Napoléon, u tonton di a pàtria

Hè più chè mai pèssima a situazione di a Corsica. A simana passata hè stata marcata una volta di più da un assassiniu è da Napuleone Bonaparte.

Viulenza, assassinii, droga, disimpiegu, speculazione : sò tanti è tanti i guai chì culpìscenu l’ìsula. In sti tempi di doppia campagna eletturale, Corsica Libera hà dunque decisu ghjovi di cumunicà nant’à u turìsimu.

Una cunferenza di stampa prulìfica incù una pruposta maiò da ritene : sfruttà di più a fiura di Napuleone chì pò esse « una porta d’entrata per fà cunnosce è valurizà à Pasquale Paoli ».

Hè dunque un' edea nova, moltu più chì in Aiacciu ùn ci avìanu ancu pensatu à dà u nome di Napuleone à 214 carrughji, à l'aeruporti, à l'avviò, à i battelli è à i caffè. Hè dinù difficiule di truvà publicazioni, fiure, tazze, calzette è bricchetti à l’effigia di l’Imperatore Francese.

In tantu, u Partitu Bunapartistu d'Aiacciu si hè sùbitu felicitatu di sta pruposta : "c'est génial !" hà tweettatu u membru attivu nant'à u minitel.

Ma sta pruposta ùn hè chè a prima tappa di un pianu stratègicu di sviluppu di u turìsimu culturale. S'anu da fà dinù :

. Posters di Bernard Bonnet per fà cunnosce è valurizà e pagliotte.
. Un DVD nant’à a vita di Marboeuf per fà cunnosce è valurizà i macellaghji è a carne corsa.
. Appiccicatoghji "Jean-Pierre Chevènement à u mare" per fà cunnosce è valurizà i naziunalisti musculati è bè di corpu.
. Cartuline pustale di u Comte de Vaux per fà cunnosce è valurizà i Corsi chì anu vintu in Pontenovu.
. Tiratappi "Henri Depeille per fà cunnosce è valurizà u Clos Sambucucciu.
. Ciavatte "Thierry Rolland" per fà cunnosce è valurizà u parcorsu di u FC Bastelicaccia in DH.
. Un bob "Angelo Rinaldi" per fà cunnosce è valurizà e puesie di Hubert Tempête.
. Zlippi « Christian Clavier » per fà cunnosce è valurizà l’intraprese BTP di Pumonte.
. Libretti nant’à u patrimoniu architetturale di Barchetta per fà cunnosce è valurizà u restu di a Corsica…

Alè, torna un sforzu chì ci simu basi !

u 31 di Marzu 2012

Figadel

Accueil

Envoyer à un ami

Version imprimable

1.mandatu da Jojo u 31/03/2012 16:17

Chi fumanu à Corsica Libera ?

2.mandatu da Pumata u 31/03/2012 16:34

perche micca una valurizazione di morand posta che no ci simu!

3.mandatu da Marbeufini u 31/03/2012 16:38

perche micca un poster di Jean-Guy Talamoni in "Policiers Magazine" ?

4.mandatu da Fan di Tancrède u 31/03/2012 16:45

ch'elli cummencinu pè "réhabiliter" a fiura di i clandestini è di i naziunalisti manghjoni chi ùn so micca qui per difendi i so interessi persunali e i so prugetti immobiliers.

n'est ce pas ?

5.mandatu da Prisoutte u 31/03/2012 16:59

c'era "femu a Corsica", Corsica Libera elli "sfacenu a Corsica"

bravo JEan Guy !

6.mandatu da nabulio u 31/03/2012 18:01

30000 français vomis sur nos cotes una cacciatta di nabulio alora un'era micca naziunalistu corsu?

7.mandatu da u miumese u 31/03/2012 18:33

Prupostu di fà cunosce i figatelli compri d'agostu per mette in valore i porci nustrali (ah nò, scusate, quessi sò chinesi...)

8.mandatu da U Palatinu u 31/03/2012 21:01

Sò stumacatu !
Simpliciamente stumacatu !
Ùn aghju parole, è ùn mi vogliu annerbà !

9.mandatu da U Palatinu u 31/03/2012 21:03

Leghjite què

Era u mio parè tandu.
Hè sempre u mio parè.
È ùn ne scambieraghju nant'à stu puntu !

10.mandatu da U Palatinu u 31/03/2012 21:04

Oghje vi vogliu parlà di Napoléon Bonaparte, è forze rimaracarete ch’ùn parlu micca di Napuleone Buonaparte, o di Napuliu Buonaparte, ma bè di Napoléon Bonaparte ; Napoléon Premier. Ùn hè un sbagliu meiu, a facciu apposta.
Ben ch’e stu sinistru persunaghju ùn tene, ancu di grazie, nisun ligame particulare incù l’attualità vera, mi paria necessariu di parlàvvine.

Perchè so prufundammente lazzu di sente in i cuntrasti, assucià a Corsica à stu persunaghju. Quante sò particulariamente lazzu di sente a ghjente, è certi ancu puru assai intelligente, lodàllu, cume s’ellu era statu qualchissia di bè.

Di sicuru, è senza negà e so qualità vere intellettuale è in a geopulitica chì li permettinu d’alzàssi à i più alti livelli di u cumandamentu, Napoléon Bonaparte fù per mè, è più ch’e tuttu, nanzu tuttu, un dittattore veru chì mettì in piazza un pudere persunnale più ch’e à bastanza autocraticu (cume s’e sta parola era stat invintata à postu per ellu), è chì per suddisfà a so vulintà persunale, feci a guerra à l’Auropa sana.
Stu « spiritone brigliante » era dinù un gran partigianu di a schjavitù, ch’ellu risturò in cio ch’ellu chjamava e « culunie », incù u curteghju di sfragellu chì ne seguitò. Ma a cosa ùn hè surprendente quandu si sà ch’e u « grand’omu » era dichjaratamente razzistu, postu chì cunsiderava ch’e l’omi ùn eranu iguali tra d’elli.
Fù cusì, è in parechji altri cadri, l’autore di monda accidii contr’à quelli ch’ùn avianu ch’e un pugnu per opponessi à ellu, o chì simpliciamente vulianu resiste à l’invasione di i so paesi.
In Francia, è in l’altri paesi piazzati sott’à a so vulintà, aldilà di i subissi di a so pulizza ingorda, a so cuscrizzione ubligatoria struggì litteralmente tutt’una generazione d’omi ghjovani arrulati di forza per un « serviziu militare » di dece anni (tandu era a durata legale) in e so guerre assassine.

Vuliu dinù dedicà stu fogliu à tutti sti Francesi chì ancu oghje l’ammiranu, per svelàlli ch’ellu era un persunaghju ingordu chì feci à bastanza morti, instaurò un sistema da u quale elli stessu ùn vulerianu micca cume sistema puliticu ughjincu, è chì, fra a cuscrizzione ubligatoria, è l’interdizzione di criticà, ùn era tantu un grand’umanistu.

Ellu fù à l’origine, direttamente o micca, di a morte di più d’un millione di personne.

In Corsica, i so principii di gestione eranu cusì simplici ch’e infami : garantisce u mantenimentu di i dui dipartimenti, garantisce ch’ell’ùn ci sia nisun Corsu in l’amministrazione, è garantisce ch’ell’ùn ci sia nisun scola superiore di tipu universitariu in Corsica, astringhjendu cusì i ghjovani Corsi à andà luntanu per fà i so studii, o, à u cuntrariu, à ùn fà nisun studii. Un veru visiunariu per l’emancipazione di u so populu !
In Corsica, più precisamente, ellu mandatò u generale Morand cume proconsule. Quessu quì, autenticu mostru ingordu di sangue, è spruvistu d’anima è di sentimi umani, fù d’una barbaria tale ch’ellu s’imbumbò, dopu à u so mandatu di dece anni, d’avè fattu tumbà almenu un Corsu à ghjornu, l’assassinu ! Feci subisce abuminazione reale à i ribelli chì sempre cuntinuavanu di sperà leghjitimamente in una Corsica indipendente, o, à u menu, libera di l’oppressione imperiale.
U peghju fù probabilmente a dipurtazione di tutti l’omi di u picculu paese d’Isulaccia di Fiumorbu tra 15 è 80 anni, in i carceri bughji, per castigàlli di u so onore di resistenti ! Ùn ci fù nisun sopravivvantu ! A traghjedia d’Isulaccia di Fiumorbu fù veramente degna di i peghji mumenti di u nazisimu, chì, à contu meiu, Napoléon Premier ùn vale micca megliu ch’e i nazì.
Morand avia tantu sulcatu e mente è l’atavisimu cullettivu corsu ch’e u so nome hè per u sempre, i l’anima di tutti i Corsi, sinonimu di l’inghjustizia è di a crudeltà.

Cusì, quandu vecu oghje ch’e, per assai Corsi, ci hè una vera venerazione, una culpevula idulatria per stu mostru sanguinariu ; quandu vecu tutte ste statue cusì bè piazzate, in lochi scelti di st’immondu boia ch’e era Napoléon Premier, nasce in mè un sintimu di rivolta è d’inghjustizia. È mi dumandu cumu hè ch’e un populu possa esse cusì annesicu ? Cumu sì pò tullerà una tale venerazione per un tale orcu ? Era un pocu cume s’e l’Allimagna ughjinca venerava à Hitler !

Un sintimu di lassitutina è di rivolta campa in mè in faccia à sta venerazione esacerbata ch’e risentenu oghje ancu assai troppu Corsi per st’infama persunaghju. Cumu sì pò, à un puntu simile, tene in sè una tale mentalità di culunisatu, d’asservitu, di schjavu ?

Certe volte, mi dicu ancu ch’e a Corsica ùn serà disgraziamente mai più indipendente, chì a maghjorità di i Corsi sò ghjente troppu stupidi chì si cumpiacenu in a so brutezza è a so inferiorità.

Napoléon Premier deve esse ricunisciutu, una volta per u sempre, per a Storia, per l’avvene, per cio ch’ellu era veramente.

11.mandatu da Farc (Fronte di l''''''''anziani regiunalisti corsi) u 01/04/2012 07:54

Beuhh !! Si bellu intullerante o Palatinu..

12.mandatu da U Palatinu u 01/04/2012 08:50

Tengu quantunque di precisà ch'e u longu testu scrittu quì sopra, ùn l'aghju scrittu eri, ma parechji mesi fà, nant'à u mio bloggu.
Ùn sò micca intullerante. Sò solu eiu, è vogliu esse d'accunsentu incù mè stessu solu. Sò propiu un omu di pace è d'apertura, è preferisceria da veru ch'e Corsica Libera rendessi ommagiu à Martin Luther King (per esempiu), piuttostu ch'e à Napoléon Premier.
Senza scurdàssi di tutte e personne di talentu ch'e avemu ind'è noi !

13.mandatu da Iena 78 u 01/04/2012 10:02

Di regula abbituati à l'analisi fini, custì quelli di a Piazzetta s'anu pigliatu l'accurtatoghju !
U testu l'aghju lettu sanu (ghjè nantu à http://www.corsicalibera.com) è li cuncedu chì u ragiunamentu si capisce : a pulitica turistica attuale ùn ci cunvene. Ci tocca dunque à truvà l'equilibrii nu a stagione (micca solu 2 mesi d'attività) è trà e regioni (liturale / internu). Per quessa abbisogna di sviluppà un turisimu di modu culturale.
È cumu fà vene a ghjente nantu à sughjorni duv'elli anu da scopre à Paoli, i rivuluziunarii corsi è tutta a nostra storia ricchissima, ma dinù u patrimoniu archittetturale quant'è immateriale (canti, tradizioni...), a nostra pruduzzione etc... ? Sfruttendu una persunalità cunnisciuta nu u mondu sanu...
Ùn si tratta di dì ch'ellu ghjera un tippu bè o ch'ellu ghjè statu sempre un patriottu corsu, l'affare hè bella più cumplicata, ma o ghjente ci site andati à l'Isula d'Elba ? C'hè un'ecunumia ingiru à una casa induv'ellu hè statu qualchì mese ! È nò, dà nomi di carrughji à l'enfant prodigue de la gloire ùn ne face micca una pulitica di prumuzione.
Perquessa sò d'accunsentu cù "i duri ".
A vera quistione chì ci vole à ponesi hè : cumu hè chì quelli chì sò à e manette ùn appiinu fattu nulla nu stu sensu ? Hè vera ghjè megliu u turisimu di e résidences secondaires è di i pumataghji...

14.mandatu da WATERL''EAU di san-ghjorghju u 01/04/2012 10:21

Tuttu stu cumbugliu pè ghjunghje é di chi a verità di sti fatti è di fà (eleturalisimu) a prumuzione di u turisimu sott'à scusa di "culturale" e di chi sempre pocu fà (90/95) si dicia sempre 'inno à u tuttu turisimu" bella manera di rinigà i so fundamentali , mà hè vera 2014 s'avvicina, è un vulemu forse "cuntrarià" i nostri BTP(atriotti)...

15.mandatu da Remember Paoli u 01/04/2012 11:10

Quandu chì in u listessu mumentu, Bayrou ghjunghje frescu frescu nantu à a tomba di u Babbu di a Patria.
Poveri à noi !

16.mandatu da Pseudo u 01/04/2012 14:18

Corsica Libera sò veramente à paghjolu...

17.mandatu da erba tabacca u 01/04/2012 16:46

chi fumanu à CL ?

18.mandatu da Dumenicu Cazzotti u 01/04/2012 17:01

Allora cusi i capizzoni di CL volenu turnà à scrive a storia e cercanu "le rôle positif de Napoléon" cume ci hé statu
"le rôle positif de la colonisation"

Quandu l'omi pulitichi rifacenu à storia, un hé micca bon segnu e in generale diventa n'importa che, a prova...

Lasciate a storia à i sturiani. Infine, à i veri sturiani...

19.mandatu da L'enfanprodiguedelagloiaaaareuh u 01/04/2012 17:41

Felicitazione o Palatinu. Nunda à aghjustà !

20.mandatu da Patanok1905 u 01/04/2012 17:48

« Le mouvement patriotique corse a entre-temps mûri et il est désormais en mesure de continuer à mobiliser le sentiment national à travers une grille de lecture plus fine »

So sbilicatu !

Ancu assai ch'aghju lettu st'articulu un primu d'aprile...

21.mandatu da campagnolu u 01/04/2012 18:05

Ogni muvimentu naziunalistu mette in valore u(i) persunnaggiu chi li pare u megliu raprisentà stu sintimu patrioticu...
U FN in Francia elli hanu à jeanne d'arc...
simu persi
CL ancu di più, aghjustate à què l'ultime pruposte per cio chi tiocca à l'educazione avite u solcu "patrioticu" di u muvimentu indipendentistu !

22.mandatu da KB u 01/04/2012 20:06

"Corsica Libera veut réhabiliter le général Morand"

"Corsica Libera veut réhabiliter Marbeuf"

"Corsica Libera veut réhabiliter la CFR"

"Jean-Guy Talamoni a rencontré Christia Clavier"

"Corsica Libera veut réhabiliter l'immobilier et le BTP"

ah non merde, ça c'est fait...

23.mandatu da Talavesu u 01/04/2012 20:14

Napulio u traditore di Paoli e di a Corsica.Vergogna

24.mandatu da antipaticu u 02/04/2012 01:16

si ne parla nant'à Mirvella, da spanzassi

http://mirvellagazetta.forumactif.org/t827-stumacheghju

25.mandatu da loris u 03/04/2012 11:15

http://genealogy.euweb.cz/bonapart/bonaparte2.html

26.mandatu da rogliano jean marie u 03/04/2012 14:47

chi vergogna!!!! prestu corsica libera annu da di chi simu frencesi!!!! simu belli... ferevinu megliu di penserissi di a morte di u nostre populu.

27.mandatu da L'enfanprodiguedelagloiaaaareuh u 03/04/2012 15:39

O Iéna 78, o Jean-Guy Talamoni !

28.mandatu da L'ochju di Moscou u 04/04/2012 08:08