Accueil
Envoyer à un ami
Version imprimable
Partager

Ma chì face a Corsica à a festa di l'Huma ?

A sapete ? A Corsica hè invitata à a Fête de l'Huma, sta dumenicata in La Courneuve. Ma perchè ?



Ma chì face a Corsica à a festa di l'Huma ?
A Corsica hè à l'onore quist'annu à a Fête de l'Huma, a festone pupulare organizata da u giurnale preferitu di Robert Hue. A festa di l'Huma, hè appena cum'è a Ghjurnate di Corti, ma cù i cummunisti è 600.000 visitori. Corse-Matin ci spieca chì sta volta a Corsica hè "imbasciatrice" di a festa.

Hè l'ATC chì organizeghja : stand di 150 m2, editori corsi, CCAS, Corsicatours, robba da manghja (ancu salciccia nustrale chinese è casgiu corsu di Sardegna ?), a SNCM è u PNRC.

I canterini ci seranu dinù. Dopu à Yannick Noah, Joan Baez è Nolwenn Leroy, Avril Lavigne è The Ting Tings, canterà... Jean Menconi. È ùn deccunemu mancu !

Bon, perchè micca. Ma francamente, perchè a Corsica à a Fête de l'Huma ? Eccu parechje piste di riflessione :

1. Perchè Dumenicu Bucchini hè fanaticu di Pif, è chì u giurnale cummunistu serà rilanciatu grazia à una suvvenzione di a CTC.

2. In fatti hè un'idea luminosa di Vanina Pieri pè sbarazzassi di Michel Stefani chì serà abandunatu in La Courneuve.

3. Perchè ci vole à fà cunnosce a Corsica à i pumataghji, ùn ci n'hè micca abbastanza.

4. Pè mantene a memoria di Georges Marchais, chì venia sempre
à passà e so vacanze in Corsica (arricurdatevi di a so frasa « J'ai dit à ma femme : Fais les valises, on rentre à Paris »).

5. Cù i nostri 35 000 precarii, i nostri poveri, i nostri impieghi di goffi pigliati à calci in culu da i patroni, i nostri disimpiegati, ùn avemu più ch'è a Fête de l'Huma cù a so bieraccia calda à 1€ per andà à imbriagacci. L'altri, vanu à fà a festa in Barcelona è in Bali.

6. In fatti, hè dinù pè abandunà Jean Menconi à La Courneuve.

7. Per fà cantà "Stracciu rossu" è "Bella Ciao" à André Lajoinie, Maxime Gremetz è Bernard Thibault.

8. Hè un cumplottu bolsceviccu di i sucialo-cummunisti cun Kim Jong-Il, Fidel Castro è Hugo Chavez pè piglià a Corsica grazia à l'aiutu di u KGB, di l'Armata Rossa è di i Chinesi (s'è vo a pensate veramente, hè forse tempu d'arrestà di fidighjà à Jean-Pierre Pernaut).



u 18 di Sittembre 2011
U Webmaestru



1.mandatu da GWM u 18/09/2011 12:05
ùn ci hè mancu più una merria cumunista in Corsica è avemu à Bucchini cum'è capimachja di l'Assemblea... l'ultimi cumunisti francesi campanu nant'à i soldi di i Corsi...

Anc'assai ch'ellu ci hè Paul Canarelli, l'araldu di u turisimu pupulare è à manu di tutti...

2.mandatu da paul potte u 18/09/2011 19:59
1) ch'ellu ùn sia per stumacà i francesi di vene in Corsica, cù e canzone di Menconi
2) s'ella ùn basta, Canarelli mustrerà i prezzi praticati à i Mortuli. Tandu anu da capisce, moltu più ch'ellu ùn hè micca in casa soia (u francese è Canarelli)
3) ch'ellu ùn sia per fà piacè à Paul Antoine Luciani, agiuntu di Renucci in Aiacciu, in listessa municipalità chè Vanina Pieri...
4) ch'ellu ùn sia per fà piacè dinù à Melenchon chì hè contru à a lingua corsa
5) basteria ch'ellu ùn sia per aiutà Giacobbi à e legislative, cù i voti cumunisti à u secondu giru
In cunclusione, soldi ghjetti chì pudianu ghjuvà quì... per aiutà e fiere paisane è tutti quelli chì cercanu à fà qualcosa in a Corsica di u disertu.
NB: l'Agriate ùn sò mai state un disertu. Parlu quì di l'internu...

3.mandatu da assezzuatu u 18/09/2011 22:06
JEAN MENCONI : l'addisperu di a musica, l'anti mozart, u cuntrariu di l'armunia, a putenza di e capre, u cantu di l'impiccatu , a voce di e e pelle (e vecchje pelle) , l'anti groove, u sbonda ghitarra , ohiiiméééééé!!!!!!!!!!!!!!!!!!!!!

4.mandatu da J G u 19/09/2011 07:00

a sabiede chi quist ' hanu chi vene a festa di l'humà s'ha da passà in corsica ? un appiate paura , i cumunisti un fraganu micca , ci so più periculosi che elli pe u populu corsu ! .......Melanchon Si , Melanchon NO , qual'hé chi ci pô impedisce di parlà u corsu trà di noi in corsica o altrô ?.......

.Ci hanu amparatu indernu zenza rimorsu a mandà
A nostra lingua a caternu , ci vulianu forzà
A piglia in sempiternu , u francese pé parlà
ie mà
a radica pigla forza , é hanu voglia chi fà
Di a nostra lingua corsa , un ci ne pudimu scordà
Cantemula tutti in forza trullalleru é trullallà

O tù chi corsu si natu e chi corsu voli stà
D'èssè corsu un hé peccatu mai un ti rinegà
ritrova u to parlatu , ritrova u to pensà .

5.mandatu da barbebleue u 19/09/2011 10:50
andà à a "Fête de L'HUMA" cun Canarelli, l'amicu di diritta di i più ricchi di stu mondu ?

j'en ai rêvé, l'ATC l'a fait...

6.mandatu da ANTO u 19/09/2011 15:49
Vècu chi ci so chi so ghjalosi !

7.mandatu da azzezu u 19/09/2011 16:47
melanchon: umanistu spagnolu pedineru mitterandistu muratore mancinu

8.mandatu da Pateca : Verde fora è rossu nentru u 19/09/2011 22:30
Pè fà piacè a "Testa Mora è fiore Rossu" ??

9.mandatu da adisperatadonnadicasa u 20/09/2011 09:54
Daddy's John John si sarà piattatu cui ???

U cercu sempre !!!

10.mandatu da Alexferox u 20/09/2011 20:10
eccu

11.mandatu da Alexferox u 20/09/2011 20:16
E oghje nè u Corciu-Matin Djamel Debbouzze chi face a publicità di Murtoli in prima pagina e chi difende u s'amicacciu Paul Canarelli, chi seria a vittima nuciente di i sprupositi di una giurnalista di U Mondu ! Eccu l'omu chi sustene a "sucialista" Martine Aubry !
Senza parlà di a so cacciata parlandu di Murtoli : "je suis dans une petite bergerie au milieu du maquis, je me sens comme au bled ! je vis comme les Corses" Second'à mè si senteria di più nè u bled nè e Saline o in Lupinu... e tandu camperia cume i Corsi !!
Ma ci piglianu veramente per zucche !

12.mandatu da paul potte u 21/09/2011 12:51
Eccu chì si torna à parlà di u famosu Canarelli è di u duminiu di i Murtoli. Alexferox parla di Debbouzze chì si sente "in Corsica". CH'ellu ci dica quant'ellu hà pagatu a settimana in a so "petite bergerie"... Inqaunt'à mè ùn serà mancu appena u prezzu ch'ellu pagheria in u so bled... S'ellu cunnosce sempre u bled... Povera Corsica à l'affollu d'articuli "people".

13.mandatu da Alexferox u 21/09/2011 14:33
O Paul Potte so parlu di Debbouzze un hè micca per primura di i pippulaccii, l'averia capitu, ghje per di chi una volta di più basta un "connu" a pena cunisciutu per fà sbavacciullà i "ghjurnalisti" di u Torche-Matin e i sumeri nustrali !


14.mandatu da paul potte u 25/09/2011 20:15
o alexferox, avia capitu, ùn t'inchietà. Un "cunnacciu" chì si n'impippa di i corsi, chì paga à prezzu d'oru u so sughjornu ind'è Canarelli. E techjanu i corsi di "pipol", à l'ultima pagina di a pravda.

Novu cumentu :