Accueil
Envoyer à un ami
Version imprimable
Partager

Playlista "bandera corsa"

Ah iè ? Ùn volenu micca vede a nostra bandera ? A so visione li dà e brisgiole ? Cascà bè, l'anu da vede ancu di più cusì. Eccu a nostra playlista "bandera corsa".



U prefettu Adolphe hà vulsutu pruibiscela.
I Nizzardi si sò annerbati quandu l'anu vista.
Tanti cummentadori l'anu vista cumu una "pruvucazione".
U delegatu di ACA - Valenciennes l'hà difesa.

Senza cascà in a pruvucazione è in l'incidenti ch'elli aspettanu : a sola suluzione, hè di falla sventulà !

Eccu a playlista "testa di moru", da A Palatina à Populu Vivu, da I Chjami Aghjalesi à Orizonte...
Playlista "bandera corsa"

A Palatina

Cantu anònimu di u XIXu o di u principiu di u XXu (nò ùn era micca cantatu à i tempi di Paoli...) nant'à un'aria tradiziunale (cù un rìtimu appena di più rapidu), A Palatina dice :

"Or fate sventulà sta chjoma,
Chì tantu sott'à la soma,
Per cent'anni ùn si hà da stà,
Da lu pughjale à la marina
Cantate la Palatina
È lu piombu salterà"


Canta u Populu Corsu l'hà pupularizatu.



Sunatu hè lu cornu

Hè Don Petru de Mari chì l'hà cumposta è hè stata publicata per a prima volta in L'Almanaccu di A Muvra, in u 1926.

"Tutti sott'à la cara bandera
Bianca, ornata di la testa mora
Aiò tutti chì turnata hè l'ora
Di la nostra antica libertà"


Sò parechji gruppi à avè cantatu sta canzona, eccu a versione di Canta u Populu Corsu.



U Culombu

Scritta da Petru Rocca in u 1937, tube di l'anni 70. Dice cusì :

"Centu bandere cu lu moru
Innalzanu lu so biancor
In questu sùblime decoru
Frà l'evviva d'ardenti amor
Di de Paoli la sembianza
Presente ci face esultà."


L'Arcusgi di Pasquale

Aspettendu a rivincita di Ponte Novu, a canzona di L'Arcusgi dice cusì :

"U cantu di u culombu
Introna la Custera
Ci chjama lu ribombu
sott'à la cara bandera"

A mea la bandera

Canzona di I Chjami Aghjalesi esciuta in u discu "Sventulerà" :

"A mea la bandera
sventuleghja a vita
È bench'è bianca è nera
Mi pare culurita".

Populu Vivu

Unu di i più grandi successi di I Chjami Aghjalesi. Cantata da Canta in u discu "Théâtre de la Ville" è dopu arregistrata da i Chjami in u discu "Esse" (1981) :

"Soffiu di a timpesta
Chì sciappa i cantoni
In paesi stranieri
Ghjustra la bandera"



Testa Mora

Hè u gruppu Orizonte chì l'hà esciuta in u 1995.

A mio bandera

A mo bandera di u gruppu Notte.

Terra Sacra

Esciuta in u discu "Populu Vivu" in u 1993 (parolle di Patrick Croce, musica di Ceccè Pesce).

L'Armata

"Bandera corsa
Alzata in forza
Pronta hè à sventulà"


Da vede sta versione interessante in Ukulélé, cantata in live in sala di bagnu.


Corsica Nostra

U tube di tutti i tubes.

"L'ora hè venuta di fà l'unione
Per la salvezza di la nazione
Sta voce pura vene da u core
Ci porta a fede, ci canta amore."


Bandera mora

Canzona di Diana di l'Alba chì dice :

"Era una bandera arritta è fiera
Chì purtava a spera di a libertà
Tutti adduniti, mai più banditi,
Circhendu a via di a fraternità"



Truvate ch'ella ne manca una ? Scrivetela puru in cummentu.

u 25 d'Utrovi 2014



1.mandatu da Clemente-Ghjiseppu Franceschi u 25/10/2014 13:00
Manca quantunque "Bandera Mora" di Diana di l'Alba !!

2.mandatu da u webmaestru u 25/10/2014 13:01
Hè ghjusta ! A mettu.

3.mandatu da àpopulufattubisognamarchjà u 25/10/2014 14:03
anu fattu cum'è Sarko pè i fasci di l'arabi : nata a lege, rinfurzatu hè statu u stintu di l'identità; avà l'anu tutte in capu; ùn ci hè nunda à dì sti francesi sò veramente troppu forti....Avà tutti à bandere in manu o in capu!!!!

4.mandatu da Mrcazzu u 25/10/2014 14:18 (da un teleffuninu)
Quella di i chjama aghjalesi "à mea la bandera"

5.mandatu da Ghjuvanluca u 25/10/2014 15:35
Chjami Aghjalesi "bandera".......bellissima e vera.....Quellu chi intendu eiu pe à Corsica!!!!!

BANDERA
Sunneghju arrittu di capu ind'è stelle
Incù le bracce sparte brame è l'ochji à l'orizonte

Li paesi landani à le terre ribelle
Mi sò palazzi d'oru è di mele ogni fonte
Ci vec'una lumera ch'accende à lu me core
I chjassi ch'oramai anderan'à l'amore
L'amore di ognunu per quantu ch'omu vole
Abbraccià li spazii è sparte lu so dulore
L'azuru frisgiuleghja è lu vent'hè legeru
Ch'hà ripost'in rigalu di bazz'una candella
U sol'abbagliuleghja à l'altu di u celu
Da struge lu penseru di ogni citadella
U sognu di li mei lu mi portu in pettu
Ci vec'una bandiera da tante man'alzate
E tandu eo cantu in segnu di rispettu
Per ogni passu fattu nant'à la longa strada
Chì ogn'omu chì canta hè un omu chì sridda
E la so voc'immensa s'accoglie à la fiumara
Di la grand'armunia è di la voce unita
Chì ribomba in celu u ricuccu di a terra
A strad' ùn hè finita è lu sognu ùn hè mortu
D'intign'e nostre brame ind'è l'universale
Serà nostru lu mare è di tutti lu portu
Duve nascemu digià e spere di dumane
E simu nati tutti pè dì è pè cantà
Chì sunniem'arritti di capu ind'è e stelle
I pedi nant'u scogliu di chì seguiterà
I pedi nant'u scogliu di chì seguiterà
Nant'a terra di Corsica

6.mandatu da estrimei u 25/10/2014 17:19
difende a nostra bandera hè dinnù difende a so lingua , difende a so terra ....
difende a so terra , Petru Laurenziu Santelli l'hà fatta , sta mane , nantu a "France Culture"; ci n'hè per 52 minuti , ma 52 minuti chi ci tennenu l'ochji aperti
http://www.franceculture.fr/player/reecouter?play=4928354://


or fate sventullà sta chjoma
ch'intantu sottu a la somma
per cent'anni , ùn ci hà da stà


...dice a canzona , ma tocca a noi per chi l'affari cambiinu , e per quessa ci 'ole a apre l'ochji chi :
più ne sà
più n'adopra

... s'ellu hà appena di sumerinu .....

7.mandatu da A u 25/10/2014 19:46
"Bandera Nostra" d'alte voce

8.mandatu da àpopulufattubisognafalà u 26/10/2014 09:21
bandera di CUPC cantata da M.Cacciaguerra

Novu cumentu :