Accueil
Envoyer à un ami
Version imprimable
Partager

Sgualtri cum'è i misgi...

Guardate lu stu filmu misgescu è/o ghjattarinu... À quale vi facenu pensà sti misgi?
A vi cunfessu, guardendu stu filmucciu, mi sò venuti in capu centu ritratti di i nostri puliticanti... Viaghjate, fiure di u mo estru! Scappate : grugni, nasoni è merletti impulveriti, goffi chè vo'site! Aiò, ùn ci saranu chè quessi i ritratti? Puh! Ùn si vede più chè e so facciacce in carrughju... Basta !



Ùn saranu pò sgualtri cum'è i ghjatti, à saltà d'un partitu à l'altru, d'un elezzione à l'altra, i nostri puliticanti? Dopu tanti schjaffi eletturali, ùn sò pronti à turnà à u macellu? Ùn cappianu mai elli! U si tenenu u so carrigone, incù e so sgrinfie! Sò misgi accaniti sò !

Fighjate... Sò codilonghi, asgiati, tranquilli. Hè u maestru chì li dà à manghjà. Senza l'elettori, senza voi, ùn si manghjerianu chè pomi! Intantu, postu chì vutate per elli, sò belli sazii. Certi avianu prupostu di verificà l'evuluzione di a furtuna persunale di l'eletti. Sò chjachjare! Ci volerebbe misurà a so panza. Una prima volta nanzu à l'elezzione è una seconda volta, à l'usciu di u mandatu. Tandu sì chì seriamu stupiti... Digià, à ochju, cusì, pare chì i primi risultati fussinu pusitivi per certi. Hè cum'è quandu vi fate arrestà di notte tempu da i giandarmi. S'è à ochju ùn parite micca briacu, ùn vi faranu micca suffià. Invece, s'è per strada trincate à quandu à diritta à quandu à manca, tandu pò sì chì vi facenu suffià è tandu, ci site...

Appuntu, parlendu di manca è di diritta, di sta strutturazione antica di a pulitica, oghje chì hè oghje, hè finita... I nostri misgi saltichjeghjanu d'un banda à l'altra di u terrenu puliticu. Sò più sgualtri chè i ghjucatori di Bastia! L'incroscianu elli a maglietta !

Eppò, posti ch'elli portanu a maglietta di u so partitu, i nostri puliticanti ci facenu vede i so peli. Sò piluti quant'è i misgi. Ne vulete esempii? Basta à guardà i nostri capizzoni. Invece, d'altri, cum'è José Rossi, anu capelli quant'è elettori, i corci! Sarà funzione di a pilosità u risultatu di l'elezzione? S'ella hè cusì, sarebbe ora chì certi vaghinu à fassi duie impiantazione. Ùn si sà mai...

Eppò aghju rimarcatu chì l'omi pulitichi sò basgiarini quant'è i ghjatti! A sapite perchè? Ùn sò pò ridiculi à salutà ci tutti tutti? Ùn hè mancu perchè n'anu una techja d'accatastà tutti i microbi di e mani di u mezu mondu. Iscia! Di fatti, hè per via d'una malatia prufessiunale. À chì si sente u spinu, à chì si sente a manu. Ùn l'avete voi a tendinita di l'elettu? À rombu di stringhje e mani di tutt'ognunu, li vene una pena à u polsu... Di quelle! Tandu, ùn ci stringhje più e mani ma ci basgia! Mi stumacanu cù a so lingua bavacciulosa !

Infine, per d'altri, i misgi sò un antru affare. Micca eletti, nò. Sò ciuffuletti brutti è mullizzosi, fatti di capelli, di peli è di polvera chì si ficcanu sott'à a mubiglia. Ùn basta à caccià li una volta chì tornanu sempre. Allora quist'annu, per piacè, ùn aspettate à Pasqua per fà a pulizia...

l'8 di Marzu 2008
Zumar Ahmed



1.mandatu da Paulu u 08/03/2008 07:32
E chì pensà, à prupositu di microbi, di l'elettori chì piantanu micca di liccà u culu à sti puliticanti prufessiunali ?

2.mandatu da Zumar Ahmed u 08/03/2008 08:58
Sò attempu microbi è maestri. Anu una respunsabilità tremenda, à u so livellu. Ciò chì impreme hè ch'elli sappinu ch'elli sò liberi, in l'isulatoghju, di sceglie u misgiu u più aggalabatu à ammaestrà una pulitica chì fussi à prò di tutti, di u cummunu è dunque per elli dinù...

3.mandatu da GWM u 08/03/2008 13:08
Allora chi fà ?

Novu cumentu :


Seguitateci nant'à Facebook


L'articuli

Abbunatevi à a newsletter

Circà nant'à A Piazzetta