Accueil
Envoyer à un ami
Version imprimable
Partager

"Simu di stu paese", chì hè ?

U cullettivu "Simu di stu paese" chjama à manifestà, ripigliendu una riturnella d'una vechja canzona di A Filetta, esciuta 30 anni fà. L'occasione di turnà à scopre i capidopera di stu gruppu, chì forse micca tuttu ognunu cunnosce.



"Simu di stu paese", chì hè ?
"Simu di stu paese", cunniscite u cullettivu ì chjama à manifestà sabbatu u 10 di maghju in Bastia.

Avete vistu a video. Cunniscite e ragioni di sta manifestazioni : statutu di residente, cuufficialità, statutu fiscale, avanzate istituziunali. Tutte ste rivendicazioni sò state purtate da una magiurità d'eletti corsi è sò magiuritarie in l'opinione ma per avà e porte in Parigi fermanu chjose.

Da leghje : « Pourquoi faut il aller manifester demain ? » nant'à Corsica Infurmazione.

Ma u nome di sta mossa face ribombu à una riferenza più antica chì micca tuttu ognunu cunnosce.

Si tratta d'una canzona di u gruppu A Filetta, esciuta in u 1984 nant'à u discu "Cun tè". A canzona si chama "I Mufrini" (hè ortografiata cusì), è a riturnella dice :

Simu di stu paese
È ci vulemu ingrandà,
Simu di stu paese
È ci vulemu imparà,
Simu di stu paese
È ci vulemu campà,
Simu di stu paese
È ci vulemu campà.


Ci vole à crede chì, trent'anni dopu, hè sempre cusì d'attualità.

Da vede l'accordi nant'à Sunemu per quelli chì volenu sunà.

E parolle sò state scritte da Ghjuvanteramu Rocchi, a musica hè di Ghjuvanclaudiu Acquaviva. Nant'à stu discu si trova dinù a cusì bella canzona Cumpagnu.

Hè u terzu album di A Filetta, dop'à u straputentissimu Machja n'avemu un'antra esciutu in u 1981 : Terra Brusgiata, Vogliu Esse, À a riscossa, U Pagliaghju d'Ostriconi, Euskadi, Ste mane quì. Ùn vi pare nunda ? Hè siguramente unu di i più belli dischi corsi.

Dopu ci serà O vita (1982) cù A Paghjella di L'Impiccati, L'Orrida Bestia, è una paghjella storica chì face riferenza à l'occupazione facista :

Avertite à « Musulinu »
Chi hà tanta pretensione
S’ellu ùn hè più chè scimitu
Ch’ellu fia attenzione
Ch’ell’ùn appia da ingolle
A pulenda di granone.


Venerà più tardi In l'Abbriu di e Stagioni (1987) cù una bellissima versione di A viuletta è Pè 'ssu dumane è dinù Di l'aghje.

In i prussimi album A Filetta piglierà una via di più pulifonica. È ci rigala a magnifica Muntagnera (discu Una terra ci hè, 1994) chì conta u viaghju di pastori niulinchi versu u Falasorma.

Francamente, ùn hè manc'appena male tuttu què nò ?

Per vede a discografia cumpletta andate à vede nant'à L'Invitu.













u 10 di Maghju 2014



1.mandatu da u rossu u 10/05/2014 13:40
grandissime canzone. RISPETTU !

2.mandatu da anto u 10/05/2014 14:52
Simu stati burlati da i pulitichi chi ci hannu prumessu l'impussibile ,purtantu un so micca tutti venachesi .In cu a riforma prevista a sorte di a Corsica mi pare male andata .

3.mandatu da RiToN2b u 16/05/2014 00:38
Veramente voce chì sudanu a Corsica, chì émuzzione

Novu cumentu :


Seguitateci nant'à Facebook


L'articuli

Abbunatevi à a newsletter

Circà nant'à A Piazzetta