Perchè ci vole à andà à u cuncertu d'Isula

Isula hè un gruppu bastiacciu chì hà esistitu da u 1987 à u 1992. Sò esciuti dui dischetti : « L’ultimu viaghju » (in u 1990), piuttostu tradiziunale, è « L’Anghjuli in infernu » (1992) chì prupone qualcosa di più originale. Quelli chì eranu giovani tandu si n'arricordanu tutti.

Allora chì ritene di st'aventura ? Prima e belle meludie è e canzone di qualità. È una dimarchja nova, una vuluntà di purtà qualcosa d'altru in a musica corsa.

Videò : Sangue di pueta

Isula annunziava una via "pop" chì d'altri piglieranu più tardi. Và bè chì c'era statu Rialzu è Zia Devota nanzu, ma ci vole à dì ch'ellu ùn piacia micca à tutti di sorte di a "tradizione". È quessa tandu, ci vulia à falla.

Videò : À u ritimu di i toi

Sì u primu album era piuttostu di fattura "tradiziunale", u segondu prupone qualcosa da veru differente. Un "album-cuncettu" chì conta una storia (cun accunciamenti è rimori trà e canzone...) chì l'hà fatti sorte di u cunfurmisimu di a canzona corsa tandu è dinù passà per scemi.

Ma in verità, era putente.

Pierre Gambini cuntinuverà prima cù I Cantelli, più tardi in sulistu cù u successu ch'ellu si sà.
Dédé Sekli cuntinuveghja a so carriera in a famiglia di a pop nustrale.
Jean-Pierre Marchetti giranduleghja cun Barbara Furtuna chì flamba è José Ugolini firmerà parechje canzone di i Varans.

Vale u colpu d'andà à vede ciò chì sta bella squadra ci hà preparatu.

Isula hà un fan chì hà pustatu una videò nant'à YouTube cù una canzone è fiure di dissegnu animatu giappunese.

È perchè micca ?

Cum'è tutti i veri rockers Isula si sò spiccati per turnà à furmassi vinti anni dopu. À un mumentu induve avemu appena l'impressione di girà in tondu, u spìritu d'Isula ùn pò micca fà male.

U veru fan d'Isula hà tenutu i scagnini. A glassa, nò ?

Appuntamentu hè pigliatu pè u 26 di maghju in Bastia, à l'Alb'oru. Isula annunzia un giru à vene.

Cun :
Petru GAMBINI
Anthony ESPOSITO
Dédé SEKLI
Ghjiseppu UGOLINI
Cristofanu Tittò LIMONGI
Santu MARIANI
Jean-Jacques MURGIA

Di più infurmazioni nant'à a pagina Facebook di u gruppu