Accueil
Envoyer à un ami
Version imprimable
Partager

Padduc è cumbrìncule à a CTC

A nutizia hè cascata: u Padduc ùn serà micca discutatu à l’assemblea. Chì bella nutizia! È perchè?



Padduc è cumbrìncule à a CTC
Di manera ufficiale, segond’à u putente Anghjulu Santini, l’UMP l’anu cacciatu di a discussione perchè sapianu ch’ellu era periculosu è ch’elli risicavanu una bella disfatta pè u votu.

À mè, mi basta di sente què per esse stumacatu : quand’ellu si vede ghjunghje a disfatta, scappemu à corri corri. Bella prova di curagiu, sarete d’accunsentu.

Ma l’affare ùn hè cusì simplice, è ùn si compie quì.

Pè tutti quelli chì si feliciteghjanu di sta ritirata di u Padduc, v’aghju da amparà parechje cose chì v’anu da rende menu beati.

Prima, ci vole à ramintà chì l’UMP (Unione di i Minchjosi Pulitichi) ùn hà una vera maiurità à l’assemblea. Anu dunque una maiurità rilativa, vale à dì ch’ellu ci hè di più upunenti chè cunsiglieri di l’UMP à l’assemblea, ma chì a maiurità hè stata scelta à traversu un votu, è da… i naziunalisti stessi, in 2004. (Iè, certi ùn lu volenu sente, ma ghjè cusì : d’una certa manera, i naziunalisti anu vutatu pè u Padduc cinqu’anni fà, mettendu Camigliù è i s’amichi in piazza).

Dunque l’UMP ùn hè veramente maiuritariu. È in faccia, ci sò l’upunenti : divisi, smizati, ci sò parechji gruppi. U più maiò ghjè quellu di u PRG di Giacobbi è Zuccarelli. Ci hè dinù tanti paesi strangeri… Scusate. Ci hè dinù u gruppu di Renucci, « Corse Social Démocrate », u gruppu di Ghjuvan Claudiu Guazzelli « Corse Nouvelle ». Senza scurdassi di i Cumunisti di u PCF di Bucchini. È ci sò i naziunalisti, l’anzianu gruppu « Unione Naziunale », oghje spiccatu in dui gruppi, Corsica Libera è PNC/Chjama.

Ci vole à seguità !

Allora, l’upunenti, sò ufficialamente, tutti, tutti contr’à u Padduc. E ragione ponu scambià d’un gruppu à l’altru, l’averete capita.

Pè i naziunalisti, di tutti i partiti, ùn c’hè prublema, ùn c’hè manera di discutà, u Padduc hè un prugettu à lampà in mare.
Pè quelli di manca, ch’elli sianu Renucci o Bucchini, listess’affare, u Padduc deve esse righjittatu. Ritruvemu a stessa pusizione ind’è Guazzelli è i so partighjani.

Ci resta u PRG. Ah, u “béhèrjé” ! Caru partitu di u “clan”, cum’elli ci piacenu.
Ci vole à ramintavvi chì l’eletti radicali ùn si sò adduniti in u listessu locu chì l’altri upunenti.
Ma perchè ?
A v’aghju da dì … Questi eletti ùn volenu micca chì u PADDUC ùn sia micca accettatu. Iè avete capitu.
Bon, hè abbastanza cumplicatu l’affare.
U PRG chì deverebbe esse a prima forza di manca in Corsica (ahahaha…) hà scopi assai più impurtanti ch’un picculu PADDUC.

Sapemu ancu chì u nome di Popaul hè statu datu pè esse ministru di u guvernu Sarko/Fillon... ma ùn hè accaduta. Vale quantunque à dì ch'elli sò più chè vicini UMP è PRG corsu... Qualchi annu fà, ùn si sarebbe detta...

Senza scurdassi chì PRG è UMP corsi si sò avvicinati, incù a paura cumuna di una presa di putere da i naziunalisti muderati. Sarebbe, infine, impussibule à pensà, chì Giacobbi, ministru novu, vutessi contr’à un prugettu Sarkozianu sputicu.

Allora, per ùn annerbà i so novi amichi di diritta, i nostri cumpagni radicali (di manca) anu prupostu chì u prugettu ùn sia dibattutu. Ghjè a ragione di a so addunita for’di l’assemblea.

Ma… perchè ?

Ideologicamente, ùn volenu tagliassi di e so idee storiche è di l’elettori : s’è u PADDUC hè vutatu, saranu ubligati di vutà contr’à u prugettu, ancu s’è li pizzica u core à fallu.
Ma vistu altrimente, sarebbe un culpacciu à i so novi amichi di a maiurità, è lascerebbe a piazza à i naziunalisti muderati è altre suluzione alternative.

A sola suluzione chì li pare bona hè dunque di scappà. Per esse in pusizione cunfurtevule incù elli stessi è incù a dritta, ùn ci vulia à vutà. Ghjè ciò chì s’hè passatu, ghjè ciò ch’elli anu pruvatu di fà sapè, è Santini l’hà capita subitu subitu.

Sta cumbotte di i falzacci frà ciò ch’è no chjamemu maiurità è u gruppu d’upusizione u più maiò palesa chì in Corsica, a pulitica ùn hè un’affare d’idee.

S’è, per tamanta sfurtuna (è accaderà!), l’unu di sti dui gruppi si trova à u capu di l’assemblea l’annu chì vene, avemu da esse surpresi, assai surpresi.
Sopr’à tuttu incù a mudificazione di l’elezzione chì hè stata vutata pocu ghjorni fà à l’assemblea di Francia, chì dà un “bonus” à a squadra vitturiosa di 9 piazze... Ci volenu veramente piglià per conni.
Allora, ch’ella sia detta, u PADDUC ùn sarà vutatu, ma hè assai luntanu d’esse mortu, è facenu tuttu, tuttu tuttu, per ch’ellu sia adupratu l’annu chì vene o da quì à pocu.
Dibattiti d’idee, ùn ci n’hè più. Ci piglianu pè baulli, è ne simu cuntenti.

Simu « mal’barrati »… Cum’elli dicenu.

u 24 di Ghjugnu 2009
U lonzu balaninu



1.mandatu da estrimei u 24/06/2009 07:14
Simu « mal’barrati »… Cum’elli dicenu.
U lonzu balaninu

per parlà cusi , un ci po esse che u figliolu di u conte di Cala Purcina-chi u babbu di corsu 'un ne vole sente l'omacu -!
Senza scurdassi chì PRG è UMP corsi si sò avvicinati, incù a paura cumuna di una presa di putere da i naziunalisti muderati.
nant'a stu puntu peura 'un ne hanu ! a sola peura ch'elli hanu , e quella di ghjunghje a fà una lista induve i manghjoni-d'ogni cantu- sianu eletti; he 'ncu i manghjoni ch'ellu si "guverna" senza strazia !
l'ump e u mrg si so avvicinati?
so sempre stati belli strinti! subbitu dopu l'ultima guerra Rocca Serra -chi 'nu u bisognu si ne era andatu 'nde i radicali - scumbattianu dicia insemme.
aprite l'occhji , a maggiurità di l'elettori di Zuccarelli so diritta, he listessa per quella di Renucci , N. Alfonsi ha fattu a so carriera in appughjendusi nantu a diritta.
e oghje, ch'he oghje , l'assemblea di Corsica ha fattu so ch'ella vulia per via chi u prg un l'andava mai contru.
arricurdatevi u conte di Cala Purcina a l'ultime elezzione di u presidente di l'assemblea , un sapia piu s'ellu cullava o s'ellu fallava : u calcullu era statu fattu chi Zuccarelli seria statu presidente di l'assemblea.
he vera chi st'assemblea un sente di nunda , ma 'ncu Zuccarelli a u cummandu seria stata assai , assai peghju.

2.mandatu da estrimei u 24/06/2009 07:17
scusate ,mi tocca a currege per che vo posside capì .
so sempre stati belli strinti! subbitu dopu l'ultima guerra Rocca Serra -chi 'nu u bisognu si ne era andatu 'nde i radicali - scumbattianu dicia insemme.
vulia scrive:
so sempre stati belli strinti! subbitu dopu l'ultima guerra Giacobbi e Rocca Serra -chi 'nu u bisognu si ne era andatu 'nde i radicali - scumbattianu dicia insemme.

Novu cumentu :


Seguitateci nant'à Facebook


L'articuli

Abbunatevi à a newsletter

Circà nant'à A Piazzetta