Accueil
Envoyer à un ami
Version imprimable
Partager

Sportu è pulitica : a quistione di i JO di Pekin...

Sò cinquanta anni ch'ella dura. Ma n'avete intesu parlà assai dipoi parechji ghjorni. I Tibetani, i cumpatriotti butisti pacifichi di u Dalai Lama sò vittimi di a ripressione chinese. Si pone dunque a quistione di a boiccuttera di i Ghjochi Olimpichi chì s'anu da tene d'agostu, in China.



Ognunu hà u so parè nant'à stu particulare. À chì dice chì ùn ghjove à nunda 'ùn andà ci micca, à chì spiega ch'ellu hè periculosu d'imbulighjà a pulitica è u sportu, à chì brama un impegnu citadinu di i spurtivi, à chì ne chjama à un intervenzione durante a ceremonia d'apertura. Eppò, certi, di i tebetani, si n'impippanu. Vistu u livellu di i spurtivi francesi, a so angoscia hè sola spurtiva. Infine, certi si dicenu à prò di ua biuccuttera, mancu per ideulugia ma per via di u nostru fratellu Thierry Rolland. Hè capace à andà ci quessu!

À mezu à stu cumbugliu, chì si pò ritene? Jack Lang dumanda à u so amicacciu Kouchner di ramintà si di l'annate Mitterrand, quandu eranu dui giuvanotti infiarati ma belli zitti è muti cum'è oghje... Face ride! U secondu, dice per contu soiu, chì d'ùn andà ci micca, ùn ghjoverebbe à nunda. Piglia in esempiu i JO di Moscù in l'80.

D'altri, 40 anni dopu maghju 68, cum'è Daniel Cohn-Bendit incalcanu nant'à u spiritu di stu mese di rivolta per dì chì una pusizione curagiosa di a Francia sarebbe una bona. I diritti umani anu da preme nant'à l'inghjochi ecunomichi è a custruzzione di centrale nuclearie. Quessa, hè bella è bona, ma vene più faciule à dì quandu si stà in l'uppusizione chè quandu i Francesi si lagnanu di u putere cumpraticciu è di u disimpiegu.

In quantu à i ghjurnalisti, si sà quant'elli sò tenuti stretti da l'auturità chinese. Sò cusì stretti chì per u più, sò chjosi è incarcerati. L'intervenzione di RSF, sta dumenicata, in Grecia, ci ramenta quantu stu mistieru vene casticatu è u dirittu à a spressione libera scarpighjatu, ancu dui seculi dopu i Lumi.

Eppò, in u cuntestu d'ultravalurisazione di a mimoria storica di i Francesi, st'affare di a China casca male per Sarkozy. À chì ghjuverà di muntà si a sega nant'à l'azzione eroiche di l'anziani s'è omu si chjina, in listessu muvimentu, davanti à l'inghjulie oghjinche? Tale ingannu ùn pò durà. A resistenza contr'à u nazisimu era un passu per a libertà, un passu chì ci tocca oghje ghjornu à fà nostru, per stu prugettu altieru ch'ella hè a demucrazia. U ricordu storicu è u salutu di i fatti passati ùn pò viaghjà chè incù l'illustrazione fattiva di st'indiatura, appena à l'usu: "a to strada serà meia...".

A quistione di i JO di Pekin è di a ricunniscenza di i diritti di u populu Tibetanu hè di primura per noi. Malgratu a luntananza, si tratta di scelte pulitiche maiò per l'avvene. Qualessi sò i principii chì vulemu tene per assestà e rilazione di l'Europa incù paesi cum'è a China, a Russia è tira avanti è tocca? Al di là, si tratta ancu di a demucrazia, ind'è e nostre e lenze...

u 27 di Marzu 2008
Ahmed Zumar



1.mandatu da ribella u 27/03/2008 14:15
Bravissimu .Aghju purtatu u mio sustegnu a u populu Tibetanu è a tutti i populi in lotta di u mondu senza scurdami di u meo!

2.mandatu da ribella u 27/03/2008 14:37
mandate dinu u vostru s'e vo a vi sentite - vede u situ Corsica Corse Unita Naziunale-

3.mandatu da savè u 27/03/2008 14:55
à mè m'annerba sta storia di u Tibet.

tutti i parigini, i bobo è quelli chi si volenu dà una cuscenza d'omu di pace è di prugressu, vanu à sustene cause luntane induv'ellu ùn si po fà nunda : Tibet, Chiapas ecc...

ma ùn si rendenu micca contu chi ELLI DINU so da a parte di u BOIA è micca da e vittime.

4.mandatu da ribella u 27/03/2008 17:58
U Prublema hè , prima d'un annerbassi , hè faciule quand'omu hé à l'ascosu! quand'ella manca a libertà ch'ella sìa pocu o assai (un ch'è gradi !) Purta u so sustegnu a quelli chi morenu o chi sò imprigiunati sottu a patta di i dittatori... qual'ch'elli fussenu..i chinesi un sò male!, ... hè impurtante .
Hé sempre megliu che di parlà di bling-bling!

5.mandatu da Fabrì18 u 28/03/2008 11:04
Hè sempre megliu, sì.
Puru si e nostre discorsate ponu fà pocu in pettu à prublemi tamanti, hè sempre megliu parlànne chì restà in silenziu. Puru si e nostre parolle ghjunghjenu à pochi, quantunque seranu ghjunte à qualchidunu è averemu tenuta desta l'attenzione. Ghjè pocu ciò chì pudemu fà, ma ci vole à ùn piantassi micca.

-- Un cummentu nant'à a u linguaghju di stu situ: mi piace assai a varietà di lingua corsa chì vo' aduprate, ma perchè avete sceltu di usà a formula "muntà si" è micca "muntassi"?

6.mandatu da GWM u 28/03/2008 11:52
iè mà u buddisimu ùn hè micca sinonimu automaticu di demucrazia. U Buttan è u Nepale so munarchie preputente incù i so sughjetti. L'essenza di u buddisimu hè fatta di dui muvimenti principali (mahayana è hinayana), chi s'elli so primurosi di a salvezza di ogni tippu d'essere viventi, ùn anu nunda dà chi fà incù a fratellenza suciale, postu chi tutte e cose umane so viote di sensu. A vera nuvità umanista di st'ideulugia, ghè u Dalai Lama. Ghjè ellu chi a rimessu l'omu à u centru.

Dopu hè verità chi i Chinesi s'impatruniscenu. Cum'è ind'è noi, ùn si po soffre chi millaie di fresteri s'affacchessinu per amparacci à campà in casa nostra.

In quantu à u boycott, Kouchner mi pare d'avè tortu quandu dice ch'ell'ùn ghjoverebbe à nunda. A prupositu, quellu boycott di Moscova 80, avia azzingatu una crisi interna ind'i pulitichi suvietichi, chi d'un certu modu avia permessu l'avinimentu di Gorbacceffe.

Mà postu chi e catene di telé anu pacatu i diritti è tuttu què, è chi ghjè u soldu chi face tuttu, nimu ùn dicerà nunda. E po quale hè chi hà dà mughjà appressu à a China ? 20% di e so finanze naziunale e mette in l'armata...Unu di sti ghjorni ci anu dà mette tuttu u mondu d'accunsentu.


Novu cumentu :