Accueil
Envoyer à un ami
Version imprimable
Partager

Pierre Ménès à prupositu di Furiani : "ça fout les ch'tons"

"U gontexte", a seguita : dop'à a partita (appena calda) trà Bastia è Nizza, eccu u ritornu di a paura di sanzioni contr'à u Sporting.



Pierre Ménès à prupositu di Furiani : "ça fout les ch'tons"
Una partita trà Bastia è Nizza ùn puderà mai esse una partita cum'è l'altre. A storia di i dui clubs face ch'ella hè cusì. È dop'à ciò chì s'era passatu à l'andata à l'Allianz Riviera, ùn ci vulia micca à aspettà chì l'ambianza sia listessa ch'è quella d'un Guingamp - Toulouse.

Hè cusì, è hè tantu megliu. Hè ciò chì face chì in Furiani ci hè stu sùppulu d'ambianza particulare ch'ellu ùn ci hè più in altrò.

Purtantu, quelli chì anu campatu l'ambianze furianacce di l'anni 70, 80 o di u principiu di l'anni 90 sanu quant'ella hè cambiata. In un stadiu ùn si pò più fà ciò ch'ellu si facia vint'anni fà. U futbol business hà impostu e so regule in l'Auropa sana.

Ma in Furiani ferma qualcusella di più ch'è in altrò.

Da vede u filmettu di spiritu-turchinu.com :


Hè stu qualcosa in più ch'elli ùn supportanu micca i dirigenti di u futbol francese. Voi truvate chì i sustenidori si sò calmati bè, chì e tribune (più luntane da u terrenu ch'è tandu) si sò appaciate, ch'ellu ùn ci hè più sta scimità di nanzu ?

Elli trovanu ch'ellu hè digià troppu. Hè u famosu "gontexte" chì face perde i visitori. Sta volta, a parolla era in bocca di u nizzardu Romain Genevois : "on s'est fait avoir par le contexte" .


À a grande messa di a dumenica sera, u Canal Football Club, Pierre Ménès hà pigliatu paura d'un riportu nant'à a partita : "C'est flippant, ça fout les ch'tons".

Bon, forse ci vulerà à pagalli un ghjornu un viaghju in Argentina à vede un Boca - River o in Grecia per un derby d'Attene o di Salonica.
Pierre Ménès à prupositu di Furiani : "ça fout les ch'tons"


Ferma u prublema di st'incidenti. Dop'à a partita si facia i prunòstichi nant'à a sanzione pussibule. Una partita in Gueugnon ? Unu, dui o trè punti di menu ?

Purtantu, s'hè passatu pochi affari sabbatu sera. Nant'à u corner di Bauthéac, ci hè di più cummedia ch'è altri affari.


Ma u prublema hè chì in Furiani, ciò chì casca nant'à u terrenu costa u doppiu chì s'ellu era cascatu in Caen o in Lens...

A fiura hè bella, ma l'addizione hà da esse salita per u Sporting.

È sì a partita hè stata arrestata, hè perchè ch'ellu hè statu lampatu... un ballò nant'à u terrenu.

Furiani serà sanziunatu per u mutivu di "ballon rendu par les supporters dans les tribunes" ?

À noi a storia ci face ride, ma ùn hè micca sigura ch'ellu sia u casu per i membri di a cummissione di disciplina. Hè dinù a cunclusione di l'articulu di Corse-Matin d'oghje...

Pierre Ménès à prupositu di Furiani : "ça fout les ch'tons"

In fine di contu hè a storia di u Sporting chì hè cusì dapoi sempre. In Parigi ùn supportanu micca a nostra "differenza", paghemu più caru ch'è l'altri, simu aspettati è caschemu in a tràppula, è cuntinuvemu cusì a nostra vittimizazione chì forse, ci piace ancu appena, nò ?

À Pierre Ménès st'ambianza li dà i "ch'tons", ma chì saria s'ella ùn era più cusì in Furiani ?


u 9 di Marzu 2015



1.mandatu da goffubruttu è gattivu u 09/03/2015 15:45
ci hè u gonteste keurse è dopu ci hè u gonteste menes..Menes rimetti ti à a coppa, tuttu stu grassu ch'è t'ai persu ti pichja appena in capu...

2.mandatu da francescu u 09/03/2015 16:15
iè ma un ci vulia micca à lampà què nanta u terrenu, l'avemu da pacà caru

u spetaculu ind'e tribune era magnificu, ma pigliate puru u vostru bigliettu per Gueugnon

3.mandatu da beau zetti u 09/03/2015 16:55
Intantu 2 cartoni rossi per Nizza..? quale so i gattivi?

4.mandatu da Ghjuvanluca u 09/03/2015 17:09
Tutta invidia...Forza Bastia.

5.mandatu da fiumurbacciu azzezu u 09/03/2015 17:57
ma un ci vuleria piu chi é squadré corsé gjuchéssinu é cumpètizioné in francia .sarébé megliu d'anda in li campiunati taliani.In cu l'aeuropa sara podéssé pussibulé.Cusi si buvaloni di é media francesé un ci amerdaranu piu ! ! ! !

6.mandatu da cuscione u 10/03/2015 16:32
a scimatichera pò cuntinuà assai !?

certi scemi ch'ùn hannu micca capitu , cuntinueghjennu a lampà cachjaroni e altr'affari .

Dopu, saranu i primi dà pienghje quandu e sanzione hannu dà fallà cutrate, nanta u scb ...

ci vole a fallà finita ...

7.mandatu da altore u 10/03/2015 16:54
cuscione hà raghjò.

sta volta, un ci vulerà micca a pienghje quandu ci piglieremu 1 o 2 matchs di suspensione

8.mandatu da sardu u 10/03/2015 17:21 (da un teleffuninu)
Ma smette di fà cosa?? VOI STATE SOLU A TIFÀ, bé i sfottó só nurmali ,un pocu esagerati, ma hé a vostra lotta no?! só elli esagerati, a federazione chi vi rompe i coglie!!! Da difende a vostra cultura é e tradizioni...

9.mandatu da acquaviva u 13/03/2015 08:47 (da un teleffuninu)
sporting in seria A e basta o B .basta tutti sti pienti:un simu francesi femula finita.a l''ora di u riavicinamentu cu in populi fratelli noi in italia .a francia fora.

10.mandatu da caponecunoi u 13/03/2015 13:57
à mè ghjè menes chì mi dà les ch'tons è à voi, chì vi face..?

11.mandatu da sardu u 13/03/2015 13:58
site da serie A un preucuparti,chi sita più forti ancu di u cagliari...

12.mandatu da acquaviva u 13/03/2015 18:10 (da un teleffuninu)
ti ringraziu fratellu sardu e speru che cagliari un sara ritrucessu amicizie

13.mandatu da sardu u 13/03/2015 20:17 (da un teleffuninu)
Ti ringrazio ancora a te, ma un c'è più a speranza Pe u castello, li Fera be a serie b:)

14.mandatu da sardu u 13/03/2015 20:19 (da un teleffuninu)
Vulevu scrive ancu e casteddu,tastiera di u ...

15.mandatu da Ghjuvanluca u 14/03/2015 10:04
Casteddu in B?? Eu Speru chi un s'avveri issa falata.....ci sò ancù 12 scontri ,tottu è pussibile.
Ma simu à a resa di i conti....oghjie contru Empoli.
Si falemu in B,passerannu parechji anni prima di collà in serie A.
Pochi i soldi e ù patrone 'talianu. L'avemu da pacà cara.
Quantu a mè, ferma ù sostegnu di poi tanti anni a SC Bastia ,AC Ajacciu e tutte squadre corse.

16.mandatu da sardu u 14/03/2015 16:07 (da un teleffuninu)
Ajo ghiuva, Con Zeman...

17.mandatu da Ghjuvanluca u 14/03/2015 17:45
di più ....cù Giulini......simu propriu inda'merda.
Sabatu di suffranza

18.mandatu da sardu u 14/03/2015 20:25 (da un teleffuninu)
Tutti casini di l annu ...un serviva nunda ora ...chi cambi a fa, He vero chi sta Giulini, un He mancu sardu
...talianu

Novu cumentu :