiglia ch'a " fattu " i soli .... e a pulitica .
so numerosi a cumprà e a vende a demucrazia .
quand'omu si vende un si face micca che vutà , si dà un schiaffu a a demucrazia

5.mandatu da Balaninu u 04/04/2011 10:52
U più forte hè Hyacinthe Mattei in Monticellu : 98,26 %.
Senza scurdassine di u "naziunalistu" Lionel Mortini in Belgudè : 96,08 %

6.mandatu da poker closce u 04/04/2011 11:06
"100% des votants ont tenté leur chance"...

O Francisci vai puru à fatti una partita di poker !

7.mandatu da Cercle aviation.. u 04/04/2011 12:09
Ghjè a prova ch'ellu si face tene dà i so paesani (ancu puru s'ellu hè natu in Londra..) ghjovanu, riccu, Taravese è figliolu di bona famiglia (famosa d'altronde..) ùn siate ghjelosi..

8.mandatu da ortograffia u 04/04/2011 12:15
o estrimè, scusa, ùn simu micca à u campiunatu di scrittura di u corsu ma ripigli spessu a ghjente, allora appena à tè : i solli o i soldi, ma micca i soli (plurale di u sole o di hè solu)

9.mandatu da estrimei u 04/04/2011 15:35
un ti scusà o ortograffia , ripiglià i sbaglii face avanzà a lingua .
so d'accunsentu ncu te , si dice i solli , a scrittura e a prununzia so in accordu.
a ringraziatti

10.mandatu da o i m é u 04/04/2011 18:14
a chi a soldi campa bé ,hé quellu chi un' n'hé a micca siné stà.L'elezzioné forsé servénu a d'aiutà a Povera gjienté? In dé noi ghié cusi;hé in altro a sapeté voi cio chi si passa? ci so paesi per sé francié sicuramenté cumé noi altri.IN Cu i so Francisi hé i so Vendasi no?

11.mandatu da picciaghjolu u 07/04/2011 15:04
josé pierre mozziconacci dinnù mi pare. 100% in ulmetu prupià.

12.mandatu da hassina Kwandu u 09/04/2011 09:03
hà a ragiò biutiful south, u più periculosu hè Francisci chì face ritirà u merre di Cuzzà è chì ùn guarda quant'ella costa una campagna. Ma puru ùn rigrettu micca à Rocca Serra, moltu più quand'ellu si vede ciò ch'ellu hà fattu di Purtivechju...

Novu cumentu :


Seguitateci nant'à Facebook


L'articuli

Abbunatevi à a newsletter

Circà nant'à A Piazzetta