Pippulacci in Corsica : u best of di e closce

Hè un articulu nant'à l'apertura di un burdellu tenutu da Muriel Robin chì avia apertu a stagione.

Ma l'affari diventanu serii solu avà, cun ciò ch'elli chjamanu "le journal de l'été".

Tutti l'anni ùn a ci pudemu francà, hè un veru cuncorsu di e peghju closce di u show-biz chì s'offrenu una publicità in u Corse-Matin.

Di siguru, sò tutti "des amis de la Corse", apprezieghjanu l'accogliu, a simplicità, a generosità di i corsi... ma in e so villà securizate nant'à u mare, u più luntanu pussibule da u populu è i so paisanacci.

Si cummencia furtissimu u 9 di lugliu scorsu : s'ampara chì a star planetaria Yves Duteil (pensava ch'ellu era mortu...), si riposa in Purtivechju. In listessu tempu, ripusassi di chè ? L'ultima volta chì s'hè parlatu d'Yves Duteil era pè u so sustegnu à Chirac in l'anni 90...

Allora Yves Duteil si ne sorte da u so riposu pè spiegà à Corse-Matin chì "c'est ici que j'aimerais finir ma vie"... Casca male, noi ùn u vulemu, mancu mortu.

Dopu avemu avutu dirittu à Nathalie Rheims . Ùn sapete micca qual'ella hè ? Hè normale, almenu d'esse spezialistu di a sottu-literatura francese. Ma sta brava zitella hè sopr'à tuttu cunnisciuta in San Fiurenzu per fà parte di u circulu strettu di quelli, cun Jean d'Ormesson, à avessi privatizatu u liturale pùblicu. Andate à vede stu situ chì spiega tuttu.

Dopu cummencia u festivale di i pro-Sarko in Corse-Matin cun l'antipatichissimu Alain Prost

Bernard Laporte chì face nece anch'ellu di leghje "Tempi fà". Pensate appena... È cosa si n'impippa Bernard Laporte di a manera di fà i pali à fasgiolu in Cugnoculi Muntichji è di i catini in legnu di Zalana !

Si cuntiniveghja sempre più forte cù u catinu intersiderale Didier Barbelivien, sceffu di a musicaccia per beaufs, campionissimu di a merda francese, tercanu di a varietà chì v'arrega u vòmitu. Un veru vituperiu chì meriterebbi di piglià 30 anni di prigiò per l'inseme di a so opera è di i scempii ch'ellu hà fattu. À cantu à ellu, Vincent Lagaf, Daniel Guichard è Plastic Bertrand sò genii. In più di quessa, stu mullizzu si permette ancu di fà in u Corse-Matin l'elogiu di Sarkozy (serà cuntentu Lagardère).

Chì si pò dì nant'à stu vechju macuccu di Philippe Gildas, forch'ellu face decine d'anni ch'ellu ci rompe i stifali in Cala Rossa ? È à a MAPAD, ùn u vuleranu micca, nò ?

Ci hè qualcosa à aghjustà à què ?

Altru sustegnu di prima trinca pè Sarko, Gérald Dahan, stella mundiale in u filu di i grandi umuristi à a francese, cun Didier Gustin, André Lamy o Jean Roucas (bon ellu ùn hè micca venutu in Corsica ma a si meriteghja quantunque)

Eccu ancu à Guidu Rossu, chì ùn hà mancu pigliatu a pena di cambià u so t-shirt cughjosu pè u ritrattu.

Infine Elie Sémoun, chì si cerca una donna è un terrenu pè custruisce.

Eccu, basterà per oghje.

Una volta di più, un grande merci à Corse-Matin per sti belli mumenti di cultura è d'infurmazione !

To be cuntinuvatu...