Accueil
Envoyer à un ami
Version imprimable
Partager

Perchè i fast-food sò un paradisu

O surè, o fratè, aprite l'ochji ! U benestà hè custì. À u pede di e muntagne, à a periferia di e cità, à u sboccu di l'autostrada, u fast-food ci aspetta. Stu locu ci ricolma di gratitutine. Eccu perchè.



Perchè i fast-food sò un paradisu
1) L'architettura hè muderna, i culori acìduli, alegri, framanti. Ùn ci hè micca murzu nantu à u tettu.

2) Ci hè un persunagiu dissegnatu, un amicacciu « ultrafun » chì ci face « coucou » da luntanu. Ci si pare d'avè òndeci anni « forever ».

3) I risichi sò minimi. A nutritura hè molle è tepida, e trippette tracalde in salsa piverunosa sò tabù.

4) Simu in cumunione cùn tutti l'esseri umani chì, a listessa òra, in Bali, in Milwaukee, in Budapest o in Gif-sur-Yvette si sciaccanu un cheese assulutamente identicu (mentre chì a pulenda puzza l'identità mischinella è a paura di a mundializazione).

5) I nostri sgaiuffi ingrassanu in pace : ùn ci hè bisognu di precuralli ch'elli si techjinu.

6) I più chjuchi sò siguri d'entresine in casa cùn un rigalu ghjittevule chì i Chinesi anu fabricatu apposta per elli, cùn amore, senza dumandà à esse pagati.

7) Simu sempre servuti da l'impiegatu di u mese, o quellu di u mese scorsu. Un impiegatu « trè stelle ».

8) Si pò manghjà cùn e dite : u piacè di a transgressione hè maiò.

9) Ci hè sempre un umatale, un custodiu da impedisce chì qualchisia v'arrubi i pomi fritti (si pò lascià a pistola in vittura).

10) Ùn si pò micca staziunà à u cuntuaru. Sò sbanditi i briaconi chì ci chjamanu pè appughjà a so paghjella, e croce chì parlanu forte, e turnate chì ci arruvinanu.

11) Simu di siguru omi di u XXIu seculu : u passatu dorme in lu campusantu chì hè statu cupertu quandu elli anu fattu u parking.

12) Ci sentimu « rè di u mondu » : per noi soli, anu stirpatu l'Indiani di l'Amazonia è postu u sojà OGM pè rimpiazzà a furesta.


u 22 di Farraghju 2015
Zenbucucciu



1.mandatu da Seb u 23/02/2015 07:31
Ghjè cusi chì un KFC si custruisce in aiacciu... Pulastru di prima trinca à bon pattu !

2.mandatu da sardu u 23/02/2015 09:28 (da un teleffuninu)
Finché si manghjà, tutti só contenti...

3.mandatu da gengis-cane u 23/02/2015 11:29
KFC = vomitu

4.mandatu da ronald u 23/02/2015 18:58
puttana chi diccia un KFC in Aiacciu!!! collu subitu à stallami quassù!!

5.mandatu da casgisardu u 23/02/2015 19:02
bobobo, in Aiacciu anu tuttu: decathlon,6 sale di sinemà,u palatinu è avà....un KFC!!! si sente à fine

6.mandatu da goffubruttu è gattivu u 23/02/2015 19:08
13) ti poi fà serve omancu duie volte senza pagà; ti spiecu: ti pigli 6 nuggets, ti ne sciacchi 2 o 3 è dopu passi cù una faccia impiubata è dici : mi mancanu i nuggets, cumu hè?? tandu ùn sanu più cumu fà è ti servenu torna.... a ricummandu ci hè da more!!!

7.mandatu da anto u 25/02/2015 14:57
Micca per me ,un ci aghju mai messu i pedi e un pensu micca ch'ella sia pè dumane ...

Novu cumentu :


Seguitateci nant'à Facebook


L'articuli

Abbunatevi à a newsletter

Circà nant'à A Piazzetta