Accueil
Envoyer à un ami
Version imprimable
Partager

L’etica pulitica di u socio-republicanisimu

« In Bastia, à chì ùn hà soldi, ùn ci stia » dicia u pruverbiu. Segnu di i tempi, dipoi quaranta anni di municipalità di manca, i disgraziati si sò integrati bè à a cummunità bastiaccia, à tal puntu chì sò di più in più numerosi è chì e parolle « assistenza » è « sulidarità » sò state ripigliate à sicutera in bocca à u mere. Mi sò dunque interrugatu nant’à l’intrecciu suciale è eletturale in Corsica…



U laziu è u “bling bling”

Ch’elli sò tranchji è laziosi i Corsi, quessa pò l’avemu intesa parechje volte. Cumu dicia quellu, « c’est une image d’Epinal ». Si dice sempre ch’elli sò amusciati incù u travagliu, u sforzu, u sudore… « À chì ùn ne hà, ùn ne magna / S’è tù voli a pulenda, vai à coglie a castagna », dicia Natale Rochiccioli. Ùn si dice dinù « laziu di travaglià, salta mi addossu » ! A ricchezza ùn dipende chè di l’individuu, nimu ùn la li pò rigalà. A suluzione hè u travagliu. Ma ancu a riturnella pinzuta si lagna : « travailler, c’est trop dur et voler, c’est pas beau… » ! Allora, chì fà ? Cumu fà quandu omu brama i sciali di u « bling bling » à l’usu Sarko rinighendu i strazii di u travagliu. In a sucetà di vicinanza duve no’simu, ci vole à fassi vede, per sente è azzicà l’invidia di l’altri è per fassi valè. Menu si stanta più s’accresce a ghjelusia.

Difficultà suciale è cunservatisimu

Tandu, pudemu pensà chì i Corsi si giressinu, in tempu d’elezzione, ver di u candidatu chì li permetterà d’empie a so panzetta di pomi è di buscà si dui pendini lucichenti. Quelli chì per u corpu vendenu l’anima, t’anu un ragiunamentu utilitarista. Quale hè chì li puderebbe fà u rimbeccu ? L’ideulugie di u 20u seculu rinculeghjanu è u penseru suciale, pare ch’ellu pigliessi a suprana. Sarkozy ùn hè statu elettu nant’à u tema di u travagliu : « travailler plus pour gagner plus » ? Segolène ùn dicia micca ch’ella vulia purtà u SMIG à 1500 € ? U risultatu di l’elezzione in Bastia è in particulare in Lupinu ci porta à interrugà ci nant’à e mutivazione di l’elettori. In sta cità(della), sò quelli chì sò u più tocchi da a miseria chì anu u più vutatu per u mere è via, à prò di u cunservatisimu. Cumu serà ?


L’aiutu suciale : da a vergogna è a respunsabilità ?

Parechji filosofi è religiosi anu riflettutu nant’à a quistione di a carità è di l’aiutu suciale. Ancu eiu diceraghju a meia, eh nò ! Ciò chì si pò rimarcà hè chì da Saint-Simon à Malthus, passendu per Tocqueville, tutti tutti, per falla à l’accorta, incalcanu nant’à l’umiliazione ch’omu pò sente ricevendu un aiutu o una carità publica. Disprezzu moltu più pisivu chì quì, ognunu a sà, s’è un tale o un tale tocca u RMI, un sceccu per a manghjusca o un antru aiutu di più di menu lecitu… Accantu à sta vergogna ch’omu pò avè, quandu si riceve un sceccu contr’à un votu, vene a quistione di a respunsabilità è di u rispettu. U pattu, trà u candidatu chì rende un serviziu è l’elettore, traduce u pocu di rispettu ch’ellu hà per u primu, per a Republica, per a demucrazia, è per u citadinu, da omu è da sughjettu. Nega a so capacità à esse. Ind’è listessa mossa, u citadinu baratta a so cuscenza pensendu chì l’altri paisani faranu listessa. « Cosa possu vince, à cortu andà, s’è sustengu à qualchissia chì hà pocu è micca a sperenza di vince ? ». Nisunu discorsu infiaratu ùn pò andà à l’incontru di stu ragiunamentu individualista à cortu andà. Tocca à l’altri candidati di piglià lu un contu !

U suciale « à l’usu corsu »…

Pigliendu l’altre liste à a risa parlendu di i soldi ch’ellu averia datu, sottu sottu, à unepochi di bastiacci in scambiu d’un votu, u primu aghjuntu cummunista dicia ch’ellu si trattava di santa sulidarità. « Cumu ricusà di dà dui soldi à qualchissia chì n’hà bisognu è chì strazia in fine di mese ? Ùn simu pò Corsi incù a manu tesa è u core apertu ? » Chì scumpientu ! Ci culpisce a generalisazione è a reduzione di l’identità à dui ritrattacci pigliati cusì male... Ma u nostru u rigore eticu è scentificu, ci porta à visticà più in fondu.

Per una sulidarità etica

À patti è cundizioni chì l’aiutu suciale fussi datu, in u rispettu di a dignità di e persone, fussi sustenutu da un prugettu suciale è ecunomicu chjaru, chì accumpagnessi micca a dipendenza di l’omi à un sistema clientelista ma l’emancipazione suciale è pulitica individuale è cullettiva, tandu sì ch’ellu hè ghjustu è bè. Invece, quandu l’argumentu suciale diventa una scusa, un pretestu à prò di a ripruduzione è di u sistema puliticu è di a miseria chì affonda l’omu quant’è u so paese, tandu a so ghjustificazione suciale si svanisce. Simu bellu luntanu da e virtù di « l’oziu corsu » mentuvatu da Ghjaseppu Maria Bonavita in u Pane azimu ! L’oziu oghjincu di certi diventa un viziu ragiunatu più chè una filusufia di a vita. L’astutu ùn hè più u travagliadore ma quellu chì a face à neguzià per u megliu u so votu. Saranu quessi i fundamenti di a demucrazia ?

Da u fatalisimu à a speranza ?

U naziunalisimu corsu s’hè custruitu contru à a maledizione d’Arrigo Bel Messere : « A Corsica non avrà mai bene ». Cusì, hà pussutu inghjennà una speranza in pettu à u fatalisimu sviluppatu da u clanu. A so riturnella, a cuniscimu : « È chì vulete fà in Corsica ? Avemu a diccia d’avè à Parigi chì ci lampa dui soldi. Tenimu li è stemu zitti. Aiò o zitè, hè meza bastunata ! ». Invece, u fundamentu di i primi hè l’affirmazione di a pussibilità di campà, hè a credenza acuta è chjuccuta in a Corsica, hè una scumessa nant’à e capacità di u populu corsu. Iè, dicenu i naziunalisti, si pò fà, si pò custruì, si pò travaglià in Corsica ! Ùn pare nunda ma hè tremendu. Hè simplice è pocu, ma attempu, ghjè assai. Hè quessu u so mottu. Ci cridimu in e nostre capacità à custruì una Corsica muderna ? A suluzione ùn vene nè da Parigi, nè da Bruxelles, nè mancu da Aiacciu o Bastia ma da ognunu è da tutti.

« Ghjuventù, ghjuventù, una volta eppò più » dice u pruverbiu ! Mi si pare chì cum’è a dicia Ghjacumu Fusina : « D’aspettà la cuccagna, à la ghjuventù ùn basta… » ! Tandu hè ora ch’è tù « metti e mani in pasta »…

u 23 di Marzu 2008
Ahmed Zumar



1.mandatu da oranginà u 23/03/2008 18:00
saria statu megliu appena più longu, no ?

;-)

2.mandatu da Corsica cola u 23/03/2008 18:50

O ORANGINÀ !

Sì fortissimu pè criticà tuttu ciò ch'elli facenu l'altri, ma fora di què chì faci tù di custruttivu ?!

Ùn sè micca soddisfatu, ma quale hè chì t'oblica à leghje ?!!?! Nimu, mi pare !!!

Quand'è tù vedi un ghjurnale, sia u compri sia micca, ma ùn sì micca tù chì decide di a linea edituriale nò !

Bastaranu i cumenti chì ùn portanu nulla di novu ! O o mancu chì a critica sia custruttiva...

Alè, o ORANGINÀ, ùn ti ne vogliu micca, chì forse t'avaranu scuzzulatu à pena troppu... !!!

3.mandatu da oranginà u 23/03/2008 18:57
mi mi mi chi u tippu s'annerba !!!

CI CAMPEMU !

è s'è tu andave à FATTI APPENA DI "SPORTU" pè decumpressà,no ?

MWAHAHAHAHA !

4.mandatu da mouss'or u 23/03/2008 19:50
à part ça oh Corsica Cola, tu stampes un peu ou pas en ce moment ?

pas trop on dirait.

5.mandatu da iomega u 24/03/2008 15:39
ùn sò micca d'accunsentu cun Sbanditu.

"U pattu, trà u candidatu chì rende un serviziu è l'elettore, traduce u pocu di rispettu ch'ellu hà per u primu, per a Republica, per a demucrazia, è per u citadinu, da omu è da sughjettu"

à noi ci piace di criticà u clanu, dicendu chi i so capimachja ùn rispettanu micca a demucrazia.

ma noi, naziunalisti, chi simu ? semu un clanu ancu noi ! cun menu mezi è menu impieghi à pruponi, ma semu un clanu.

u clanu hè dinù a sulidarità è l'aiutu. tutti sti disgraziati chi vanu à chere l'impieghi à a merria, chi sarianu s'elli campavanu in francia ? SDF !

ci vuleria à scambià u nostru discorsu un ghjornu o l'astru. u clanu hè tuttu cio ch'ellu ci hè di più corsu è di più mediterraniu. face 2000 anni chi u modu di campà corsu hè clanistu. hè a nostra manera di funziunà : a prova s'hè fatta quandu naziunalisti so ghjunti à l'affari : ùn anu fattu nunda di revuluziunariu.

allora, scambià per a mudernità ? per prupone cum'è u pro-francese Filoni in Aiacciu di dà l'impieghi cù un cuncorsu ? tandu allora saria a porta aperta à a francizazione di a sucetà.

disgraziatamente, i naziunalisti ùn anu micca abbastanza rinculu per avvedesi chi u clanu hè cio ch'ellu ci hè di più corsu. in un paese poveru è sottu sviluppatu, prutege, hè a securità. hè cio ch'elli dumandanu i corsi.

si un ghjornu ghjunghjemu à u putere, viderete chi ùn ci serà nunda di revuluziunariu di fattu, è feremu listessu.

u clanu ùn hè micca a francia, hè cio ch'ellu ci hè di più corsu...

6.mandatu da Sbanditu u 24/03/2008 18:15

Attenti à l'associu faciule naziunalisimu-tradiziunalisimu. U naziunalisimu corsu, u vecu cum'è un mezu d'emancipazione, di liberazione individuale è cullettiva, cum'è u feminisimu, l'eculugia, e mosse per i diritti cullettivi di i negri in America o di i monachi budisti à u Tibet.
Individuale, in pettu à certe strutture cum'è u clanu
Hè un mezu di liberazione cullettiva dinù perchè a ricunniscenza di u populu corsu inghjenna diritti è duvere civichi in più per i Corsi. Da a vittimisazione è a derespunsabilisazione, si passerebbe, à una respunsabilisazione d'ognunu.
U naziunalisimu serà un clanisimu? Sicura! Hè un periudu 'naturale'. Hè quistione di sulidarità. Ma s'è u naziunalisimu divente un sistema clanistu, hè ch'ellu perde, ch'ellu hè debbule. Senza ripiglià anziani motti, pensu chì per vince, ci vole à cunvince. GXCulioli, eri sera, dicia à u cuntrariu chì per vince, à i naziunalisti li tuccava à esse appena clanisti, à l'usu Renucci chì hà creatu 400 impieghi à a CAPA... Senza piglià sta strada, pensu chì oghje, tuttu puru tenendu un discorsu descrittivu chjaru nant'à a Corsica, ci vole à rassicurà a ghjente. I Corsi, per u più sò anziani è sò cunservatorii. Sò impenseriti dinù. Hè stu penseru chì ci vole à traduce in adesione per u naziunalisimu, micca in una paura di l'idee indipendentiste chì ferianu calà e so pensione. Più chè un risicu, u naziunalisimu deve esse un assicuranza!

Ripigliu u me filu... Dà l'impieghi senza cuncorsu, parenu fole? Induve si vede? In Corsica ! Ci sò particularità, particularisimu più belli chì ci tocca à sviluppà. U naziunalisimu deve esse un mudernisimu, un mudellu di rigore. Quale hè u dirigente naziunalista chì sarebbe pigliatu à u seriu s'ellu prumettia impieghii senza cuncorsi? Prima, hè quistione di credibilità. Secondu, hè quistione di pussibilità. L'impieghi, sò l'altri chì i tenenu. S'è Talamoni è Simeoni eranu elli in capu à a meria naziunalista di Bastia è ch'elli facianu cum'è a Zucca, sò i fundamenti di u naziunalisimu chì serianu scarpighjati. Nisunu li puderebbe pardunà. St'esempiu mi face pensà à u SCB. Quandu qualchì naziunalistu di u SCB hà sviatu, u rimproveru hè statu più forte in pettu à ellu, appuntu perchè raprisentava un ideale chì vole dà più chè piglià. I giovani anu avutu a ragiò d'esse cusì accaniti contr'à ellu. Ma u prublema ùn hè quellu di a persona ma di u sistema. In u 2001, quandu l'unione di l'uppusizione bastiaccia pudia piglià a meria, JGT dicia 'je n'en ai pas contre un homme mais contre un systeme'... In stu sensu, hà a ragiò. A trappula hè chì st'esigenza di prubità, per ch'ella fussi criduta, ci vole ch'ella fussi fattiva, in giru à sè. Hè quistione di credibilità.
Per compie, postu chì dici chì feremu listessu, mi permettu di dumandà ti, in amicizia, cosa cambierebbe?

7.mandatu da ribella u 24/03/2008 21:42
E di i corsi in CORSICA! D'accordu cù Sbanditu: emancipazione in tuttu!

8.mandatu da Mazzone u 25/03/2008 11:39
U clanisimu hè un fenomenu puru corsu, è aldilà si ritrova à u Meditarraniu. Mi scappa u nome di quellu chì parlava d'isomorfisimu mediterraneanu.
A mè ùn hè stu fenomenu chì mi disturba, ghjè a so forma sviata è negatrice per a dimucrazia : vale à dì u clientelisimu.
Hè què chì ci vole à cumbatte.

D'altronde, i naziunalisti sò un clanu, i sutenidori d u squeubeu è i "piazzettisti" ne formanu un antru.
Benvenuti ind'è i Corsi...

9.mandatu da ci vole à minà u 25/03/2008 16:14
hè vera !

cumu ci chjamemu noi ? piazzettisti ? piazzettinchi ? piazzettacci ? piazzettonauti ???

@ mazzone : forse serà Matvejevitch ? micca siguru

eiu diceraghju ancu chi in Corsica, omu hè obligatu di fà parte d'un clanu pè raggione di suciabilità è d'aiutu

10.mandatu da Sbanditu u 27/03/2008 19:24
Nant'à u clanisimu è u tribalisimu, pudete leghje "le temps des tribus" di Maffesoli. L'aghju principiatu. Hè propriu interessante è in leia incù i nostri capatoghji !

Novu cumentu :