Accueil
Envoyer à un ami
Version imprimable
Partager

Séguéla ùn averà micca u so palazzu in bor'di mare... I pippol fora ?

U tribunale amministrativu di Bastia hà datu a so risposta : u permessu di custruisce di Jacques Séguéla in Cala Longa ùn hè micca legale. Dop'à a partenza di Michel Sardou chì ùn suppurtava micca i so vicini, hè un'antra vittoria contr'à i "pippol".



L'infurmazione hè cascata : hà vintu l'associu bunifazincu ABCDE chì cuntestava à u tribunale amministrativu di Bastia u permessu di cunstruisce di u publicitariu pariginu Ghjacumu... heu... Jacques Séguéla.

Séguéla, anzianu mitterandista è rè di a frittella (hà sustenutu à Royal à u primu giru è Sarko à u segondu) avia cumminciatu à custruisce un palazzu di 560 metri guadrati nant'à una pruprietà di dui èttari. Prublema : hè assoluttamente illegale... Ma a meria di Bunifaziu avia accurdatu u permessu.

Un permessu di custruisce illegale... ma quantunque attribuitu da a meria di Bunifaziu

Innù a zona induv'ellu vulia fà u so palazzu, Cala Longa, ùn si pò micca custruisce. Hè custì ch'ellu ci hè u famosu "Village des Italiens", residenza di lussu distrutta parechji anni fà da un attentatu. Ciò chì face chì u locu ùn pò micca esse urbanizatu.

Dimmula franca : ùn hè micca una gran'perdita per a Corsica.

Jacques Séguéla hè parangonu di u pippol pariginu ch'ùn ghjova veramente à nunda è chì vene à strascinà e so ciavatte in Corsica qualchì settimana d'istatina, pretensiunutu è talmente carcu à soldi ch'ellu pensa ch'ellu pò cumprà tuttu è à tutti.

Ma hè longa a cumpagnia di "l'amichi di a Corsica" chì si sò fatti u so casale in ciò ch'ellu ci vole à chjamà avà "l'extrême Sud", stelle has been di u sottu-show-biz francese siguri d'elli, chì portanu i valori di tuttu ciò chì a sucetà di cunsumazione face di peghju : Jean Reno, Christian Clavier, Karl Zero, Christine Ockrent cù u stracciu chì li ghjova di maritu è altre glorie di TF1.

Ùn mancanu più ch'è Lorie, Cauet è Bigard è averemu ciò chì a cultura francese pruduce di megliu.

A grande famiglia di i pippol amichi di a Corsica

Sò appena diventati i nostri paisani à noi. Si dicenu "l'amichi di i Corsi", ammiranu i "valori", "l'accogliu" chì l'indìgeni li facenu. Si vedenu l'estate vantà u nostru paese in e pagine di Corse-Matin è vanu à mustrassi à Via Notte, à mezu à una mansa di catini chì li montanu a sega.

Ma a so cunniscenza di u populu è di a cultura corsa si pò riassume à u rayon produits corses di u Super U di Portivechju.

Poveru paese diventatu in stu principiu di milleniu u bronze-cul di i putenti è di i ricchi, mentre chì u populu, poveru è affascinatu da sti mulizzi, si ritrova ridottu à diventà u muzzu o u spazzinu di sti tratechji chì venenu quì à mettesi l'écran total stracquati cum'è lonzi nant'à e nostre piaghje.

Venditore di bruschette o barman durante un mese è mezu, eccu ciò ch'elle sò e speranze di travagliu di a giuventù corsa. Infine, per quelli chì ùn anu micca avutu a scenza di rivende u so terrenu in bor'di mare à qualchì riccone...

Perchè hè siguramente quì u nodu di u prublema. A situazione ecunòmica di l'isula hè cusì pèssima chì certi corsi si ritrovanu in l'òbligu di vende a so terra o a so casa in paese per pudè campacciulà, è dopu sunnià videndu i beautiful people chì accatasteghjanu e buttiglie di champagne à Via Notte.

Allora, averà da durà torna assai sta cumedia ?

u 29 di Farraghju 2008
U Sgaiuffu



1.mandatu da San Nicula u 29/02/2008 07:49
Ancu a me, mi face assai piace. Per una olta che i dirriti di bor'di mare sò rispectatu! E una bonna nutizia.
Ma, un capiscu micca perche a merria di Bunifaziu da, cù sullicitudine, i permessi di custruzzione à i pippol. Per me a situazione ecunòmica di a Corsica n'hé micca u solu prublemu.

2.mandatu da pascalix u 29/02/2008 12:19
Eviva per una volte ch'o ne cacciemu unu fora. Tutti isti techji chi si compranu a nostr'isula a colpi di millioni un anu nunda a fà qui...

3.mandatu da bruscu u 29/02/2008 12:31
cusi a pensu ancu eiu . Sti francesi tecchi è culunialisti un nanu nuda da fà in CORSICA.Mancu Musulini ùn a pussutu sotumette l' accelli corsi.Attenti ô ghjiente ,quelli ùn abbianu da coumprassi anchu i nostri paesi ! ! ! !

4.mandatu da GWM u 29/02/2008 13:53
iè mà per unu chi si nè va (è ùn'hè ancu fatta)...?
DOSVIDANYA !

5.mandatu da u sanglisciu u 29/02/2008 14:39
@ san nicula : u permessu l'hà datu ATI LANTIERI, l'anzianu merre di bunifaziu chi ghjè un mulizzu finitu è chi hà lasciatu custruisce centinaie di "villà" nant'à e coste corse. chi porcu ! vergogna à i corsi impanzati (naziunalisti o no) chi s'empienu e stacche vindendu a nostra terra.

6.mandatu da ribella u 29/02/2008 18:59
A ringrazia l'associu ABCDE , bellu travagliu ! Qual 'chi sia a manera in tutti i paesi !
A omi schjetti voci pupulari !

7.mandatu da estrimei u 29/02/2008 21:00
per disgrazia, quelli chi si vendennu u nostru Paese so corsi(ommancu corsi ricunusciuti) e ...micca i piu disgraziati e chi ne facennu ancu u so mistieru -ci so chi ci piglianu assai piacè. un'he so ch'ellu face u deputatu,presidente di a Corsica?-
ma una decisione ghjusta di u tribunale 'un basterà ! u soldu he pudente! he ellu chi face i traditori!

8.mandatu da in cauda venenum u 01/03/2008 08:05
siete sempre attenti si volenu cumpra tuttu ancu a noi si cumprerianu. troppu corsi vendenu case e tarra ancu certi ch'un so bisugnosi. persa a lingua persa a tarra tantu ch'ellu c'he un soffiu ci vole a tenè un cappia nunda. felicitazioni a quelli chi anu lottatu
pe caccia issu seguela ch'ellu vaghi a caternu ma he longa a cumpagnia.
S'ANNU CUMPRATU U SOLE
E SFRUTTATU TANTE TARRE
CI CONTANU E SO FOLE
PE LAMPACCI TUTTI IN MARE L'ASSASSINI

FELICITEGHJU QUELLI CHI S'OCCUPANU DI STU BLOGGU E CHI FACENU SFORZI
PE TUTTE ST'INFURMAZIONI IN LINGUA NOSTRA

9.mandatu da renusinca u 01/03/2008 15:57
"è vanu à mustrassi à Via Notte, à mezu à una mansa di catini chì li montanu a sega. "

bravissimu!


10.mandatu da chantal u 18/04/2008 17:46
http://fr.youtube.com/watch?v=9CfFKf35tt8



faut que cete vidéo ne tombe pas dans l'oubli

Novu cumentu :


Seguitateci nant'à Facebook


L'articuli

Abbunatevi à a newsletter

Circà nant'à A Piazzetta