Accueil
Envoyer à un ami
Version imprimable
Partager

Semu salvi, hè ghjuntu Quick

Eccu, a Corsica entre infine in a civilizazione ! Pudete tichjavvi di rubbaccia in u più grande Quick di Francia chì si trova in Furiani.



Semu salvi, hè ghjuntu Quick
Finitu u tempu di e baracche di panzetta è di figatellu e sere di macciu in Furiani. Hè natu davant'à u stadiu Armand Cesari u più grande Quick di Francia : 800 metri quatrati (a ci dice Corse-Matin di u 22 nuvembre).

Iè, u più grande di Francia... ind'è noi ! Seremu cusì famiti o cusì baulli pè merità un tale onore ?

Bon và bè, ùn cumminciate micca : "oui mais ça va créer des emplois"... và bè, a sapemu. Ma forse qualchì picculu cummerciu di ristorazione chjuderà.

Ùn vale a pena non più di facci u colpu di u "oui mais vous n'êtes jamais contents, vous êtes contre la modernité, vous êtes archaïques..." À noi dinù ci piacenu i hamburgers, u Coca è i pomi fritti belli grassi, ùn vi feremu micca a lezzione nant'à a malbouffe.

Và bè dinù chì di tutte manere, a mundializazione hè cumminciata face un pezzu è finiscerà un ghjornu per ammazzacci.

Ma quantunque... U sìmbulu hè forte. Avà u circondu di Bastia s'assumiglia à n'importa qualessu lucacciu di Francia, à a periferia sinistra di n'importa qualessa cità di Seine et Marne.

U mudellu hè u listessu da per tuttu : lotissements senza anima nè identità, centri cummerciali, fast food... A cunsumazione à buzeffu cum'è unicu mudellu di sviluppu. Per ciò chì hè di e radighe, a storia, si ripasserà. A Corsica scambia à vitezza grande V, l'avete sott'à l'ochji.

A pupulazione scambia, cresce, ci volenu case custruite in furia, lochi per dalli à manghjà è falli spende i so soldi. I pulitichi rispunsèvuli di stu sviluppu anarchicu ùn si rendenu mancu contu di i disguasti ch'elli facenu.

È di siguru, corci ch'è no semu, cumplessati da a nostra isuluccia, da u nostru paisucciu, sottu sviluppati, in mancanza di i sìmbuli di a cultura duminante (quella di a télé, di a pubba è di e serie americane) cum'è no semu cuntenti di sta ricunniscenza tamanta : avà pudemu tichjacci in u Quick u più grande di Francia.

Dapoi a so apertura, u fast food di Furiani hè pienu à tappu. A mundializazione cuntinuveghja di sfragellà l'indentità è e culture, è ne semu i più cuntenti.

u 28 di Dicembre 2010
U Sgaiuffu



1.mandatu da Kalliste2b u 28/12/2010 10:10
Aio zite ! Basta sta mulizzeria ! Megliu un bonu pane dopiu untu cu panzetta, custigliole e figatellu !!!! Mica sta rumenza..

2.mandatu da Kalliste2b u 28/12/2010 10:14
E una volta tratecchji di sti "sandwichs a ressorts" cume dice u mo babbu, andarete forse a fa due corse a u magazinu bio in faccia !!!!! O pevar'a noi cio che no diventimu....

3.mandatu da U Palatinu u 28/12/2010 10:51
Hè vera.
L'aghju dettu eiu dinù, ma assai menu bè.
Dunque, nunda di particulare à sughjunghje.

4.mandatu da Ronald u 28/12/2010 12:23
Chi tanti quick!! Un bellu Mc do si.... E dopu un bellu couscous !

5.mandatu da estrimei u 28/12/2010 12:35
"enfin , Sgaiouffe , il ne faut pas etre retrograde !"
"pianu , pianu c"hanu amparatu a suttumetteci a a rubbacccia (cherne purcina chi un sente di nunda , frumagliu fattu a usu "metà reblochon, meta camembert ") , "la dinde de Noel" vi pare robba bona ? e tutte e "suggestions " di Natale o di Capu d'Annu vi parenu gustose ?
avà simu pronti a manghjà ancu peghju.
per disgrazia hanu a esse numerosi , i corsi a a moda (un so cum'ellu si dice oghje chi i termini cambianu tutti i ghjorni) a ticchjassi di cuicherie e chi un circheranu mai a cunosce u gustu di un bellu tianu.
quessa dinnù he culunisazione . he quella di u mundialisimu

6.mandatu da circinelludiguagnenativupaliguagnesusosanguaversatu u 28/12/2010 12:52
Bah ! Quiddu di Aiacciu ùn marchja tantu, mi !
à u principiu si vidiani i fili di vitturi ad aspittà u so tornu di essa sirvutu, ma oghji po...!

Ci vo' à dì dinò chi noi altri corsi ùn femi nunda pà guarantiscia è prupona una magnusca bona è "identitaria" : priferiti tichjavvi di quickburger o di falsiburger fatti cù i pedi cù ingredienti di pocu valori ?
Ind'un paesi d'Italia ani fattu scappà in dui mesi un McDo, chì l'usteriaghju in faccia si hè missu à prupona un "slow food" di qualità fattu cù i ricetti di u lucali...
Eiu in Aiacciu ùn vecu nunda di simuli ! Ci hè stata a tentativa "Merenda" à l'epica, ma di poi...

7.mandatu da ochju merlinu u 28/12/2010 12:57
ai ragiò o circinellutonomehètroppulongu

quì, preferimu tichjacci di rubaccia piuttostu che di circà di prupone altru affare

ùn avemu nè a vuluntà,nè u laziu, nè l'imaginazione pè circà di fà qualcosa d'altru


8.mandatu da nuit bleue u 28/12/2010 13:53
A dicu sempre ,a natura li dispiasce u viotu,chi ci era nanzu intornu a furiani per i spetatore di ballo, nulla!
Chi c'hè in Aiacciu a dumenica sera se tu voli manghja un pezzu,qualchi camio di pizza e po basta !
I corsi so cume l'ebrei, un travaglianu mica u "week end", chi collanu in paese, e lascenu a piazza a Mac do e altre quick chi vendnu a so rubaccia a tutti i disgraziati senza soldi.
Se no vulemu manghja roba nustrale principiemu pa prupone produtti lucali, e mica aspitta i batelli carci di roba frustera, cume i vitelli di "spangero" ,purcelli di China, o granu di Russia.
Un basta di critica sempre cio ch'elli facenu l'altri, bisogn'a fighja cio n'un femu per sorte d'issa dipendenza.

9.mandatu da imbecille u 28/12/2010 15:24
u prestu (quick) he per i corsi senza soldi,

u prizuttu di tre anni , u figatellu bonu , e l'arena per i francesi di i residenze secunde pieni di soldi e a cucina corsa carissima rivisitata da i chef francesi ( dos de loup au romarin a la moutarde de dijon -ricetta sartenesa di u 1755)

a noi u calendo , i merguez ,u cochonou e u vinu di u var ribatizattu rosé de corse fattu cu vinu varois

10.mandatu da TAZZACARNE u 28/12/2010 16:08
eccellente analisa di l'imbecille

hè faciule à dì "basta la malbouffe, hamburgers fora, ci vole à manghjà robba casana, prisuttu alisgianincu è casgiu calinzanincu"

ma sta robba i Corsi a si ponu pagà... una volta à l'annu !

allora chi ghje a soluzione ?

11.mandatu da Piatamò u 28/12/2010 17:16
Cunnisciti a passata d' u sameri bunifazincu ch era statu avvizzatu à ùn manghjà più è ùn bia più...

12.mandatu da nuit bleue u 28/12/2010 18:07
Roba corsa, un hè sola, casgiu e prisutu, se no vulemu pudemu pruduce 90% di cio che no manghjemu, ma ci si vole a sceglie; o un ecunumia assistanata di funziunarii pagati da u statu francese, senza parla di RMI, RSA e altri sicorsi, o mette in piazza una vera pulitica di l'agricultura, e di u sviluppu di l'intraprese corse, per esse prisente nant'u mercatu naziunale, e sopratuttu corsu.

13.mandatu da uquiccunustrale u 28/12/2010 18:12
merda e cumpagnia , paga di miseria e mulizzu a buzeffu , u sviluppu di a Corsica passa per u quick e u macdonald. Chi VERGOGNA , simu i piu forti in tutti generi di cumbine, industriale economiche culturale agricule

14.mandatu da Groquicku u 28/12/2010 18:46
à mè mi piace a pulenda è dinù i hamburgers
a paghjella è dinù black eyed peas

ma cumu serà che no simu i più forti per tutte e cunnerie di a creazione ? u più grande di francia, per chi fà ? per tichjacci torna appena di più ?

EVVIVA A DECERBELLAZIONE GENERALIZATA IN CORSICA

15.mandatu da picciaghjolu u 28/12/2010 19:34
è in aghjacciu, hè Baleone chì si sviluppa tal "plan de campagne", locu senza anima chì s'assumiglia anch'ellu à a seine et marne.

mà basta à vede i casatti di a ghjente in i cità, è di più in più in i paesi, per rende si contu chì u populu corsu ùn esiste più
basta dinnù à vede a ghjuventù corsa ch'ùn cunnosce nunda di a so lingua, ne a parla, ne a capisce. persa a lingua... persu u populu

in fine di contu, u quick ùn hè micca un segnu di scambiamentu è di mundialisazione, hè una cunsequenza, una testimunienza di più di ciò che no simu diventati.

16.mandatu da estrimei u 28/12/2010 20:00
nuit bleue le 28/12/2010 18:07
cume spessu so d'accunsentu nantu a parecchji punti.
a u to discorsu aghjusteria : imprese nustrale chi impiegganu corsi rispettati 'nu u so impieggu e ' nu a so pagga e chi rispettanu u so travagliu .
in una parulla un'ecunumia rispettuosa di tuttu u Populu corsu

17.mandatu da Per ride u 28/12/2010 20:32
O Nuit bleue (preferiscu NUIT CALINE...)

Tù l'ai contru à "un'ecunumia assitanata di funziunarii pagati da u statu francese, ..." senza rendeti contu chì ghjè u serviziu publicu chì face sempre viaghjà stu paese (scola, spidali,energia...), hè per ciò chì sarkozy è i so amichi "nustrali" cercanu di strughjelu.

In quantu à l'agricultori sò guasgi tutti "funziunarizati" chì campanu più di l'aiuti publichi cà di ciò ch'elli pruducenu. In più paganu pocu è micca impositi è anu a ritirata assicurata da u trasferimentu di u regime generale.

Cusì si capisce cumu hè ch'elli votanu di manera massiccia pà sti disgraziati chì ci acciaccanu.

PS pà sgaiuffu: saria stata una bona di mette a fotò di una banda di pacure nustrale.

18.mandatu da A prestu in Furiani u 28/12/2010 21:21
U peghju ghjè chi in piu di l'hamburger,mi piàcenu i filmi americani,a so musica,google,Paris Hilton,i cookies, ecc...,e i Russi ,Japunesi, Chinesi e altri chi manghjènu 'ssa "rubbaccia" chi sò?traditore?
Per mè u tuttu ghjè di tene a mente che no simu un populu cumè l'altri,ma sopratuttu micca un populu minore.
Eiu mi possu ticchja d'hamburger. Perchè: sò Corsu; aghju un Paese,una lingua,una storia,una cultura, e u Quick un mi facce micca paura.(serà megliu u Flunch?)
D'altronde chi hannu di Corsu l'osterie di Bastia,d'Aiacciu o di Portoveck.
Tuttu què un è che cummèrciu.

19.mandatu da nuit bleue u 28/12/2010 21:21
ie ghje què u sognu di u populu corsu, un paese di funziunarii, pagati per u statu francese, puderemu ancu urganiza per i touristi falsi attentati, cu clandestini a u serviziu publicu, paghiellaghji e cantarini pagati a u smic, done vistute di neru nant'un sumeru, falsi pastore in pilone .......chi piace, un populu sanu a u serviziu di i pumataghji, chi bella vita, 35 ore a settimana e u pane sicuru.
Rileghjite a fola di LaFontaine "U lupu e u ghjàcaru"

20.mandatu da Bâton de berger... u 28/12/2010 23:20
Pè u prugressu di a suciètà eo bramu chi stu Quick diventi prestu prestu Hallal..!!

@ Per ride.. una "banda"di pecure ùn si dice in corsu "Una Reghja" ?

21.mandatu da imbecille u 29/12/2010 07:42
ci vole produce robba corsa a bon pattu

e lampa in mare i cochonu e e casgi francesi

un azzione ?


22.mandatu da anto u 29/12/2010 08:11
Fatè cume mè un ci metite i pedi ,e da qui a pochi mesi chiudera !Un'aghju mai manghjatu una sola volta ,in una di ste gargote ! Ma u corsu ha cambiatu ,e cum'ellu compra i "mendl o i millet " si campa a manghja u so big mac !

23.mandatu da MARCUCCIU u 29/12/2010 11:40
aveté tutti raggio !! per contu meiu u quick un mi disturba tanttu,chi un ci mettu i peddi.MA...MA...Per capu d'annu aghiu cumpratu u caprettu. Ma u prezzu????un vi ne dicu nunda. 29 euro u kilo .Pulenda hé caprettu a l'istrettu chi maravIia.Per sta volta mi bastera.U dui hè u tre di l'annu mi né anderaghiu a manghia a u quick,cusi mi rivenera menu caru.Un mi gherba tanttu, ma per una volta !!!!!

24.mandatu da Guizzu u 29/12/2010 15:16
Fate cume me! Un andate micca !!!

25.mandatu da Per ride u 29/12/2010 18:09
à "bâton de berger" (chì putenza !)

Isiè si dice una greghja ma una banda l'aghju sempre intesa è po ùn sdice mancu appena cù "bâton de berger", nò? (ch'elli mi scusinu i zitelli chì ci leghjenu).

O amicu "nuit bleue" (preferiscu nuit de chine), ma ci semu , u to sunniacciu ghjè a realità d'oghje, ma... ci hè una piccula diferenza.

I cantarini chì cantanu pà i turisti "l'armata ..."," ribellu", "sò elli" a facenu pà u so prufittu è quellu di l'usteriaghji, è non solu ùn parlanu micca corsu ma ùn capiscenu nulla à ciò ch'elli cantanu.

I magazini di "suvenire" vendenu portachjave cù u "cagularu", ci sò l'adesivi cù u rivolvaru "jamais soumise..."

È po , è po ùn sò l'agricultori chì volenu esse pagati da u statu postu ch'elli "intratenenu a natura"?
È i prudutori di farina castagnina chì volenu soldi capunanzu postu ch'elli prevedenu a morte di u castagnetu corsu.
E cartuline cù e donne corse fasciate cù u mezaru, u banditu corsu armatu, u sumere è u pastore... quesse l'emu avutu 80 anni fà.

La Fontaine a scrittu ancu "u porcu è u cignale", ma mi pare ch'è ùn vulemu più esse salvatichi... euh... vuliu dì LIBARI;

26.mandatu da Bâton de berger... u 29/12/2010 18:38
@ Per ride.
Iè, "reghja" "greghja" è dinù "Reghjone" (o Greghjone..).. ghjustu pè di cum'ell'era ricca è Antica .. a lingua nostra. Pè u "bâton de berger" mi pare ch'ellu po andà incu una marca cume Quick, postu chi oghje a ghjente in generale (è i giovanni sopratuttu..) manghjanu "marche" più che robba.... dixit Perico Legasse.

27.mandatu da justin brade pas tout u 29/12/2010 20:16
U Quick in furiani !! ma i corsi u campanu micca tutti in Bastia?!
L'usi di campa mundiale mettenu in periculu a nostra vechja cultura ,è st'usi nimu i po para.
Salvemu a nostra lingua ,è sera una bella victoria .
Una ruchjata di pecure si dice ancu cusi.

Un salutu a A Piazzetta chi participeghja a fa campa a nostra lingua.

28.mandatu da Bâton de berger... u 29/12/2010 20:58
@ per ride : Porcu VS Cignale ?? U megliu ùn serà u razzone..rusticu (Liberu) mà

dinù adattu à a vita oghjinca è in più di què.... assai più pericolusu postu ch'ellu hè menu

salvaticu..

a bona sera à tutti l'amichi di "a Plazetta".

29.mandatu da Donluicu u 30/12/2010 10:27
Torna una volta, hai raggió... E di tutta manera si profita più di un Quick o McDo di tantu in tantu in cuntinente , chi qui, tutti i ghjorni. Torna una mulizzeria chi ghjunghje qui.. Cume e malatie , mà appena più tardi, grazia u mare!

30.mandatu da topupinutuazezzu u 30/12/2010 14:28
ghjè colpa di u 'tititainement" :

"...Dans un monde globalisé où ...un nouveau concept pour désigner « le pain et les jeux » de la société moderne décadente : le « tititainement », mélange de Disneyland, de Coca Cola et de Mc Donald’s..."

fonde : http://www.cahiers-pedagogiques.com/spip.php?article116

da riflette...

31.mandatu da cqfd u 30/12/2010 14:53
eccu o Donluicu... un "mc do" in cuntinente di tantu in tantu ùn face male à nimu, à mè mi piace è face parte di u viaghju

ma "le plus grand quick de france", face veramente paura.... aghju l'impressione chi a pupulazione di corsica hè cume una "oie" ch'ellu ci vole à ingrassà in furia nanzu d'amazzalla per avè u "foie gras".

tous à l'abattoir ! e ci vanu à corri corri....

32.mandatu da Pietralunga2a u 30/12/2010 18:49
Un si manghja piu Che rubaccia ... Graisse hydrogénée, hormones, antibiotiques... Etc

Novu cumentu :


Seguitateci nant'à Facebook


L'articuli

Abbunatevi à a newsletter

Circà nant'à A Piazzetta