Accueil
Envoyer à un ami
Version imprimable
Partager

Quale era Tiadoru Poli, u banditu chì hà ispiratu à Biancarelli pè "Orphelins de Dieu"

Surtitu qualchì mesi fà, u rumanzu di Marcu Biancarelli "Orphelins de Dieu" si passa in a Corsica di u 19u seculu cù i so banditi è a so viulenza. U più famosu è guasi l’eroe di st’opera magnifica hè u banditu Tiadoru Poli, u rè di a machja. Ma sapete quale ellu era ?



Quale era Tiadoru Poli, u banditu chì hà ispiratu à Biancarelli pè "Orphelins de Dieu"
Tiadoru hè natu in Guagnu in u 1797. Facianu 28 anni chì a Corsica era francese quandi u ghjuvanottu si face arrestà da un gendarmu chì avia l’abitudine di manghjà in casa soia (l’invitate, voi, i CRS a manghjà in casa vostra ?). Serenu, intelligente, struitu, di bellu parè, Tiadoru ùn dumandava nunda. Era cunsideratu cum'è disertore perchè ch'ellu ùn s'era presentatu à fà u serviziu militare.

Scappatu da a prigione d’Aghjacciu, u guagnese ùn hà più ch'è un'idea in capu : truvà u gendarmu chì l'hà umiliatu. L’aghjaccerà d’una balla in capu. U banditu Tiadoru Poli era natu.

Fù curunatu "Rè di a machja" da più d’una quarantina di banditi corsi adduniti in a furesta d'Aitone, u 21 di feraghju di u 1823, in a tradizione di Paoli. Face ancu vutà una custituzione chì serà appiegata da i cumpagni di Poli. Portanu cugnomi cum'è Bruscu, Mascarone, Picone, o Gallochju.

A banda armata ùn esiteghja micca à arrubà i preti arricchiti nant’à i poveri, à assaltà e gendarmerie, à tumbà i criminali (d'appressu à elli...) o à scapà un boie.

A Francia a sà : per cumbatte i Corsi, ci volenu Corsi. Nasce u "bataillon des voltigeurs corses", un corpu militare spezialamente creatu per fà a guerra à i banditi. Ma sti "voltigeurs" feranu unepoche di malfatte anch'elli (arrubecci, assassinii...).

Finisceranu per chjappà à Tiadoru Poli in u 1827. Serà tombu in u paese di Coghja induve si piattava è u so corpu serà espostu in Aiacciu. Una notte spariscerà è dapoi, nimu sà induv’ellu hè sepellitu. Oghje ci ferma sola a so zucca.

Quellu chì a lege culuniale di a republica chjamava « contumace », l’avemu chjamatu Banditu d’onore o ribellu. Nè bravu, nè gattivu, era solu una maglia viulente trà un’epica chì ùn era più è un'epica chì avia da nasce.

À st’epica, Napuleone III arruvina a Corsica à u livellu economicu, suciale è culturale. I Banditi cum'è Poli, affascinavanu certi autori francesi cum'è Mérimée, Flaubert, Daudet è tant’altri. Oghje tocca à Marcu Biancarelli di fanne un rumanzu di prima trinca.

Da leghje : l'articulu di Santu Casanova Tiadoru Poli, banditu publicatu in L'Annu Corsu, in u 1932.

St'articulu hè statu traduttu nant'à u situ Ampargu a lingua corsa.

u 24 di Nuvembre 2014
Pinnatu



1.mandatu da 30annidirestodiucore u 24/11/2014 19:34
Biancarelli, infine ricunisciutu da i soi.....era ora !

2.mandatu da forza poli u 24/11/2014 19:40
ci hè una storia appena cusì chì s'hè passata in L'Isulaccia di Fium'orbu, un centu di persone hè stata tomba, mi pare chì à l'iniziu ci sia un certu Marbeuf....da verificà

3.mandatu da Simon Tasega u 25/11/2014 17:43
Napoleone III arruvinava a Corsica in 1827 ? Cacciane un pocu, un era mancu in Francia a st'epica ! Elettu presidente di a Repubblica in 1848, ha fattu u so golpe in 1851. E da 1851 a 1870, ha fattu di piu per a Corsica che tutti quelli che so ghjunti a u potere prima di ellu, da Luigi Piombu a Louis-Philippe, e ancu u so ziu Nabulio che ci ha mandatu u generale Morand. E listessa affare per a fotografia. Sara di Poli che hè mortu prima di a so invenzione ?

4.mandatu da orfelindedieu u 25/11/2014 18:18
à mè mi pare un cosaque...

5.mandatu da Rispettu per l'animali ! u 25/11/2014 19:47
"o à scapà un boie" ... miserabile !

6.mandatu da J G u 27/11/2014 07:37
Un bellu romanzo vicinu di a verità e rimentendu chi suvente u corsu si ribella per via di una inghjustizia

Novu cumentu :


Seguitateci nant'à Facebook


L'articuli

Abbunatevi à a newsletter

Circà nant'à A Piazzetta