Accueil
Envoyer à un ami
Version imprimable
Partager

PADDUC : U Fronte accoltu in Prefettura...

U tempu guarisce ogni male... Ma quantunque Stéphane Bouillon l'hà fatta à accittà di scuntrà u Fronte. U so purta voce? Michelle Salotti...



PADDUC : U Fronte accoltu in Prefettura...
U spiritu di u PADDUC

A redazzione di u PADDUC hè una cumpitenza acquista incù a lege di u 22 di ghjennaghju 2002, nant'à a Corsica. Hè cuncessa à a CTC di sviluppà e ligne maiò di u sviluppu di a Corsica. Và in u sensu di l'autunumia di l'isula, di a respunsabilisazione di l'eletti è di i citadini è di u ritiru di u Statu in fatti di definizione di e pulitiche publiche. U cuntrollu di legalità ferma a sola cumpetenza di u Statu rilativa à u PADDUC.

U cuntenutu di u PADDUC

Di e pruposte allistinate à buleghju in u PADDUC si ne parla assai. Di fatti, cum'è à e puce di a dumenica matina in Bastia, baterchji di tutte e mamme, ne truverete di sicuru. Cum'è sti tesori di a dumenica matina, stu PADDUC ùn vale mancu un ficu... Roba di sicuru scritta da un studiente pressatu di rende un toccu di duvere bling bling, micca apprufunditu, senza imaginazione, dissalivatu, bisugnosu,senza ne garbu ne ghjudiziu. Pare tuttu a vitraglia data à l'Indiani da i cinquistadori Spagnoli...

Una riturnella passatista

Lighjimu sempre listesse riturnelle anticogne nant'à l'ecunumia residenziale, duie parolle dinù nant'à a lingua è unepoche di cacciate quì è cullà : 320000 abitanti in u 2020, 5% di crescita... Postu chì contanu solu nant'à u turisimu, 5% di crescita significheghja di più di menu una crescita annuale di 20 à 30% di u turisimu! U redattore averà forse imbulighjatu a crescita di a cunsumazione di tizzone incù u rialzu di l'ecunumia?

U PADDUC: una fola dopu a tizzunata...

Più chè una longa cacciata, u PADDUC hè una fola da amusà u populu chì realisimu in stu cartulare ci n'hè pocu è micca. Quasi quasi, stu PADDUC puderia esse ricacciatu da e storie fantastiche d'Edgar Poe... Trà scrittu fantasticu, sunniacciu è surrealisimu, stu cartulare ghjè a versione corsa di Mission Impossible ! Irrealistu dunque, senza mancu cuntà nant'à u pesu di a crisa finanziaria, di u debbitu publicu è di modu più prusaicu, di u solitu ricusu dimucraticu di i Corsi, ùn ci hè paura ch'ellu venissi realizatu stu prugettu à prò di i vechji ritirati eurupei è d'una manata di prumutori puliticanti.

U votu di u PADDUC

In quantu à u votu di u PADDUC, venerà difficule assai. Ancu puru s'è l'esecutivu d'Ange Santni raminta a so leghjittimità eletturale, ùn sò micca maiuritari à l'Assemblea d Corsica!

Ma per sepellissi è per esse vinduta, a Corsica ùn hà micca aspettatu à stu PADDUC. Christian Clavier, a so casa, l'hà digià. Listessa per i vechji ritirati pinzuti, taliani, eurupei chì si buscanu dui sciali è un pezzu di benestà in Corsica.

S'ellu vene vutatu stu PADDUC, prima significherà l'adesione micca di i Corsi ma di i vutanti à stu prugettu è secondu, serà solu un ufficialisazione di a pulitica ecunomica ultraliberale sviluppata in Corsica dipoi 30 anni.

Prugressisimu prefetturale è elezzione territuriale

Infine, invece d'andà à pienghje in prefettura è di chere l'impegnu d'un pseudo Statu prutettore, ora hè di fà campà u dibattitu demucraticu, trà di noi... Ne seremu capaci? Di chì male saranu culpiti i Corsi per ch'elli vidissinu in u furesteru a medicina à u so male? U furesteru ùn hè micca un paceru! Tenimu lu in rispettu ma femu casu à ùn ripete u sbagliu di Sambucucciu chì avia chjamatu à i Genuvesi! Pocu imbrogliu nò, longu à 5 seculi? Allora pane è pernice, affari di casa ùn si ne dice! Lascemu u prifettu uccupà si di a pulizza è di a so carriera, per altru restu, i nostri capatoghji, arregulemu li in casa nostra. Ùn era quessa a lezziò tirata da l'esiliatu Guerrazzi, chì studiò a vita di Pasquale Paoli?

Attenti dinù à ùn micca sfruttà u PADDUC da pusiziunà si nant'à e liste di e territuriale 2010... Parenu discità si certi... Senza prugettu, senza idee, senza finezza, credenu chì quellu chì mughja u più forte serà u più altu nant'à a lista... "À chì ùn si misura ùn dura..." Hè un antra lezziò, tirata quessa da seculi di saviezza pupulare.

u 28 d'Utrovi 2008
Ahmed Zumar



1.mandatu da Blaccu Bloccu u 29/10/2008 09:35
Mà chi tippu 'ssu Zumar !

2.mandatu da Blaccu Bloccu u 29/10/2008 19:26
Ahmed Zumar hè un bastimentu
Ch'aspetta u ventu...
Ch'aspetta u venu...
Ahmed Zumar hè un bastimentu
Ch'aspetta u ventu per navigà

Novu cumentu :


Seguitateci nant'à Facebook


L'articuli

Abbunatevi à a newsletter

Circà nant'à A Piazzetta