Accueil
Envoyer à un ami
Version imprimable
Partager

U Catinacciu di Sartè passerà nant'à Eurosport

Pè risponde à a dumanda sempre più impurtante di mondu, l'organizazione di u Catinacciu di Sartè si prufessiunalizeghja. Sola desillusione : u penitente ùn puderà micca esse Alain Orsoni quist'annu.



U Catinacciu di Sartè passerà nant'à Eurosport
Di più in più fans volenu seguità e viacruci di u Catinacciu. Tutti l'anni a cità di Sartè cunnosce un afflussu di ghjente di u mondu sanu. Pè a prima volta quist'annu, un charter Tokyo-Figari hè messu à posta per chì i nostri amichi giappunesi possinu seguità l'evenimentu.

U Catinacciu hè appena a nostra cullata di l'Alpes d'Huez à noi.

Ci vole à dì chì Sartinesi cumminciavanu à lagnassi. Troppu ghjente, troppu turisti, troppu tazzu, troppu disorganizazione, un veru perìculu per i cunfratelli è u penitente.

Annu passatu ci sò stati parechji prublemi è feriti. Un gruppu di tifosi venuti da Italia si sò tazzati cù un gruppu di turisti olandesi. Si battianu per pudè avè u più bellu locu per piglià e fottò.

Torn'appena è u penitente in rossu si pigliava una strambacata : hà sfuntu nant'à u kebab d'un turistu. U turistu ellu s'hè pigliatu un colpu di croce nant'à u tupezzu.

Bilanciu : 35 interpellazioni, 21 feriti à l'ospidale, 14 intussicazione alimentarie.

Allora l'organizazione hè stata turnata à pensà. Sò stati imbusciati "stadiers" per canalizà u mondu. Per a televisiò : 26 camerà, 58 tènnichi, 1 car-régie per pudè trasmette l'evenimentu in diretta mundiale, nant'à Eurosport è Vatican 9.

Nikos Aliagas è Christian Jeanpierre seranu à i cummenti. Pierre Ménès è Bernard Thévenet seranu quì per dà u so parè di spezialisti. L'interviste seranu assicurate da Nelson Monfort.

Una tribuna hè stata custruita apposta, cun projecteurs di lume, screnu tamantu è car-podium-NRJ animatu da Benjamin Castaldi.

U gruppu "La Compagnie Créole" è a cantatrice Indra seranu quì pè scaldà u publicu.

Parechji sponsors si sò manifestati è per a prima volta a tinuta di u Catinacciu serà appruntata da Adidas.

Anu pensatu à tuttu. Ancu à un cuntrollu anti-dopping. Perchè anu a paura chì l'incappucciatu (ùn cunniscimu micca a so identità) sia in fatti Lance Armstrong, chì era in Corsica a settimana passata.

Nant'à u situ di "paris sportifs" Bet and Clic si pò scumette nant'à l'identità di u Catinacciu. Sin'à pocu, era Alain Orsoni chì era in testa di i prunòstichi.

L'organizatori anu pensatu à tuttu !

Pè u merchandising puderete cumprà t-shirt, cagule rosse è ancu picculi penitenti per fà muscà a vostra vittura : "parfum citron" è "pin lariccio" (sic).

È à a religione, a fede ?

Ben...

u 2ndu d'Aprile 2010
U Sgaiuffu



1.mandatu da tont'e finu u 02/04/2010 07:34
Attenti ! ch'emu da fà incu tutti ss'omi in Burqa in i carrughji di nostri paesi ?
Briziu ! Prestu, faci una legge !

2.mandatu da Fium'orbu u 02/04/2010 10:25
nè fate troppu

3.mandatu da rughjatore u 02/04/2010 11:14
O sgiò sgaiuffu, quant'iddu vi piaci, à voi è à l'altri, à attacà sempri l'ACA...

Micca articulu nant'à u derby quist'annu?

4.mandatu da rughjatore u 02/04/2010 11:16
Sopratuttu chì quist'anni, a croci, l'eti da purtà voi, in fini di staghjoni...

5.mandatu da partigianu u 02/04/2010 11:33
aio, induve avete vistu ch'ellu si parla di l'ACA ? o rughjatore, appena di magagna ùn face male, nò ?

6.mandatu da rughjatore u 02/04/2010 13:27
Iè, di sicuru chì ci voli à macagnà, mà bò, sempri senta "Alain Orsoni Alin Orsoni" à un mumentu datu capisci chì...

7.mandatu da per u paese u 02/04/2010 15:08
ùn ci vole micca à fà paranoia non più ! dapoi 6 mesi quì fallanu di più nant'à Rocca Serra è Giacobbi ch'è nant'à Alain Orsoni mi pare !

è po, si pò ride dinù d'Alain Orsoni, nò ? ùn hè ancu difesa mi pare !

8.mandatu da Alanu Cambone u 02/04/2010 15:23
serà ancu Alain Orsucci o Orsetti avà, postu ch'ellu averà smagritu in prigio

9.mandatu da MPA u 03/04/2010 10:23
Alanu Orsoni ùn serà un Santu mà hè casticatu in tantu che corsu e naziunalistu (o ex..) allora chi i francesi fighjeghji e so "Banlieux" e ch'eeli ci capienu appena...

10.mandatu da Pasturellu.. u 03/04/2010 10:58
I francesi fora (Di e prigio...), e i Corsi Nentru ( E prigio...) cusi saranu tutti cuntenti ..........!!!!

11.mandatu da ZIU ANTO U PURCAGHIU u 03/04/2010 11:32
o zitté' si parlà qui di su camisgiatu sartinesu no!alora circhému d'induvinà qualé si piattà sottu a a crocé.Eiu so scunvintu qu'eddu saria u bandittoné Spadda,o sino unu di nostri novi eletti di l'assemblea di Corsica di l'anziani vi palrlu, per fassi pardunà di e so pazzié scorsé ..

12.mandatu da PCF u 03/04/2010 15:06
Incamisgiatu rossu in Sartè marca propiu bè no ????

13.mandatu da PETTI ROSSU u 04/04/2010 00:15
eiu mi dumandu quale chi farrà u penitente sinà u 2014 bucchini o rocca serra ?

14.mandatu da anto u 04/04/2010 12:27
Salutè :pensu chi sarebbe mégliu di parlà di catEnacciu (di catena ) che di catInacciu (di catinu )??Ma soga è stata fatta apposta

15.mandatu da FOUS TA CAGOULE u 04/04/2010 15:38
pensu chi u veru nome hè CATINACCIU

postu chi a regula hè chi u E diventi I quandu scambia l'accentu tonicu dopu ad avè aghjustatu un suffissu

A RENA -> A RINELLA
UNA MELA -> UNA MILUCCIUA
UN PESCIU -> UN PISCIUCCIU, UNA PISCIAGHJA

è dunque

A CATENA -> un INCATINATU, U CATINACCIU

avà sott'à l'influenza di u talianu CATENACCIO si dice CATENACCIU, ma a parola ghjusta sarebbe CATINACCIU

infine, mi pare...

16.mandatu da marboeuf u 05/04/2010 21:19
Cume penitente quist'annu, sarà Loana o Paul Emploi, chi avà, tramindui, a forza di pruvà di more senza ghjunghjeci, sarebbe ora... Alanu Orsoni, po esse, s'ellu vene i Sartè, truvarà sempre i sandwitch in ghjesa qu'ellu si sciaccava Poletti tandu durante a so greva di a fame "hold up" culturale...

Novu cumentu :