Accueil
Envoyer à un ami
Version imprimable
Partager

Tutti depressivi !

A sapemu chì a ci dicenu tutti i ghjorni, campemu in un mondu chì pocu gira in tondu. Ùn ci hè più un palmu di nettu indocu… Micca chì e cuscenze s’infiarghinu à ‘ssa donda, chì l’usi è i custumi vulessinu sfidà à Santa Murale è chì stu corciu Omu si vulessi rivultà sempre di più è contr’à tutti caccendu focu è fiare à voline più ! Innò, hè propiu u cuntrariu.



Tutti depressivi !
I putenti chì maneghjanu stu mondu ne facenu quant’è Cuchjinu, trapassendu sempre di più e fruntiere di u permessu è di u stumacheghju è quella pupulaccia infame ch’elli chjamanu « i Populi » s’infanga pianamente è bè à accettà u statu di a sucetà mundiale è ancu peghju cerca à entre u più pussibule in a ronda.

In questu mondu chì si scumparte in dui categurie, simu noi quì ben intesu da a banda di e zappe. Nunda ci và bè, ùn ci resta u pudere nè pè sunnià, nè pè parlà, nè pè cumprà, nè pè astru restu… A cantava a puveretta di Mylène Farmer : simu noi a « génération désanchantée ».

In quantu à a meia a generazione, vòlesi dì i tippi di 25 anni d’oghje, simu di quelli chì simu crisciuti in un embiu culturale chì, quant’è i quattru punti cardinali in geugraffia, anu cunfinatu u nostru universu.

À u Nordu, strada diritta è core in fronte : a fede patriotta. Hum…Simu ghjunti noi cuscenti à l’èpica di a guerra trà i naziunalisti, l’affaracci di certi di i nostri raprisententi è a calata di sta mossa in generale. Ma chì piacè d’avè cunnisciutu dinù e prime di l’ore gluriose, una mossa populara è sincera, tutti i nostri tercani in piena putenza sin’à i 25% à e terituriale in 92… nant’à quelle K7 è quelli DVD.

À levante, u nostru corciu sole… Stu poveru Sporting. Chì macci, chì tazzu, chì fede : Papi, Rep, Djazic, Heidkamp, Milla, Furiani chì fecia trimà à tutti, a Cuppa d’Europa, a vittoria in l’81, chì ci anu resu felici (astru ch’è e muntagne d’Orezza !) fidighjendu quelle K7 ! Di vittoria, ùn emu cunnsiciutu ch’è u cabulò in Bastia noi. Ch’osinnò, fora di a Cuppa di Francia 92 chì cumminciàvamu à apre l’ochji, a cullata in u 94 è dui o trè macci di tantu in tantu, avemu cunnisciutu vivi u più bonu : e disfatte in Furiani è e falate, i culpacci di i nostri cari dirigenti, e finale tutte perse, eppo Ambruster, Gottardi, Fullarton, Flavio, Paulo Alves, Etamé, Piekarski, Deblock, Dieuze è oghje Cherrad, Dao è una mansa di scertinati... Una campazione!

À punente, casca bè, a Manca, o diceremu pè cuntentà à tutti, a cerca di libertà è d’affirmazione di l’Omu. E lotte suciale putente, a ghjunta in l’81 di Mitterrand incù l’amnistia per i nostri prigiuneri, a diritta è i putenti persi è messi fora à cacà cù i cani... Invece quand’è no simu ghjunti noi à un statu cuscente, ci simu abbuchjati à ochju à vista vint’anni di diritta indiavulata è quant’è à dì di repressione à a scimesca in Corsica.

In fine, guardendu più in bassu… hum, ver’di u meziornu: a coppa. I filmi di culu, Canal+, i sitti chì u webbu ne caccia un centu à ghjornu... In quantu à e nostre e chjavate, ùn aghju mancu più abbastanza fiatu per riassumme a situazione…


Avie a ragiò, tutti inculati o Mylène…

u 30 di Nuvembre 2008
Carlu Biera



1.mandatu da Heliofobu u 30/11/2008 04:46
Ecc'una bella dimustrazione di tupugrafia storica...

2.mandatu da Blaccu Bloccu u 30/11/2008 13:48
Tant'acutezza mi rendi felici à mè...

3.mandatu da uomudibiendadaccuanustrale u 30/11/2008 14:43
quessè si chi so parole bèn dètè ! ! ! ma vuleria spè si su papa noèl mezzu suffucatu ghiè un'omu incazzitu o una donna isbuvatà ? ? ?

4.mandatu da circinelludiguagn�nativup�liguagnesusosanguaversatu u 30/11/2008 15:09
Sarà u ritornu di u PUNK ?
à me mi và, ma NO FUTURE... cù a fede in noi quantunque !

5.mandatu da Piratella u 01/12/2008 01:30

Sè tù chjavi à sfiatattine, ùn serai tantu depressivu, allora, chì dumanda u populu? lol

Aiò, l'Età d'oru ùn ci n'hè mai statu, l'avvene ùn hè mai esistitu, ùn ci hè chè u presente, è ognunu sbattuleghja cum'ellu pò in u fiume di i so tempi. I nostri anziani si sò trovi in guerre ch'ùn avianu micca sceltu à a to età, è oghje i più depressivi sò quelli chì anu tuttu o guasi, l'altri devenu scumbatte cù veri prublemi, ùn anu tempu à esse depressivi...

6.mandatu da muarf ! u 01/12/2008 02:05
eccu i punk à l'usu corsu... parchi micca !

bellu articulu di Carlu Biera.

ma aghju a paura chi Piratella ùn appia raghjò, età d'oru, ùn ci n'hè mai statu...

7.mandatu da circinelludiguagnènativupèliguagnesusosanguaversatu u 01/12/2008 09:48
Hè! Comu !? Siguramenti ch'ùn ci n'hè ma' statu !
Cum'e quiddi chì parlani di a "viulenza" in Corsica oghji... ùn ani micca cunisciutu a viulenza di tandu: Quissa sì, ch'era bedda, forti è prisenti !

8.mandatu da Culomba u 01/12/2008 15:28

À mè ciò chì mi rende depressiva è mi stumaca sò "e Feste" di fin' d'annata!

9.mandatu da in cauda venenum u 01/12/2008 18:36
perche o culomba un credi piu in babbu natale ??????????????

10.mandatu da Culomba u 01/12/2008 21:03
Innò, o ICV, ùn ci credu : sò a so moglia! -))

11.mandatu da in cauda venenum u 01/12/2008 21:39
ALLORA DI MI INDUVE TU STAI VENERAGHJU A TENE TI CUMPAGNIA QUAND'ELLU SI NE VA PER DISTRIBUI I RIGALI CI TENEREMU A U CALDU

Novu cumentu :


Seguitateci nant'à Facebook


L'articuli

Abbunatevi à a newsletter

Circà nant'à A Piazzetta