Accueil
Envoyer à un ami
Version imprimable
Partager

René Vautier, artisgianu di e lotte

Sta dumenica u 4 di ghjennaghju, s’hè spentu René Vautier, sempiternu indignatu è artistu u più censuratu di Francia. Cineastu di e lotte, hà inventatu u sinemà ingagiatu. Umagiu à a so opera di resistenza.



Natu in lu 1928 d’un babbu operaiu è d’una mamma stitutrice, René Vautier raghjunghje a Resistenza à l’età di quindeci anni in lu 1943. Dopu à a guerra, aderisce à u partitu cummunistu è in lu 1948 sorte diplumatu da l’Institut des Hautes Etudes Cinématographiques.

René Vautier, artisgianu di e lotte

In u 1950, realizeghja à vint'unu anni u so primu filmu, Afrique 50, primu filmu anticulunialista francese chì serà pruibitu durante più di quaranta anni. À l’urigine, u filmu era una cummanda di a Ligue française de l’enseignement per mette in valore a missione educativa di a Francia pè e culunie.

Ma ghjuntu sopr'à locu, u cineastu decide di mustrà un antra realità : u travagliu furzatu, e viulenze di l’autorità culuniale di pettu à e pupulazioni trà a Côte d'Ivoire è u Malì.

Sta scelta sviata li valerà una passata in prigiò. Serà liberatu in lu 1952.


Ingagiatu in Africa, Vautier ghjunghje in Algeria di manera clandestina à partesi di u 1956 è participeghja à a lotta d’indipendenza cù u FLN. Gira dui ducumentarii famosi, Une nation, l'Algérie, oghje persu.

Per quessa, serà perseguitu per « atteinte à a sûreté intérieure de l’État » per via d’una frasa di u filmu : « L’Algérie sera de toute façon indépendante ».

L’altru hè L'Algérie en flammes chì si pò vede sottu :


Puru, tuttu ùn s’hà micca da passà in incantu pè iss’Algeria. Vautier passerà più di dui anni in prigiò, in Mornag po in Denden, induve cunnuscerà a tortura, accusatu d’esse un agente di Moscou o di cummercializà a Rivoluzione.

Cappiatu senza spiegazione, ùn tenerà mai rancore di st’episodiu à l’indipendentisti. In lu 1963, realizeghja Peuple en marche, filmu-bilanciu chì mostra u sforzu pupulare di ricustruzzione di u paese.


In lu 1972, u cineastu realizeghja siguramente a so più bella opera di fizzione Avoir vingt ans dans les Aurès. U filmu conta a diserzione d'un suldatu francese in Algeria chì ricusa l’esecuzione summaria d'un prigiuneru algerianu.

Prisentatu in Cannes, ghjè custì chì u grande publicu scopre veramente à Vautier. U criticu Louis Marcorelles dicerà ch’ellu hè « le film le plus libre, le moins conformiste que nous ayons vu en France depuis longtemps ».


Listessa annata, René Vautier si mette in greva di a fame dopu à a ricusa d’un visa di sfruttamentu pè u filmu Octobre à Paris, realizatu da Jacques Panijel nantu à a strage di i manifestanti algeriani in Parigi u 17 d’ottobre 1961. Dopu à un mese di greva, u ministru di a Cultura Jacques Duhamel finisce per cimbà.

Mentre a culunisazione è a guerra d’Algeria, u so sguardu s’hè purtatu nant’à d’altri sugetti cum’è e lotte suciale (Un homme est mort, Quand tu disais Valéry), a cundizione feminile (Quand les femmes ont pris la colère), u razzismu (Vous avez dit Français ?), a lotta contra à u FN (À propos de… l'autre détail) o a so Brittagna natale (Mourir pour des images).

Ancu s’ellu firmerà forse più un grande militante chè un grande cineastu, in issi tempi d’incertezze, ramintà u parcorsu di l’omu permette di vede chì s’è certi cumbatti sò stati necessarii d’altri sò permanenti è cuntinuveranu à fiurisce, aprendu, si spera, un’antra vita à a so opera.

V'hè piaciutu st'articulu ? Seguitate à Tilone nant'à Facebook, a pagina dedicata à u sinemà in lingua corsa.

u 6 di Ghjenaghju 2015
Tilone



1.mandatu da carlantò u 05/01/2015 23:59
bravu ! bellu articulu

2.mandatu da u turcu u 06/01/2015 16:04
bravi!

3.mandatu da J G u 06/01/2015 17:54
Bravi , eccu un bellu articulu ! hé una bona azzione di fà conosce l'omi di sta sterpa chi sanu apre e porte senza viulenza

4.mandatu da stumacatu u 09/01/2015 18:26
"(...) apre e porte senza viulenza"...?

Si leghju bè, mi pare ch'ellu hà vistu piu porte sarrate ch'aparte e un n'hà micca lampatu che fiore à i so nemichi...

Novu cumentu :


Seguitateci nant'à Facebook


L'articuli

Abbunatevi à a newsletter

Circà nant'à A Piazzetta