Accueil
Envoyer à un ami
Version imprimable
Partager

U Dalai Lama in Corsica !

Hà da vene u Dalai Lama, u 14 di ghjugnu à u Palazzu di i Cungressi in Aiacciu. Dopu l’Irlandese John Hume parechji anni fà, sarebbe a seconda volta chì un Premiu Nobel di a pace s’affacca in Corsica.



U capimachja di i Tibetani hè statu invitatu da a Liga di i Diritti di l'Omu. U so presidente ci spiega e so mutivazione : « Hè un omu di valore. U simbulu di a difesa di i diritti di u populu Tibetanu. Hè una bona ch'ellu venissi in Corsica, nanzu à i Ghjochi Olimpichi, da ch'ellu ci spieghi i fundamenti storichi è pulitichi di a so andatura. » Darà una cunfarenza nant'à u tema : " Ecunumia di marcatu o ecunumia di e libertà ?". A traduzzione simultanea da l'inglese à u corsu sarebbe fatta da Jean-Vitus Albertini, u giurnalista capiraschjatu di France 3 Corse Via Stella, spezializatu in e quistione di a pulitica furestera di a Francia.

Ma u so prugramma ùn hè ancu stabbilitu bè. Eri sera, u so sicritariu ùn sapia ancu s'è a scappata in Bastia, dumandata da u sgiò mere, li sarebbe accunsentita. Megliu chè una cunfarenza, hè una spassighjata ch'ellu volerebbe fà Emile. U sognu di Zuccarelli sarebbe di tirà si dui passi, da a Piazza San Niculà à u Quai des Martyrs, da cinque à sette, incù u vechju butista. Hè cusì ch'elle si sò aperte e scumesse, in a squadra di a Piazzetta, per sapè s'elli si beieranu un Orezza o una Badoit à u Caffè Napoléon, à i Palmiers o à a Pace...

Dicenu e linguacce o i magagnoni chì u Dalai Lama puderebbe scappà sia à u Sax, sia à u Rancho da salutà i so "fratelli" corsi... In quantu à Patrizia Gattaceca, in u quadru di a prumuzione di u so discu novu, li vulerebbe cantà una canzona : « Senti a filetta ». Invece i furdani di u Teatrinu, vulerianu elli, ghjucà una pezza di teatru dedicata à Zuccarelli : « Le maire imaginaire », sopratitulata in tibetanu. In sta pezza di Guy Cimino, hè Jean-Pierre Guidicelli chì ci tenerebbe u primu rolu.


u 15 d'Aprile 2008
Sbanditu



1.mandatu da Arechjò u 15/04/2008 15:52
Aghju un scoop
U lama hà da scuntrà à i muvrini pè parlà di a salvezza di u dahu

2.mandatu da in cauda venenum u 15/04/2008 18:12
E VERA OGHJE SO CULLATU IN TAGLIU AGHJU VISTU GHJUVAN FRANCESCU BERNARDINI VESTUTU IN FRATE TIBETANU TRIMAVA E TRIZINAVA DI FREDU PASSAVA PE I CARUGHJI E FECIA UNA SORTE DI PAGHJELLA MA ERANU SEMPRE E LISTESSE PARULLE FECIA OMMMMMM OMMMMMMM OMMMMMM E DOPU PICHJAVA NANT'UNA TINTENA AGHJU DINU INTESU DI CHI HANNU DA FA UN GRANDE CASTELLU E GHJUVAN FRANCESCU SERA CURUNATU GRANDE GURU

3.mandatu da Cumpalliols u 16/04/2008 16:56
Salut'à tutti, è scusate la mio ignurenza, mà, chì vole dì "capiraschjatu" (parlendu di Ghjuvan'Vitu Albertini) ? Sta parolla, ùn l'aghju mai intesu.

4.mandatu da un tippu u 16/04/2008 20:10
salute o cumpalliols

ùn ci hè male ! nimu ùn nasce amparatu, ùn ci vole à scusassi d'ùn micca capisce una parolla. semu tutti quì per amparà !

capiraschjatu = capirascatu (in corsica suttana)

sempliciamente "tête rasée"

da u verbiu "raschjà"

eccu !

5.mandatu da Sbanditu u 17/04/2008 18:59
Ah ! Ah ! Ah ! Scusate per issa magagna. Aghju scrittu l'articulu in a parte "pulitica" ma ci eranu unepochi d'elementi chì pudianu fà crede chì ghjera solu un puttachju. J-V Albertini, P Gattaceca, J-P Guidicelli è Guy Cimino, vi salutu tutti tutti !

Eccu quì u cummunicatu di a LDH nant'à Alta frequenza :

La LDH dément la venue du Dalaï Lama en Corse (Aujourd'hui 15h10)
(Francescu Maria Antona – Alta Frequenza) - Le Dalaï Lama ne viendra pas en Corse cet été à l’invitation de la LDH. La Ligue en effet dément cette information dans un communiqué. Elle précise toutefois que "les événements actuels au Tibet, plus encore d’arrestations, d’emprisonnements et de torture l’inquiètent, de même que l’inquiète le chantage exercé par le gouvernement chinois sous forme de boycott des produits français". « La raison économique ne doit en aucun cas remettre en cause les droits de l’homme », conclut le communiqué. Depuis quelques jours, en effet, la rumeur d’une venue du Dalaï Lama en Corse circulait notamment sur Internet.



6.mandatu da estrimei u 18/04/2008 08:19
chi campà sperendu......
a dillà franca un aghju tantu fede 'nu a "LDH"

a i rispunsevulli di A PIAZZETTA:
mi pare chi , s'ell'he pussibile,ci vuleria a pruvà a mette in valore e reazzioni fate da pocu(forse rimette u suggettu in testa)

a u tippu:
rascattu o raschjatu si pratecanu in Pumonte

7.mandatu da Cumpalliols u 19/04/2008 10:56
Vi ringraziu à tutti per e vostre spiegazione, ancu s'o aghju messu un'certu tempu à rispondevvi. Mà in veru, ùn aviu micca capitu chì era una macagna, st'articulu. Ghjè un'prublemu, perchè n'aghju parlatu à tutt'u mondu.

8.mandatu da L'Alisgianincu u 27/04/2008 14:06
U Dalai Lama in Corsica : parenu fole ! Mà saria un piace tamantu di riceve lu. In tutti casi, a data è u locu di stu ritrovu sò bè nutati in u mio « agendà » (u 14 di ghjugnu in Aiacciu). Eppò a cunfarenza di u vechju butista (à u Palazzu di i Cungressi) ferà piazza u lindumane à una prugramazione culturale chì mi garba assai… Direzzione Bastia per un spettaculu di Patrizia Gattacecca è di u Teatrinu, perchè micca ? Seguiteremu dinù quella spassighjata storica trà u merre Zuccarelli è u Dalai Lama, da a Piazza San Niculà à u Quai des Martyrs…

In fine, trattendu di a quistione di l’amicu « Cumpalliols » nantu à u sensu di a parulla « capiraschjatu » in st’articulu di a Piazzetta. Mi si pare ch’eo l’aghju dighjà intesu in a canzona « A Squadra di Voce Ventu ». Vole dì : « crâne rasé » in francese. Mà à Jean-Vitus Albertini li ferma quantunque i so capelli. Nò ?

Novu cumentu :