Sea, Sex, Sun o Vudcaccia ? U capatoghju di Camille…

A ragiò ufficiale, l’averete intesa : « les portovecchiais ne m’ont pas tous demandé de rester ». Chì bella infrasata ! Per quelli chì ùn l’anu micca capita, a vi la traduciu da a lingua pulitica à a lingua pupulare : « Sti catini di purtivechjacci ! Mancu unu m’hà dumandatu di stà. Ch’elli sterpinu ! ». Hè cusì ch’ellu parla stu furdanu di Camedducciu, da retu à a televisiò…

Ma da giurnalisti d’investigazione, simu noi andati à circà e vere ragiò… A seconda, hè più pratica. L’impiegati municipali ùn la facenu micca à rialzà a so carrega da ch’ellu abbia u capu più altu chè u tavulinu di u cunsigliu municipale… À quessa a ragiò, ùn ci credu tantu. L’impiegati municipali di Purtivechju ùn ponu esse più pessimi chè quelli di Bastia ! Ammusciatu, Camedducciu u Chjucu averebbe decisu di stà si ne in Aiacciu. Quallà, ùn ci hè prublema, face cum’è Sarko è Berlusconi. Si mette i tacchi !

A terza ragiò hè attempu umanitaria è ecunomica. Malgratu u focu di u scagnu di a CTC è a manghjeria di lasagne cunghjelate d’Ange Santini, u stoccu di vodka di a CTC hè sempre impurtante assai. À capu di i prublemi di fame è di sete in u mondu, Cameddu s’impenserisce per l’avvene. Eppò sti cartoni di vodka, ùn sò micca Ange, Tony, Polvè è Mondò chì l’anu da beie ! « Sò troppu sticchiti sò ! Sò elli i camelli… Sarebbe un peccatu, in tempu di crisa ecunomica d’avè spesu tanti soldi publichi per chì nisunu i si manghji o i si beva… In Parigi, sò ancu capaci à ripiglià si le e buttiglie sempre piene ! In tale situazione, u pueta Ronsart mi dicerebbe di sicuru : « O Camè, affacca ti ! Andemu à vede s’elle sò sempre piene e buttiglie ! Sai, dumane… ». »

Infine, a quarta ragiò hè più pulitica è edunista. Vistu i risultati di l’ultime elezzione, pare chì li serà difficiule di stà si ne in Aiacciu, in capu à l’Assemblea, dopu e prussime territuriale di u 2010. Da quì à tandu, li fermanu duie annate corte corte. S’è tù mi senti : « Carpe diem Camille ! »…