Sporting vs Gazelec : u macciu !

1. L'anzianità
U Gazelec hà festighjatu quist'annu u so centinariu. U Sporting l'hà fattu cinque anni fà. Ma ci vole à dì chì u nome "Gazelec" hà solu Cinquantu anni, dopu a fusione di a JSA è u Bistrot. Hè u sporting a prima squadra di ballò à esse nata in Corsica, fundata da u svizzeru Ruesch prufissore d'alemanu in Bastia.
Cunclusione : puntu per... u Sporting

2. U publicu (quantità)
A forza di u Sporting à mubilizà in Corsica è in altrò ùn hè più da dimustrà... è per u Gazelec hè listessu ! Tuttu ognunu si ramentu issu dispazzamentu in Amiens, dui anni fà per un 32esimu di finale di a cuppa di Francia : un aviò pienu per andà à vede ghjucà una squadra di CFA ! I vicini (o "l'altri", si dipende, ne sò ghjelosi ancu avà !). Omu si ramenta dinù chì Mezavia (o piutostu "Ange Casanova") era troppu chjucu per accoglie u PSG di Giuly, Landreau è Hoarau. Peccatu, u publicu di u Gazelec hè quasgi solu gravunincu. Bastia hà ancu gruppi di sustenitori... in Alimagna è in Rumania !
Cunclusione : puntu per... u Sporting

3. U publicu (magagna, pressione)
Trà a tribuna Petrignani (anziana "Est") è a tribuna "coté route" u cumbattitu hè tremendu ! Chì disgrazia chì issi dui tribuni ùn esistenu più oghi , in issu statu (forze una "mise aux normes" vulsuta à posta da a FFF da facci perde appena di a nostra anima). A "Est" impaurava tutti i ghjucadori di u mondu mentre chì u "coté route" i facia mantagà !
Oghji i sustenitori bastiacci sò luntani di u terrenu è hè più difficiuli di mette a pressione. Invece in Mezavia, basta centu parsoni per mette u focu in i tribuni. Megliu ! A spessu sò quelli in VIP chì lampanu i mughji è i canti quandu in Furiani l'omi incustumati beienu u champagne è manghjanu i sandwiches. In Mezavia, anu ancu scambiati di locu i "bancs de touche" per mintene i frusteri in vita !
Cunclusione : puntu per... u Gazelec

4. U publicu (animazione)
Dipoi a falata in lega 2, u Sporting hà difficultà à vede a ghjente vultà in Furiani ma sapemu chì basta pocu per rinvivisce a fiara. Ne ponu testimunià Auxerre dopu à un trè à zeru in coppa di francia è Strasbourg dopu à un certu "huis clos". In Mezavia, l'avemu dettu, cì hè ghjuntu u PSG in un stadiu pienu à tappu. Disgrazia, a ghjente era vinuta "in Dockside" per vede i parigini è micca per sustene l'aiaccini. Manc'un fumì ! Mezavia hè diventatu issu ghjornu u solu stadiu d'Auropa induva cì hè più ambianza incù 300 parsoni chì incù 3000 !
Cunclusione : puntu per ... u Sporting
Rimarca : i sustenitori di u GFCOA provanu dipoi dui anni d'aiutà u club d'un'antra manera incù i Socios.

5. U stadiu
Si pò sceglie trà u Mozambique è u Kosovo ?
Uriginalità : in Furiani si pò coglie i fichi è in Mezavia i lamaghjoni facenu assai mori ! Corci A. Cesari è A. Casanova...
Cunclusione : parità

6. E "Mascottes"
U Diavulu contru à u Leone ! A vede a facia di Gregory Coupet in 2000, hè più impressiunante un tippu in rossu arrabiatu chì vi core appressu incu à so forca chì un omu incustumatu chì s'assumiglia à Footix !
Cunclusione : puntu per ... u Gazelec

7. U scemu di i tribuni
Ogni paese, ogni famiglia hà u so scemu o u so parsunaghju. Hè listessu per i nostri club. Cappone è Zimako. ùn cì po esse un scontru senza elli. Unu hè cunnisciutu per vene in Furiani incù u so ghjacarucciu biancu è neru vestutu da a maglia di u sporting; dipoi qu'ellu hè passatu in Telefoot hè cunnisciutu in a Francia sana !
Zimako, ellu, so l'arbitri chì u cunnoscenu; dumandanu sempre quand'elli ghjunghjenu in campo "celui que l'on appelle Zimako il sera là ?" incù un angoscia chì ùn si po piattà. Uriginalità : u pudetti truvà in i BD di Poulardin.
Cunclusione : parità

8. L'azzuffi
Quì, un si tratta micca di beddu ghjocu. Si tratta piuttostu di calci è di pugni, di i guerrieri cum'elli piacenu assai à u publicu ch'ellu sia bastiacciu o aiaccinu. In Bastia ùn hè cusì luntanu l'epica di i Rool, Valery, Bianconi... Vale dinnù in Aiacciu per l'epica di i Muselli, Pastinelli (ellu avia ancu a so canzona "José falli fallà..."). Ma oghji ci vole à ricunnosce chì sò pochi à riesce ciò ch'ellu face u Gazelec : Jaureguiberry 2 anni di suspensione d'un colpu (micca d'un colpu, d'una incapata), Santunione hè assai ch'ellu ùn face più u contu di i so cartoni. è avà ghjunghjenu Blanc-Martini è Filippi ! Quì u centru di furmazione di i guerrieri viaghja bè ! Ancu l'anzianu presidente Jean Bujoli si hè fattu liticà da a lega, ubligatu di lascià a so piazza à Fanfan Tagliaglioli, chì, ellu, hè falatu di i tribuni in Amiens per francà u terrenu dopu à un kun-fu di Ettori ! Bisognu d'aghjustà qualcosa ?
Cunclusione : puntu per ... u Gazelec

9. I ghjucadori storichi
Hè longa a lista in i dui campi... In Aiacciu pudemu ramintà Kanyan, Taverni, Ferri, Pagis... iè sò "beddi ghjucatori"...
Mà in Bastia basta à prununcià i nomi Dragan è Jonnhy per spazzà d'un colpu tutti l'atri ghjucatori chì anu ghjucatu in Corsica. ùn vale mancu di cuntinuà à discore.
Cunclusione : puntu per ... u Sporting

10. U palmarès
Ognunu hè campione à u so liveddu. U Sporting hà vintu in Italia è in Inghilterra, hà ghjucatu una finale di cuppa d'Auropa è trè di cuppa di Francia. In 77 si hè ancu alzatu à a terza piazza di u campiunatu di Francia di prima divisione. U Gazelec, ellu, hà vintu quattru volti u campiunatu di Francia... amatore. Diciaremu dunque chì u Sporting hè u più forte à u liveddu prufessiunale è u Gazelec hè u più forte à u liveddu amatore.
Basta à sapè, si, in u ballò d'oghji hè megliu à esse prufessiunale o amatore ? Avè i soldi ò l'identità ? Diventendu prufessiunale u Sporting diventa pocu à pocu una squadra francesa invece chì u Gazelec ferma sempre a squadra aiaccina.
Cunclusione : parità

Bilanciu : Sporting 4 - 3 Gazelec

A quandu un derby da vede appena ?