Accueil
Envoyer à un ami
Version imprimable
Partager

Nant’à chì sbuccheranu st’indipendentismi?




L’esperienza ci dice chì sbuccà nant’à l’indipendenza hè d’una difficultà tremenda. Guardendu cinquant’anni in daretu, ci si pò dumandà sè l’indipendenza hè solu un affare pè i paesi povari. Pigliemu l’ultimi paesi diventati indipendenti: u Sud Soudan, u Timor Urientale, u Montenegru, ecc. U paese u più riccu (di modu rilativu) diventatu indipendente st’ultimi decenii hè stata a Republica Cecca, chì s’hè spiccata da a Sluvacchìa di modu assai cunsensuale.

Ma ci pudemu dumandà perchè... soprattuttu per territorii tali a Catalogna, u Paese bascu o a Scozzia:

1/ induve l’attaccamentu à u Statu nazione hè sprufundatu;
2/ chì sò ricchi;
3/ ch’anu digià un autunumia tamanta;
4/ è forse soprattuttu induve a classa pulitica è l’amministrazione territuriale anu dimustratu ch’elle eranu ancu capace di gestice megliu chè u Statu...
Nant’à chì sbuccheranu st’indipendentismi?

Eppuru una grande parte di a pupulazione dubbiteghja sempre di pettu à a suluzione a più radicale, è tandu a quistione hè di sapè s’ella deve stunà. Da una parte, i seculi di storia cumuna lascianu quantunque qualchì traccia. Vidimu chì, malgradu a crescita impressiunante di l’indipendentismu in Catalogna, c’hè sempre una parte assai maggiuritaria di a pupulazione, 64% secondu l’ultima inchiesta CEO, chì si sente più o menu spagnola. Da un altra parte, è soprattuttu, esiste di sicuru una paura di u risicu, una paura di perde troppu di pettu à ciò chì si vince.

A maggiurità di i Catalani ci crede à l’indipendenza?

Nant’à chì sbuccheranu st’indipendentismi?

Territorii cum’è u Paese bascu è a Scozzia, à u livellu finanziariu sò trattati bè da i Stati spagnolu è britannicu. Da u 78, u Paese bascu hà un sistema fiscale più favurevule cà quellu di l’altre regione spagnole, for’di a Navarra ch’hè ancu più favurizata. Cusì a so capacità di spesa per abitante hè in generale di 10 à 20% più alta cà a media. In quantu à u secondu, sin’ad avà ùn avia quasi micca puteri fiscali, ma ghjè u Statu britannicu ch’hà salvatu e so grande banche di a bancarotta. Si pò ancu dì chì e so dutazione l’anu permessa di mantene pulitiche assai più generose. Per esempiu, i costi di scrizzione à l’Università sò firmati i listessi, mentre ch’in Ingliterra l’anu multiplicati per trè.

L’effettu u più sicuru di e mubilizazione indipendentiste ughjinche hè d’influenzà l’altri partiti, regiunali è naziunali, di modu à accelerà u sviluppu di i puteri regiunali. L’esempiu di a Scozzia hè chjaru: ghjustu nanzi à u votu nant’à l’indipendenza, i trè grandi partiti inglesi anu prumessu prestu prestu un bellu sviluppu di i puteri fiscali scuzzesi... è c’hè digià una parte impurtante di l’impositu nant’à u rivenutu ch’hè stata trasferita à l’Assemblea di Scozzia. Di sicura, l’indipendentisti aspettanu di più, ma hè di difficiule di minimizà stu tippu di riforme.

Bisogna dinò à riflette sin’à induve si pò andà ind’è l’autunumia. Territorii cum’è i Feroè è a Gruinlandia sò piccule sucetà à parte di u Danimarcu, sia geugrafficamente, sia puliticamente, sia ecunumicamente, ecc. Intantu, ùn hè troppu difficiule per u Statu di lascialli tutta l’autunumia ch’elli volenu, soprattuttu chì finanzanu da per elli e so cumpetenze. D’altronde, u Danimarcu ricunnosce dapoi anni è anni chì quelli dui paesi anu drittu à l’autodeterminazione, è l’indipendenza hè veramente una perspettiva logica.

Ma quandu si tratta di un territoriu cuntinentale, l’affari sò più cumplessi, vistu ch’elli ci sò assai scambii di pupulazione, di prudutti, di servizii, etc. U casu u più tippicu hè quellu di a Flandra, induve i naziunalisti volenu chì ancu a securità suciale sia cumplettamente regiunalizata. Sarianu cusì tocchi i dritti suciali ch’ellu fermeria forse pocu affare di l’unità di a citadinanza naziunale. Eppuru, forse ch’in generale, sta forma di suluzione sarà favurizata rispettu à l’indipendenza. Imaginemu ch’in Catalogna u catalanu sia l’unica lingua ufficiale, mi si pare chì a Spagna firmeria a Spagna. Ma senza a Catalogna, a Spagna saria sempre a Spagna?



Nant’à chì sbuccheranu st’indipendentismi?

Per certi, sta via, chì si puderia definisce cum’è cunfederale, sumiglierà à u Sacru imperiu di u XVII seculu; per d’altri, sarà l’unica manera di mantene un quatru cumunu è soprattuttu una certa cuesione suciale. Perchè e secessione ùn sò micca solu istituziunale. Ci sò e secessione nascoste, quelle chì portenu e tensione e più pessime, per ùn dì l’odiu, trà gruppi suciali o culturali. È forse ch’ellu hè sempre megliu à cambià l’istituzioni chè di lascià sviluppassi l’odiu trà a ghjente.

l'11 di Dicembre 2014
Nant'à Twitter : @AndreFazi



1.mandatu da Ossau u 14/12/2014 07:20
ouais, et après tous nos peuples s'uniront et feront une fédération laquelle s'unira à d'autres fédérations pour former une confédération

faremu grande feste amichi

Novu cumentu :