Accueil
Envoyer à un ami
Version imprimable
Partager

Red Bull nò, Mouss'or sì !

A Francia hà autorizatu a vendita di a bivenda Red Bull nant'à u so territoriu, addisperendu a ministra di a salute Roselyne Bachelot, chì era contru. Mutivu : ùn si sà si u Red Bull, imbuleghju cuncentratu di zuccheru, di caffeina è di taurine hè forse periculosu pè a salute... Ma piuttostu ch'è di beie sta purcheria, A Piazzetta sustene una bivenda 100% nustrale : u MOUSS'OR.



Red Bull nò, Mouss'or sì !
Mentre chì Roselyne Bachelot s'annerba contr'à Red Bull u dibattitu hè di sapè si a bivenda hè periculosa o nò.

Ci hè di chè ponesi e quistioni postu ch'ellu si dice chì in Svezia ci sarianu stati trè morti di spurtivi chì averianu betu troppu Red Bull d'un colpu...

Attenti dunque à i imbuleghji !

Ma s'è vo avete a paura di sta purcheria, sappiate chì in Corsica avemu ancu noi u nostru energy drink 100% nustrale : u Mouss'or

Bon, quì micca risichi di morre subbitu : nè taurine, nè caffeina, solu zuccheru è gusti artifiziali di mela è di caramelu.

Persunalmente, u gustu di a mela ùn l'avia mai intesu, è serà per quessa chì u Mouss'or si face chjamà di manera misteriosa u "cidre"... Ma in u cidre corsu, nisuna traccia d'alcool non più.

Dunque, sceglite puru ciò ch'è vo vulete chjuchjà st'estate. Cappiatevi ! Dumandate ancu voi un Jonnhy-Mouss'or, una Vodka-mouss'or o un Gin-Get-Mouss'or.

Più classa : u Curaçao-Mouss'or.

Si pò dinù circà di fà i cocktails :

V'assicuru ch'ellu esiste è ch'ellu ci n'hè chì ne facenu, andate à vede a pagina di stu tontu chì prupone un cocktail mele-suchju di mela, limone, amaretto è Mouss'or.

Allora avemu circatu di truvanne ancu noi. Avemu fattu unepoche di prove, avemu resu, è eccu ciò ch'è no vi prupunemu :

U nustrale : Mortula, Mouss'or è appena di menta. Da serve cun assai ghjaccioni. Propiu bonu è rinfriscante.

U manzanitacciu : Manzanita, Vodka, Mouss'or è un pezzu di mela. Micca male.

U "Paul Quastana" : Grenadine, Mouss'or, Malibu. Ùn ne pigliate micca più d'unu.

Più periculosu u cocktail bustanichese : 1/4 Acqua Vita, 1/4 Ballantine's, 1/4 pastizzu, 1/4 Mouss'or. S'è vo riescite à beiene trè da fila, site un lione.

Infine u "Jacques Séguéla" : Gin-Vodka-Mouss'or-Bailey's. Da fà beie ch'è à Séguéla, normalamente ne seremu sbarazzati per sempre.

D'astre edee di cocktails ?

Red Bull nò, Mouss'or sì !

u 22 di Lugliu 2008
U Sgaiuffu



1.mandatu da estrimei u 22/07/2008 08:31
per contu meiu, u "cidre" he a solla bivenda zuccherosa ch'aghju in casa mea.
e quelli chi anu i gusti americani, o u beienu o si ne stanu.

2.mandatu da Mazzone u 22/07/2008 08:52
Eu prupongu un mischju "Bébert di u Tianu" : Suze / Mouss'or

Per u Jacques Séguéla certi l'anu ghjà pruvatu : viaghja l'affare.

3.mandatu da Justerini & Brooks u 22/07/2008 09:53
l' "Umbertu Timpesta" : Tecchila-Rumu-Mouss'or-Cap-un'aliva piverunata.

4.mandatu da Carughjiu u 22/07/2008 11:57
U prima nomu chi aghjiu cunisciutu dino eiu pà u "Mussoru" ghjiè u "cidru" chi zitelli beviamu a u stadu di u gazeluccu in Aiacciu.

5.mandatu da Discuteca U Schifu u 22/07/2008 12:24
Difende i prudutti, va bè, ma o zitè, in veru, ghjè un stumacheghju, u Mouss'or !!! Odore chimicu è gustu di medicina !
Bouaaaaaaaaaaaaaaaahhhrrrr.....

6.mandatu da Tito u 22/07/2008 17:55
Ma vi site sminticate di dì chì u Mouss'Or era fattu cun e mele di u Viscucatu!
O sinnò per i "Coktail" è altri imbuleghji vi manderaghju u "contu-resu" da quì à sta dumenicata...

7.mandatu da Mazzone u 22/07/2008 18:07
Sò belle è bone ste chjachjare ma a vera quistione ch'omu si pone è di sapè ciò ch'ellu hè duvintatu u legindatiu "site du mouss'or".
A ringraziavvi.

8.mandatu da circinelludiguagnènativupèliguagnesusosanguaversatu u 22/07/2008 22:37
"mouss'or"... niente ch'è u nome hè un puema.

9.mandatu da Baretta misgia u 24/07/2008 20:24
L'agricultori c'hanni accunciatu dui coktails trimendi !!

U MOUSS'OR a l'inghjò e U SUZZ'OR a l'insù !!
Acqua acitòsa pà u primu e vinaccia pà u sicondu

10.mandatu da Cumpalliols u 28/07/2008 09:27
Eiu, aviu intesu què, si chjama u "Speciale" :
1/4 Whisky
1/4 Vodka
1/4 Pastis
1/4 Rhum

À serve in u più grande vichjeru ch'è vo truvarete.
Quellu chì riescenu à beie què d'un colpu, anu tutte l'altre cunsummazione di a serata ufferte.

11.mandatu da u pinnatu u 05/11/2008 16:17
Certi u chjamavanu "U REGALON" ind'è i veghji carrughji aiaccini !

12.mandatu da Kugùrn u 01/03/2009 19:53
schifezza

13.mandatu da u pastore di LAVATOGHJU u 14/10/2010 15:59
Si pò ancu fà : Acqua-vita ,morta è mouss'or hè bonu mà fà cula in celu dopu a quattri vichjeri

Novu cumentu :


Seguitateci nant'à Facebook


L'articuli

Abbunatevi à a newsletter

Circà nant'à A Piazzetta