Accueil
Envoyer à un ami
Version imprimable
Partager

Sporting : i razzisti battenu à Libourne-Saint-Seurin 2 à 1

Bastia ferma in corsa per a cullata in Liga 1 cun sta vittoria strappata à l'ultimu minutu. È ricummencianu l'accuse di razzisimu...



A partita :
I Bastiacci parianu stanchi venneri sera in Furiani. Contr'à una squatra di Libourne ultra-defensiva chì lotta per ùn falà, cù un purtiere scatinatu chì parava tuttu è cù un arbitru estrosu, numerosi eranu à dissi chì sta partita ùn si pudia vince.

Ma sti ghjucadori anu avutu u mentale è e trippe per andà à circà a vittoria è marcà à l'ultimu minutu. Chì partita !

Sò trè punti preziosi per a corsa à a cullata ma sta vittoria hè sopr'à tuttu impurtante d'un puntu di vista psicològicu dop'à avè persu lunni in Nantes in l'ultime segonde.

Appughjate quì per vede e riazzioni dop'à a partita

"L'affare" :
Dop'à l'accuse di razzisimu à l'andata in Libourne è u famosu "affare Kébé" chì hà sbuccatu nant'à un puntu di penalizazione pè u SCB, i sustenidori ùn pudianu stà è anu tenutu hà marcà u colpu. Cusì anu esciutu nanz'à u scontru un striscione cùn scrittu nantu "Kébé on est pas raciste... la preuve on t'enc..."

Missagiu insultante è micca assai fine, d'accordu. Ma razzistu ?

Troppu cuntenti, i media si sò spicciati di cummunicà nant'à un "episodiu novu di razzisimu in Bastia". Ùn ci hè vulsutu tantu per aspettà a riazzione di u presidente di a LFP è ch'ellu ghjochi u rollu di u stumacatu chì n'hà da finisce cù sta banda d'hooligans corsi ch'imbruttanu a fiura di u so bellu campiunatu francese.

Ma ch'o sappia, affari sìmili si ne vedenu ogni dumenicata è nant'à tutti i terrenu di ballò di u pianeta.

I suciòloghi anu trattatu st'aspettu : intorn'à i terreni, ci vole à insultà l'altru, circà di destabilizalu, pocu impreme a manera. U stadiu di ballò, hè appena cum'è à u carnavale. Tutte l'insulte sò permesse, a viulenza hè canalizata.

Hè cusì, hè u propiu di u ballò, sport u più pupulare in u mondu.

Basta à fidighjà tutti l'anni a finale di a cuppa di Francia, quandu u presidente di a Ripublica li tocca à salutà i ghjucadori è falà in campu. Ch'ellu sia statu sott'à Mitterand o Chirac, sempre sò stati fischjati è insultati, spessu da quelli chì l'avianu vutati qualchì mese nanzu. Pigliemu a scumessa chì Sarkozy ùn a si francherà...

Allora ci puderemu lagnà, ci puderemu dì chì u sport ùn hè micca què, si puderà pienghje nant'à i valori di Pierre de Coubertin chì ùn sò più quelli, si puderà dà tutte e lezzioni d'umanisimu è di tulerenza ch'ellu ci vole... Ma l'omu hè cusì fattu, u populu hà bisognu di sfucassi à u stadiu chì empie un rollu catàrticu.

Insulte è striscioni cum'è quellu di venneri sera, ci n'hè tutte e dumenicate in Francia è innù u mondu. Ma hè cusì, i francesi anu a scenza d'avè a so minurità cun quale si ponu sfucà. Anu dirittu di cacciassila cun noi, mai nimu ùn li ferà u rimproveru di stupacci addossu.

I Corsi, nanzu eranu corci è primitivi. Sò stati dinù terruristi, assassini è assistati, scrucconi dinù. Avà in Bastia semu u publicu u più razzistu di Francia.

D'una certa manera li permette d'esse rassicurati. I gattivi, i storti, i goffi semu noi. À elli u prugressu, a cultura, a bellezza...

Hè cusì a storia di i populi sottumessi.

Sàbatu u 23 di Farraghju 2008
u webmaestru



1.mandatu da GWM u 23/02/2008 23:55
a fine di l'articulu vale tutte e chjachjare di u mondu.
Allora avà chi fà ?

2.mandatu da ribella u 27/02/2008 18:56
E lezio li venenu da in altu : "Casse-toi pauv'con! " di Sarkozy
Ancu u ditu in 'aria di Kébé un hè riferenza pè i soi nè mancu di pettu à a nostra bandera!
U giurnalistu di l'emissione spurtiva di FR2 dumenica à un'ora è mezzu a bisognu di temesta pè tene a pena a so lingua ancu di grazia i spurtivi eranu piu à l'altura cume Courbis.
Ma hè vera chi u sport hè sfocu, forse chi i giovani chi si cumportanu cume Sarkosy, averianu da ripiglia u mendu corsu , fà di piu Sport è tene è so forze pè lotte piu ghjuste!

3.mandatu da ribella u 28/02/2008 16:18
Mi so scurdata di a fine : FORZA BASTIA
Lotta giuventu! qual chi sia a manera!



4.mandatu da wael u 30/08/2008 13:24

5.mandatu da wael u 30/08/2008 13:25
qt://://">[

Novu cumentu :





Seguitate A Piazzetta nant'à Facebook


Ricircà nant'à A Piazzetta