Patrick Valery, da a D1 à Croq'o pain

Sì passatu da i terreni di D1 à Croq’O’Pain, chì effettu ti face ?
Cosa credi tù ? Ghjucà in D1 era più faciule ch’è di travaglià à Croq’O’Pain. Ma mi campu listessa. Sai, si trovanu parechji « gabarits » quì dinù. È ogni ghjornu, vendu panette, invece chì prima e facia di rigalu…

U ballò prufessiunale ùn ti manca micca troppu ?
Iè, bella sigura… Ma ùn aghju tantu persu cuntattu cù i terreni di ballò, postu chì per furtuna allenu i giovanni di u centru di furmazione di u Sporting. Tandu, hè un veru piacè di sparte a mo passione è di cuntinuà à esse un leone, ancu s’è a vechjaia si face sente avà…

Ere un ghjucadore ch’ùn si lasciava micca rompe e stacche, ere appreziatu da u publicu per u to impegnu è u to ghjocu certe volte appena duru. Finalmente, ghjè ciò chì manca u più à u Sporting mentre sta stagione, nè ?
Forse chì certi ghjucadori ùn si danu micca di rimenu cum’ellu ci vuleria. Prima « mouiller le maillot » avia veramente un sensu. Oghje l’affare mi pare diferente…

Ghjustappuntu, si sente assai dì ch’ùn hè più cum’è vinti anni fà : intimidazione in u curidore, colpi, cazzotti è sciambuloni gratisi… Ùn trovi micca chì u ballò mudernu diventa di menu in menu interessante ?
Era più passiunante prima chì si vidianu l’omi, i veri ! Ùn vogliu micca dì chì u ballò oghjincu hè senza valore. Ma à l’epica, quandu eo ghjucava, era più fulcloricu cù assai effetti d’intimidazione. Avà, ùn sì pò più fà nunda, ci sò e camerà ignilocu. È u minimu gestu o a minima parolla di traversu porta subitu à una cunvucazione davanti à a Federazione. Peccatu ch’ellu sia diventatu cusì…

È cosa ti face d’avè l’etichetta d’un ghjucadore « gattivu » ?
Aiò, cumenci à annerbà mi cù e to dumande storte… Ùn sò mai statu gattivu. Era piuttostu un ghjucadore simpaticu chì difendia a so squadra cù brama è passione. Cusì aghju cartunatu, mì !

Calmà ti puru o Patrì è pruvemu à parlà seriu, allora. Segondu à tè, u SCB in ligue 1 « orange » in u ballò di Thiriez è d’Aulas, hè torna pussibile ?
Ùn i stò tantu à sente sti dui quì. Cum’è certi ghjucadori è dirigenti, pensanu appena troppu à i soldi, scurdendu si di u più impurtante : u ballò ! Eo, ci credu assai à u ritornu di u SCB in ligue 1. Sforzi sò stati digià fatti à u livellu di l’urganizazione di u club. Ci tocca à cuntinuvà, cù u tempu è sopr’à tuttu a passione. Duvemu ritruvà l’anima turchina. Forse si pò fà…

U to più bonu ricordu cù u Sporting ?
Ci n’hè parechji, ma riteneraghju a prima annata, quandu sò ghjuntu in Bastia, in u 1996, nanzu di parte in Inghilterra. C’era una ambienza di quelle, cù Drobnjak, Swierczewski, Eydelie, Rool, Perez o ancu Moreau. Tutti furmavamu una vera squadra, eramu uniti nant’à u terrenu cumè in a vita di tutti i ghjorni. Inseme, ci simu campi, riescendu d’altronde una bella stagione…

U peghju ?
Ùn aghju tantu gattivi ricordi, ùn rigrettu alcunu mumentu. Ma m’hè quantunque dispiaciutu di piglià a mo ritirata spurtiva…

U più bonu ghjucadore cù u quale ai ghjucatu ?
L’attaccante inglese Glenn Hoddle chì simu stati campioni di D1 inseme in u 1988, cù a squadra di l’AS Monaco allenata à l’epica da Arsene Wenger.

U peghju ?
Ognunu hà e so qualità è i so difetti. Pensu ch’ella hè stata longa a cumpagnia, ma micca nomi…

U ghjucadore à quale ai messu vulinteri un tusciu ?
Ùn avia micca preferenze. Tutti l’attaccanti chì venianu in a mo zona di difesa, a sentianu passà. U trattamentu era listessu per ognunu…

À quale ti piaceria à mette ne li unu ?
Vuleria à pruvà di piantà Messi di u FC Barcelona, ancu s’ellu corre assai in furia…

Chì s’hè passatu u 27 di ferraghju di u 1967 à u stadiu Velodrome di Marseglia ?
A Corsica hà mustratu ch’ella avia e pussibilità d’avè a so squadra naziunale di ballò, battendu a Francia 2 à 0.

Ti saria piaciutu à ghjucà in una squadra naziunale corsa ?
I mo caccari eranu corsi è mi saria assai piaciutu à raprisentà l’isula induve aghju sceltu di fà a mo vita, induve mi sentu più chè bè dapoi tanti anni avà…