Accueil
Envoyer à un ami
Version imprimable
Partager

Tony Montana dinù s'hè fattu stinzà

In Corsica sò numerosi i pseudo-maffiuselli affascinati da u Parrain, Scarface è Les Affranchis à vulessila ghjucà "Tony Montana". Ma l'attualità corsa ci ampara chì spessu, l'affari ponu finisce male...



Tony Montana dinù s'hè fattu stinzà
S'è vo l'avessite tutti à tavulinu, i giuvanotti corsi techji di Les Affranchis è di u Padrinu chì piglianu in mudellu a facciaccia di Tony Montana, u stadiu Armand Cesari ùn basterà à accoglielli tutti.

Parlanu tutti di colpi à fà è d'affari à piglià per fassi dui soldi, sunnieghjanu di Porsche Cayenne, di Rolex è di spechjetti Ray Ban ("des lunettes à deux balles", a dice ancu Séguéla).

"U galibre" è u bling-bling in mudellu, cume in e banlieues di u 9-3. In e cités pùzziche di Marseglia o di Mantes la Jolie, Tony Montana hè dinù una iccona.

I losers di Corsica è quelli di e banlieues anu listesse ìdule.

Perchè di siguru, l'apprenti-maffiosi ùn finisceranu micca in una villà cum'è quella di Scarface, incù donne è champagne à sbuzeffu. Ma in l'appartamenti bughji di I Salini o di Lupinu.

Piuttostu ch'è di "casse du siècle", finiscerà in un braquage mozzu è mancatu à u Spar o ind'è u panatteru di u locu. Chì gloria !

Tutti quelli chì si sò fatti siccà dapoi un annu anu u meritu di facci riflette à sta dumanda : ghjuverà à qualcosa di sceglie a vita di maffiosu (a malavita dicenu i Taliani), s'ellu hè per finisce stinzatu à 30 o 40 anni ? N'averanu prufittatu almenu, di a so vita, sta povera ghjente ?

u 7 di Maghju 2009
u webmaestru



1.mandatu da beretta9milimetru u 07/05/2009 07:31
parechji un meritanu mancu una balla dopu ave fattu pienghje mame e zitelli vergogna a quelli chi s'adopranu di u sangue di l'altri a quelli ch'aruinanu a corsica ladri malfattori assassini ghjente di male ghjente vomitose

2.mandatu da circinelludiguagnenativupeliguagnesusosanguaversatu u 07/05/2009 07:36
a malavita dicenu i Taliani, u mal'caminu in Corsica...
iè, iè... Hai a raggiò amicu webmaestru, a sappemi bè chì a maiò parti di i nostri sgaiuffi so glosci...
Ma, à dilla franca, nimu ùn puderà impidiscia un corsu di pensà appenuccia di bè di quiddi chi ani sceltu d'essa for di strada in un paese 'nduva a marginalità hè cunsiderata cum'è un delittu è hè una qualità chì si perde à 25 anni !!!

3.mandatu da filidatu u 07/05/2009 11:44
pensu chì ùn ci hè nunda à aghjustà
bellissimu articulu

4.mandatu da ilpoussaitdescrisd'onfrey u 07/05/2009 17:05
Bel articulu.

Monda vituparati ani svacatu u sangu di l'altri prima di fassi piumbà.

Ma a morti d'un omu ferma una disgrazia è ùn ci voli mai à avvizzassi à cunsidarà a morti com'è un fattu di nudda.

Pà a noscia sucità 'ssi mudelli sviati è i tumberi chì l'accumpagnani sò una straghji pirmanenti.

In tutti 'ssi morti, ùn mi possu impidì di pinsà ch'iddu ci sarà dinò calchì ziteddu persu ch'avaria pussutu avè un antru distinu.

5.mandatu da silvestru stallone u 07/05/2009 19:54
soca dinù chi a "malavita" si sviluppa ind'i lochi induv'ella ci hè a miseria è l'assenza di perspettive ecunomiche.

cumu a dici sopra, forse certi "zitelli persi" averianu seguitatu un altra via in d'altre circustanze, in d'altri paesi...

avà per i "maffiuselli" chi si montanu a sega cù u t shirt d'al pacino, ch'elli vaghinu à fassi un giru cù a n'drangheta in Calabria, li passerà u laziu di diventà un pseudo-caïd

6.mandatu da Culomba u 08/05/2009 12:44

M'arricordu di un dettu chì m'avia stumacatu, da a parte di un amicu chì campava di hold up è altri "affarucci" : avia vistu passà un amicu di scola in una vitturella "Diesel", un funziunariu. U braccore si n'hè risu : "Eccu cum'ùn vogliu micca esse eiu, gagne-petit!"

Nunda à aghjustà.

Novu cumentu :