Accueil
Envoyer à un ami
Version imprimable
Partager

Senza essenza, più sbacca

Avete a paura di mancà di gasoil per via di a greva in Marseglia ? Ùn v'inchietate, à mumenti ùn ci ne serà più indocu.



Senza essenza, più sbacca
A greva di i camalli in Marseglia hà messu a panicca in e stazioni essenza di Corsica. Da per tuttu, listessi scrittoghji : "ùn ci hè più gasoil".

Bon và bè chì ùn aviate da piglià una vittura chì marchja à u diesel.

Avà ùn sapete cumu fà, circate di risparmià l'essenza, pruvate à piglià a vostra vittura u menu pussìbule.

Finiti i giri chì ùn finiscenu più nant'à u Corsu Paoli in Corti o nant'à a Traversa in Bastia. Tantu peghju s'è vo vuliate flambà cù a vostra Smart ch'è vo veniate di cumprà, ghjè a crisa ! Ancu quelli chì sò in Cayenne ùn facenu più i macchi.

Tutte manere, ci vulerà à abituassi. Ùn si sà ancu veramente quandu accaderà u "peak oil" o s'ellu hè digià passatu, ma girandulà ore sane in cità "pour voir qui y a" è pè mustrassi hè qualcosa chì appartene à u seculu passatu, cù u minitel, i dischi in vinyle, e Reebok Pump è José Rossi.

Sapete, u "peak oil " hè u piccu di a pruduzzione di petroliu, u mumentu quandu e quantità in a terra cumminceranu à sminuisce.

Voi chì pensavate cum'è J-R in "Dallas" chì l'oru neru ùn mancherà mai vi sbagliate. Ci volenu millioni d'anni per fà u petroliu è e riserve ùn sò infinite. Ma l'omu fraza tuttu senza inchietassi di e generazioni à vene.

U risultatu hè chì ùn ghjornu, essenza ùn ci ne serà più. Ùn hè micca per sùbbitu, ma in tantu u so prezzu ùn ferà ch'è cresce. Hè l'ecunumia mundiale chì serà distabilizata, ma dinù a nostra manera di campà, di viaghjà, di manghjà... Ancu chì in un recente raportu , l'armata alemana prevede u peghju in l'anni à vene, scambiamenti maiò, insecurità è demucrazie scuzzulate.

Ma si cercanu suluzioni per ùn avè à esse troppu dipendenti di u petroliu. Ùn hè ch'è tantu, i circadori di un'università di Scozzia (Edinburgh) anu trovu un bio-carburante fattu cù u whisky.

Eccu una pista di travagliu pè l'università di Corti. È s'ellu si circava di fà un carburante cun l'acquavita ?

u 5 d'Utrovi 2010
U Sgaiuffu



1.mandatu da estrimei u 05/10/2010 11:45
l'acquavita sì , ma u whisky nò !
ci 'ole a disparmialu pe Via Notte , pe l' "acapulco" e tutti sti lochi induve a sbacca primureghja

2.mandatu da Benzina u 05/10/2010 11:58
ù petroliu pare ch'ellu ci sia ancu à u largu di e nostre coste..puderiamu finanza l'indipendenza tandu no ?? dopu à Total è Mobil ci saria à "Corsican Petroleum" più bisognu di piglià soldi francesi...diventeriamu l'Arabia di u mediterraniu èpo (l'Arabi l'avemu digià.

@ estrimei, i ghjovanni ùn hanu dirittu di fà a festa è sorte ancu indè ste "Boîte di notte"..??

3.mandatu da estrimei u 05/10/2010 13:27
fassi rimercà , fà a festa , piglià e briachine , campà giovani quand'om'he giovani ?
u cunosci u dettu o Benzina : " giuventu , giuventu , una volta e po piu "?
a manera d'esse di i giovani a cunoscu...... chi so statu giovanu anc'eu . a a giuventu li diceraghju cume u corsciu di de Ronsart , ma per quessa un c'he bisognu di cumprà robba di pocu valore a prezzu sprupusitatu per fà u "maccu " cinque minuti. e po , u peghju he , ch'elli so i piu disgraziati chi facenu, u piu , i sbacconi .
a sulidarità seria dinnu di un scurdassi chi corsi chi toccanu 1000 € u mese per mantene una famiglia, ci n'he parecchji!

4.mandatu da Benzina u 05/10/2010 13:49
Ai ragio Estri..So sempre quelli chi n'hè hanu u menu chi volenu mustrà i so soldi, mà st'affare si po custatà ancu pè a scelta di i vestiti o di e vitture.. a miseria o u pocu soldi in Corsica hè piatattu è mai ricunisciutu.....simu latini...!!

5.mandatu da anto u 05/10/2010 16:41
Agju intèsu di chi in Corti è ricerche avianu dighja cuminciatu in du laboratoriu di l'Oriente !!

6.mandatu da Shérazada stamane u 05/10/2010 21:26
Petroliu in Corsica ?!? Ci serà prestu l'Emir di a Costa Verde o di Purtivechju....è po assai Vizir cume Iznogoud...c'avemu dà campà incu tutti sti petrodollari...

7.mandatu da Avulpaccia u 05/10/2010 21:34
Bon si pò dinù fà meza acqua vita , meza wisky per fà un pienu cusi serà più llongu hà fà smarisce issi delizii umani.

Cume si fecia mezu "mazout ", u rossu per l'agricultori in più menu caru ... é mezu "gasoil"... Ancu s'hè avà hè difesu...

Mà bon, "hà chì cummandà fà legge"...

8.mandatu da Monte castellu u 06/10/2010 10:07
Gasoil no ma sumeroni si.

9.mandatu da ghjuvan'marcu u 06/10/2010 10:28
O Antò, à l'Oriente cum'è ava ind'è stazzione di serviziu, c'è scrittu nant'à e pompe " à cunsuma 'ncu muderazione". Un è per nunda ch'in francese a parolla "pompa" t'a parechji sensi: a pomp'a essenza (o a aria per l'imbuffati), a lussutura, i scarpi e i funerali; in tutti casi, ci vole à esse mudesti e ùn sceltà e più grande.

10.mandatu da Paglia.. u 06/10/2010 14:23
Senza essenza è senza viulenza chi ne sarà di i corsi...???

11.mandatu da Avulpaccia u 07/10/2010 15:30
O paglia ci serà a pazienza...

Novu cumentu :


Seguitateci nant'à Facebook


L'articuli

Abbunatevi à a newsletter

Circà nant'à A Piazzetta