Accueil
Envoyer à un ami
Version imprimable
Partager

Sta Corsica chì ùn cunosce a crisa...

In piena crisa finanziaria è in pienu dibattitu nant'à u PADDUC, l'uperazione immubiliaria "Côté Plage", in Pinarellu, ci ramenta chì a crisa ùn pichja micca tutt'ognunu...



Sta Corsica chì ùn cunosce a crisa...
10000 € u m²
Ma quale hè chì puderà cumprà si stu pizzacciu di cimentu, di mare è di sole à tamantu prezzu? Basteranu i mo 3407 miles di a carta Casino? Mansi ch'elli sò, i prumutori sò capaci à fà mi una riduzzione. Micca di u prezzu ma di u pianu ch'o mi vogliu cumprà. Altrimente, faraghju a mo cummanda immubiliaria incù i 20% di a Redoute? O aspetteraghju e solde, dopu Natale? È ancu, a crisa à mè, ùn m'hà fattu nunda nunda. Invece, l'associu di i bursicutori corsi hà dichjaratu chì certi avianu persu un bracciu! O li brutti!

Crisa è Maccarelisimu
A crisa? Ne sentu parlà, è ancu! Ùn aghju micca abbastanza soldi per pudè la sente. Ma s'ella pudissi ingrandà da intimurì i circadori di sole! Ch'elli avessinu puru u penseru! U prublema, ùn vene micca tantu da l'investissori. U peghju, ghjè u maccarelisimu di i prumutori. Parenu cowboyi lampati à l'assaltu micca di u farueste ma di u liturale. Serianu ancu capaci à fà cum'è in Monacu è à custruì nant'à u mare! Nanzu, eramu assiccagnati da a nostra luscezza mentre avà, simu annigati da l'invidia, a finanza è l'individualisimu.

Un arrubbecciu, ancu per 1000000d'€
"L'amichi di a Corsica" spendenu assai è certi investiscenu 1 milione d'€ per un appartamentu vicinu à u mare. Ma pocu impreme ciò ch'elli cappianu, hè un arrubbecciu. Tutti i so soldi, cosa arrecanu à a cullettività? Muri, circulazione infernale ma impieghi è benestà? Impieghi di chè? Di muratori? Serà quessa a sucetà chè no vulemu? Prumutori, muratori è turisti? U dibattitu nant'à u PADDUC ci dà l'occasione di decide. Participemu!

Una riserva o un ghettò?
In l'ochji di certi, u sviluppu ecunomicu di a Corsica viaghja incù a custruzzione di casacce nant'à i lochi i più belli di a Corsica. Ma quandu saranu tutti strutti, chì ne serà di a bughjareccia turistica? Pare cusì ma, quelli chì difendenu in veru u turisimu, sò quelli chì difendenu dinù u liturale... Di fatti, da quì à 20 anni, a Corsica puderà di sicuru dà l'imaghjina d'un paese riccu incù bandere corse à palittate nant'à e pagliotte, l'ottelli è e vitture. Serà un paese dinamicu, incù pitturicce lucicante chì daranu à u ghjunghjiticciu un impressione di ricchezza.

Ingannati da sta mascara è purtati da a briachina immubiliare, cum'è i Ghjudei anu custruitu i campi di cuncentrazione, custruimu avà i muri di u nostru ghettò.


Dumenica 9 Nuvembre 2008
Sbanditu



1.mandatu da rocca serra u 2008-11-09 09:16
un scandalu !! so chì ùn dicini micca, hè chì issa merda di cimentu hà da essa custruita ghjustu à qualchì metra di u nosciu cimiteriu !! ah sicura, ghjustu di pettu à u mari .. è quí nimu ùn dici nudda !!

2.mandatu da Ziu Dumè u 2008-11-09 09:30
"è quí nimu ùn dici nudda !!"

Innò, si ne parla quì!
Per quelli chì cunocenu à Pianarellu, nant'à a cumuna di Zonza/ Santa Lucia di Purtivechju, sta custruzzione serà à fiancu à u campusantu, in un locu umidu chì ghjè statu assiccatu.
Quandu sò e fiumare? Tutti i 100 anni? Buh!

3.mandatu da M.E u 2008-11-09 11:59
Vogliu bè crede chì a crisa ùn ci tocca à tutti.
Pè capiscelu, basta à entre un marti sera à u Rex in Corti, o un sabatu sera annant'à u portu di Calvi o in Aiacciu ind'è i caffè è e buatte "bransciate". Si pò vede giovani di menu di vint'anni à pallettate, chì compranu buttiglie di champagne è di vodka à più di 1000 €, Rolex à u polzu, vestiti cù ghjacchette chì costanu u prezzu d'una vittura... Senza vergogna è sopr'à tuttu incù un'assicurenza m'avete capitu. Ma induve i pigliaranu tutti sti soldi, sti purcacci troppu techji ? A ci dumandemu tutti, ma vistu cum'ella li pare faciule di sorte a filza di biglietti di 200 o 500, ùn c'inchietemu tantu pè u s'avvene.
Aghju lettu pocu tempu fà, annant'à un bellu giurnale d'investigazione, (Corse-Matin) chì i giovani è sopr'à tuttu i studienti straziavanu assai pè i soldi. Mi sò pigliatu una risa tamanta. Tutti i ghjorni mi dumandu s'è simu un'isula di scemi trapanati, o s'è simu carchi di soldi in veru. Annant'à u cuntinente, è ind'è tutti i paesi, quellu chì si compra una Rolex, hè quellu chì, dop'à tanti è tanti anni di straziata, hà riesciutu in la so vita pruffessiunale, è guadagna abbastanza pè cumprassi què. L'avemu vistu cù u scandalu di Sarko è di a so mostra. Ind'è noi, u primu merdosu di quindeci anni chì hà parenti un pocu ricchi (vale à dì chì travaglianu in u turisimu o e prufessione liberale) si prumena cù mostre à 5000, 10000, o 15 000 €, è pè tutti, pare nurmale. È s'ell'un'hè calibratu à 18 anni, sò conni ! (iè, pè noi oghje, e coglie sò passate ind'è l'arme, un pocu cum'è in america). Senza parlà di e vitture di sti merdosi, chì costanu parechj'anni di salariu d'un omu nurmale, è incù e quale, un ghjornu o l'astru, si pianteranu... (È s'ellu ci n'hè unu chì dice "bon prò li fia", u capisceremu)
Ma o zitelli, chì ghjè stu mondu induve campemu ? ... Eiu credu vulenteri chì a crisa ecunomica ùn ci tocca à tutti... Ma a crisa di e mentalità, ohimella, ci simu in veru... È à parte i schjaffi, ùn vecu altr'affare capace di disciuplicalla.

4.mandatu da Figatellix u 2008-11-09 12:57
Un articulu era ancu dighjà fattu nantu à issu locu

http://www.wmaker.net/apiazzetta/Banda-di-i-centu-metri-a-seguita_a274.html

5.mandatu da Popm u 2008-11-09 13:20
Ghjustu per di...
Un di i metri quadrati i piu cari di Francia si trovanu in Parigi in u sestu arrondisasmentu versu Saint Germain... Tra 10500€/m2 e 11500€m2...

Vole di ch'in certi rughjoni di Corsica diventemu piu cari ch'in e piu belle quartiere di a capitale !

Povera Corsica !

6.mandatu da estrimei u 2008-11-09 18:47
o M.E ,
assai ghjustu so che tu dice ! simu 'nu un Paese chi un ha piu nisun' sensu.
ai scrittu : Ind'è noi, u primu merdosu di quindeci anni chì hà parenti un pocu ricchi (vale à dì chì travaglianu in u turisimu o e prufessione liberale) si prumena cù mostre à 5000, 10000, o 15 000 €, è pè tutti, pare nurmale.
allora ti faciu una dumande, d'apress' a te i parenti di sti sicastroni ,sopratuttu quelli di u turisimu , si ne scruccuneranu ajuti di l'administrazione (" prime")

7.mandatu da M.E u 2008-11-11 17:00
Iè o "Estrimei", ghjè pussibule ch'elli scrucchessinu (o ch'elli otteninu) "aiuti" di l'amministrazione. Ma ùn anu bisognu di què... S'è tù vedi ciò chì certi vincenu in una simana, perdi u laziu di travaglià pè trè anni... Èppò trovamine unu chì dichjara tuttu ! E più grande scruccunerie si facenu à l'impositu.

8.mandatu da u tuttalégou u 2008-11-19 15:45
eiu pensu chi raggiunà di u prezzu di u m2 un vole di nulla e un serve a nulla.
Un hè micca custi u prublema!!
u prublemu hè : chi sviluppu vulemu?
Chi vulemu diventà?
U liturale chi ne femu?
I paesi chi ne femu.
I terreni chi femu nantu?
Per avà i nostri ELETTI (santini ecc..) un anu datu risposte!!!!!!!!!!!!!
Allora dumandemu a esse intesi e punimu e quistioni puttana gobba!!!!!

Novu cumentu :
B i u QUOTE URL

Scumpienti

U top 50 di i nomi struppiati

Facenu 200 anni ch'elli sò struppiati i nomi di lochi corsi. Paesi, muntagne, paisoli è cità, u sterminiu hè generalizatu.

U top 50 di i nomi struppiati
À i cani i nomi di lochi corsi ! L'antica memoria di i nomi si sfassa per lascià a piazza à nomi struppiati è plasticati.

Eccu u Top 50 di i scumpienti di a tupunimia corsa...


Leghje a seguita
A Piazzetta nant'à Facebook

Site più di 8000 à avè l'applicazione per iPhone8

Site più di 8000 à avè l'applicazione per iPhone8
Eccu, sò più di 8.000 caricamenti nant'à l'AppStore !

A Piazzetta era digià nant'à l'iPhone, avà ghjunghje nant'à Android

Hè a prima applicazione d'un media corsu.

Sò state sviluppate da una intrapresa corsa, DuoApps !

Ricircà nant'à A Piazzetta
Ricerca avanzata
Inscription à la newsletter