Accueil
Envoyer à un ami
Version imprimable
Partager

Perchè u tempacciu ùn finisce più

I primi ghjorni d'aprile sò i "pristaticci", i ghjorni chì u mese d'aprile hà imprestatu à u mese di marzu, d'appressu à a legenda. Ma cù a crisa, quist'annu i pristaticci ùn finiscenu più...



Perchè u tempacciu ùn finisce più
L'antichi avianu una spiegazione pè u tempacciu frequente di i primi ghjorni d'aprile : hè a fola di i ghjorni pristaticci (da u verbiu "imprestà").

A storia dice chì à u mese di marzu, un pastore (un picuraghju) si ne ridia di u mese di marzu. L'inguernu era compiu è u pastore a s'avia francata. E pecure eranu grasse, i so casgi tamanti, i so brocci belli bianchi... è allora si muntava appena a sega. Dispettosu, si magagnava à u mese di marzu :

« Marzu, catarzu, figliolu d’un bugnone, facciu l’agnelli tamanti è muntoni, u brocciu tamantu è spurtoni » è cuntinuvava à ride...

Ma u mese di Marzu hè un biscone. Vole vindicassi è dumanda à u mese d'Aprile d'imprestalli dui o trè ghjorni per vultà à metteli una concia :

« O Aprile, u mo fratellu, imprestami u primu è u dui, ch'aghju da fà penta u falsu picuraghju ».

Sulidariu, Aprile li risponde :

« U primu u tengu per mè. Ma t'imprestu u dui è u trè »

Tandu, cum'è un Schwarzenegger, Marzu volta i primi ghjorni d'aprile per fà nasce timpesta, toni, saette, acqua à sechje è ancu neve per punisce u pastore appena troppu pretensiunutu.

Cusì si spiega chì u tempu hè sempre gattivu u dui è u trè d'aprile.

Ma quist'annu, i pristaticci a s'allonganu è ùn sò ancu finiti. Serà forse colpa à a crisa è à Aprile chì hà messu parechji chjodi à Marzu.

Da leghje : parechje versioni di sta fola : nant'à Wikipedia, u blog di Canonici è u situ In punta di lingua.

u 5 d'Aprile 2013
U Webmaestru



1.mandatu da Mammone u 05/04/2013 12:44
I pristaticci a s'allonganu quist'annu ...i pastori so cuntenti , e pecure faranu più latte , ...ma hè vera cu c'hè più tanti pecuraghji ...e i turisti un s'ho micca cuntenti ! Chi peccatu ! ...ma eiu mi n 'infischjaghju , e pecure di u mio fratellu so cuntenti !!

2.mandatu da Pietro Mastroleo u 05/04/2013 12:51
questa leggenda esiste anche dalle mie parti, a 1500 km da voi :)

3.mandatu da henry smart u 05/04/2013 13:00
Bella sta fola !
u casticu cu u tempacciu he chi ci vole à pate quelli chi si lagnanu sempre !

4.mandatu da Corsicanacciu u 05/04/2013 14:10
Eiu so cuntentu di l'acqua ! Pè l'animali, i pastori, l'agricultori è i fiumi, evviva u tempacciu !

5.mandatu da ghjuva u 05/04/2013 14:47
eu cio che mi stumaga ghje quandu sentu certi di "he in parigi piove!!" cume se parigi facia parte di u nostru paese....infine un ce micca che a francia in stu mondu. (ancu di grazie) lol...

6.mandatu da ANTO u 05/04/2013 17:12
I prestadicci sarebenu "les saints de glace "a l'usu corsu in cu qualqui ghjornu d'avvanzu .

7.mandatu da J G u 05/04/2013 18:12
Si dice dinù chi aprile scemu e scioccu invece di tre li nè prestô ottu !

8.mandatu da acloscia u 05/04/2013 20:22
ùn peghju ghjè à Aurillac...bouuuu chi paisacciu!!!

9.mandatu da MP u 05/04/2013 21:25
Averia fattu megliu d'imprestàlli à ferraghju, è cusì quellu ùn seria statu nè cortu nè maladettu.

10.mandatu da STRANPALATU u 07/04/2013 15:12
marsu catarsu figliolu di millioni
tu ti né vai in cu i mio aghioni

a mé mi lasci incu i mio cullioni



a cuniscité quessa? ? ? ?

Novu cumentu :


Seguitateci nant'à Facebook


L'articuli

Abbunatevi à a newsletter

Circà nant'à A Piazzetta