Accueil
Envoyer à un ami
Version imprimable
Partager

Parlemu Corsu : l'intervenzione di Pierre-Laurent Santelli

Eccu u testu di l'intervenzione ch'ellu hà fattu Pierre-Laurent Santelli, in nome di l'associ di difesa di l'ambiu, à a serata di u cullettivu Parlemu Corsu in Aiacciu u 24 di maghju. Hè Dumenicu Gambini chì l'hà scrittu. Forse, u mumentu u più cumuvente di a manifestazione.



Ritrattu : instagram di Girandulata http://instagram.com/girandulata
Ritrattu : instagram di Girandulata http://instagram.com/girandulata
Bona sera à tutti… Porca buchja ! Bolle di ghjente quì !!! Tant’anti-constitutionnels ch’ellu ci hè !

Mai averia pensatu ch’ellu ci ne fussi tantu !! Mi chjamu Pierre-Laurent Santelli è sò quì à nome di l’associ di l’ambiente di u Culletivu per l’applicazione di e lege liturale. È puderebbe dì ancu per l’associu U Cavallu Corsu.

Innò, innò, ùn appiate penseru, ùn v’aghju micca da cantà una canzona... Micca chì… Tè perchè micca "U mio mulinu" ? Iè, sapite "À cant’à lu mio giardinu... un mulinu ch’ùn facia ch’è cantà..."

È "cantava in corsu" issu mulinu o zitè è mancu, ùn si dumandava : "Est-ce que cela est contraire à la constitution" ?

O Puru "A canzona di u cuccu"… Ma …attenti ! Micca quella chì dicia : "Quand’ellu canta lu cuccu, si rallegra la marina…"

Si rallegra a marina... ?

Oui mais ça c’était avant, dice u francese !!! innò ! Corcia marina, chì quelli cucchi d’oghje, sò cucchi predatori, mischiati trà « u riccu mensu » prontu à torce u nasu di a ghjustizia è u « pesciu cane » a cagnaccia, arrimbati à i maffiosi, cucchi ch’ùn pensanu ch'è à scavà, à ruvinà, à tumbà e nostre marine per fanne case, casamenti è speculazione, pigliendu pusessu di i lochi di l’altri. I NOSTRI I LOCHI !!!

D’appressu à voi, quellu russiu, chì avia cumpratu 500 ettari in Balistra, 500 ettari, sì l’associi ùn avianu accuculatu stu famosu PLU, averebbe muntu… 500 capre o… 500 case l’ambrascu !!!????

L’altru ghjornu, ind'u Cismonte, aghju dumandatu à un « pippulacciu », « indu a so lingua »…chì noi, simu bislingui :

« Mais, comment vous avez fait pour avoir des permis de construire dans des zones inconstructibles, pire, dans des Espaces Remarquables et des terres fortement agricoles ? »

M’hà dettu : "Monsieur, nous sommes en République, une république Thune et indivisible… le maire m’a donné un permis de construire et le préfet a fermé les yeux. Le maire m’a même inscrit sur les listes électorales, et d’ailleurs , j’ai voté pour lui à la dernière élection. Il me reste à apprendre le patois keurse… enfin… pas trop hein... juste pour commander le broutch‘ et pour parler à mon chien quoi...

Ci hè ancu un people, in Pumonte, chì ellu m’hà dettu : "Lorsque nous avons fait notre « villa s’gondaire » en « Keurse », on était seul. Aujourd’hui, il y en a plein partout… On n’est plus chez nous !"

O zitè, questione di « legalità » l’affari sò piuttostu in francese ! Un merre o un prefettu chì danu un permessu, fora di lege…« ce n’est pas contraire à la constitution » !

Ma ricunnosce a nostra lingua, nantu a so terra… ça, c’est anti-constitutionnel ! Ma cosa serà sta Republica o zitè?

Avite vistu, in Italia, u statu si ripiglia tutte e custruzzione fora di lege, è ne face centri culturali, ospidali, logiamenti suciali… perchè micca quì ? Ùn simu pò micca più scemi nò ?

O ghjente, a sapite tutti quì, a nostra lingua, hè un nostru patrimoniu, è cum’è tutte e lingue, hà è so radiche è cum’è tutte e piante di u mondu, hà bisognu di a so terra per sbuccià.

SENZA PIÙ TERRA, NÈ POPULU, NÈ LINGUA !

UNA TERRA, UN POPULU, UNA LINGUA !

UNA TERRA SPEZZATA È DANNIZATA DA U BETTONE SÌ !!!


Aprite l’ochji, ùn sò più chjachjare ! Hè cusì chì a Corsica hà persu i so più belli ghjuvelli : Cavaddu, Piantarella-Sperone, Palumbaghja, Santa Ghjulia, Rundinara…

È, dumane, chì si passerà per a Testa Vintilegne, Cuppabbia o Arone… in Piana ? È in altrò, per tutti ssi terreni agriculi !!

UNA TERRA UN POPULU UNA LINGUA !

Allora, oghje, à tutti quelli chì sò quì… vulemu dì : andate à dì à i vostri merri, cunsiglieri generali, senatori, deputati, ministri chì sà… (è faciule chì parechji sò tuttu què à tempu)… è à quelli chì ci preparanu stu PADDUC… Andate à dìlli, chì a difesa di u nostru patrimoniu hè cummunu… è… ch’elli si ponghinu, in cuscenza, una sola dumanda : « Chì sucetà vulemu cunstruisce pè a nostra ghjuventù dumane ? »

Chì li vulemu lascià ? Chì li fermerà di ciò ch’elli ci anu lasciatu i nostri à noi ?

In quant’à voi, ùn vi scurdate di sustene l’associ di l’ambiente, è tutti quelli chì lottanu per a nostra terra… perchè chì, a nostra terra, cum'è a nostra lingua, ùn sò à vende… sò cimentu di u nostru populu !

"Quand’ ellu canta lu cuccu…" pienghje a marina è pienghjenu i lochi pasturecci è pienghjenu avà ancu i paesi chì più nunda ùn la si franca !!!

È ùn vi ne scurdate... pè a nostra terra cum'è pè a nostra lingua : “Forti saremu sì uniti semu" !

u 25 di Maghju 2014



1.mandatu da babbò u 25/05/2014 13:45
Quantu n'aghju intesi discorsi simule,quantu n'aghju fattu accolt'e manifestazione,di gioia ,di canti,di colara o di sperenza.
Un si po fà u benista di un Populu senza ch'ellu sia d'accunsentu,e "Parlemu Corsu" un deveria mancu esistà.
Un voliu disprezzà issa manifestazione,ma quandu i lumi si so spenti,quandi i canti si so alluntanati,a mio lingua,a mio tinta lingua si n'hè andata a piatassi sin a prossima volta,cuperta ch'ella era da a lingua maestra e culuniale,chi alunga per una serata a funa ch'un vulemu strappà.

2.mandatu da turchinu aiaccinu u 25/05/2014 13:56
bravissimi

bella serata di PARLEMU CORSU e grande intervenzione di SANTELLI, magnifica

3.mandatu da U Magu u 25/05/2014 14:07
Iè babbo, ai ragio

ma hè cusi, cu 250 anni di culunizazione di u paese u più culunialistu di u mondu, u piu disprezzante, u più assassinu di l'identità, ne simu qui

u populu corsu ùn hà micca tenutu, oghje 5000 francesi ghjunghjenu à l'annu, e cio chi ferma di Corsi gira u spinu a cio ch'ellu hè

e avà tocca a noi à batteci, più chè mai

aspettanu ch'e no callimu e bracce, MA SIMU QUI PIU CHE MAI

4.mandatu da U Magu u 25/05/2014 14:07
Iè babbo, ai ragio

ma hè cusi, cu 250 anni di culunizazione di u paese u più culunialistu di u mondu, u piu disprezzante, u più assassinu di l'identità, ne simu qui

u populu corsu ùn hà micca tenutu, oghje 5000 francesi ghjunghjenu à l'annu, e cio chi ferma di Corsi gira u spinu a cio ch'ellu hè

e avà tocca a noi à batteci, più chè mai

aspettanu ch'e no callimu e bracce, MA SIMU QUI PIU CHE MAI

5.mandatu da babbò u 25/05/2014 17:26
Ié U Magu,ci si vole a batteci,che a lingua corsa un hè morta,hè stata salvata cu u riacquistu,e oghje ci so libri,documenti,scritti,e ognunu a po amparà,ma so i CORSI chi so morti,so i Corsi chi si vargognanu di u so parla,di a so storia ,di a so terra.
I corsi so cascati inde a trappula di a mudernita,di u gattivu prugressu,di i discorsi di a LDH a l'usu francese e europeanu,volenu diventà figlioli di u Mondu e abandunà a famiglia,u paese,a terra,per u soldu chi compra tuttu e tomba e civilisazione e sguassa e piu belle pagine di a nostra storia,scritte cu u sangue di li nostri antichi.
Un ci sbagliemu di lotta,salvemu u nostru Populu e a nostra Terra,e a lingua ha da rinasce da per ella.

6.mandatu da henry smart u 25/05/2014 21:49 (da un teleffuninu)
Bella iniziativa di mette stu discorsu qui, chi un so mancu appena siguru chi tuttu ognunu l''abbia intesu. He ciò ch''o ritengu di a serata!
Ancu se u tonu un era quellu festivu di a serata. Ma ghjera un più puliticu stu discorsu.

7.mandatu da campagnolu u 25/05/2014 23:09
D'accunsentu cù Smart.

Bellu e forte mumentu.

8.mandatu da Corsica2b u 26/05/2014 01:32
Salut a tous voila j ai decider de creer un chat qui sera dedier a la corse et en langue corse pour peut etre redonner gout aux gens de l utiliser et a ceux qui ne la parle pas suffisament ou sufisament bien de pouvoir s ameliorer j espere que vous viendrai nombreux voila l adresse du site

http://www.chat-fr.org le nom de ma chaine est #corsica

9.mandatu da babbò u 26/05/2014 11:33
Avemu trovu u mezzu di fa falà a ghjente in carrughju: canzone,da beie e da manghja,fole e canzone,et tout finit en chanson ,cume si dice in francese.
L'assimilation fait son oeuvre

10.mandatu da ùn facciu micca quad eiu u 26/05/2014 12:32
Forza PLS !

11.mandatu da bastiacciu stortu u 27/05/2014 13:10
Clint eastwoood parè Corsu ....

12.mandatu da Murtali u 29/05/2014 16:57
PLS ........ PAROLA LINDA è SCHIETTA

A stonda a più putente di a sirata

...pà sempre ISTRIA

13.mandatu da guerrini u 31/05/2014 14:47
"Cridia chì u solu scapu di u cullettivu "Parlemu corsu " fussi a difesa di a lingua nustrale _u corsu. è a so cuufficialità.
Mi sò sbagliatu quand'o aghju lettu l'intervenzione di P.L. Santelli.

Pè riesce un prugettu ùn ci vole micca à avè dui farri à u focu., o sippuru difende ne unu solu à volta.

14.mandatu da guerrini u 31/05/2014 14:52
i[

15.mandatu da guerrini u 31/05/2014 14:54
S'agisce di scopu è micca scapu.
Scusatemi pè stu bagliu..

Novu cumentu :