Accueil
Envoyer à un ami
Version imprimable
Partager

U Top 25 di a pop rock nustrale

Face più di 25 anni chì a musica pop rock corsa esiste. Era ora di fanne appena u giru.



U Top 25 di a pop rock nustrale
Da Zia Devota in l'anni 80 à Vitalba, passendu pè Les Varans, I Cantelli, Sekli, Notte o Novi, face una bella stonda chì a musica corsa ùn hè più custretta solu à u registru tradiziunale o à e sudamericanate.

Di siguru, ci piaceria à sente di più pop rock, hard rock, metal, electrò o jazz fusion (è perchè micca !) in corsu.

Ma quand'è no femu u giru di più di 25 anni di pop rock nustrale, si pò omu avvede chì a scena corsa hè varia è chì a qualità ci hè è ci hè stata.

Per st'articulu ci simu aiutati di quelli di Pierre Bertoncini è di Stéphane Leandri nant'à u rock corsu in a rivista Fora.

Zia Devota - E Sigarette (1986)

Zia Devota hè stata a prima furmazione à fà una musica corsa propiu nova di pettu à ciò ch'ellu si pudia sente nanzu. Di più pop chè rock, u gruppu hè natu in l'anni 80. Disgraziatamente, Zia Devota esce solu un album, Falsi cunsiglii, in u 1986. Peccatu, i so testi scherzosi, a so lingua muderna è a so musica di qualità anu purtatu un soffiu novu chì ci manca sempre avà.

Zia Devota - E sigarette

Zia Devota - Falzi cunsiglii (1986)


Les Varans - Icaru Blues (1997)

I Varans hè un gruppu bastiacciu natu in l'anni 90. Sti veri rockers nustrali chì sò Freddy Olmeta, François Spinelli è Ange Torre escenu u so primu dischettu, Icaru Blues in u 1997.

U segondu MNF (pè mi n'infuttu) escerà in u 2000. U so ultimu dischettu cù trè tìtuli, Gulliver di Siscu, surterà in u 2002. Tutti piglieranu vie differenti (carriera "in solò" o cù u gruppu Noi). Ma francamente, mancanu nant'à a scena di u rock à l'usu corsu...

Les Varans - Icaru Blues

Les Varans - U Pastizzu (1997)

Les Varans, U pastizzu

Les Varans - MNF (2000)


Les Varans - A pressione


Les Varans - Gulliver di Siscu (2002)


I Cantelli - Kinahava (2001)

I Cantelli nascenu in l'anni 90 in Corti. I studienti chì anu avutu a furtuna di cunnosceli tandu s'arricordanu di e serate curtinese infrebbate. U so primu album (chì si chjama sempliciamente Cantelli, in u 2001) hè un schjaffu cù u so pop rock festivu è magagnosu induv'elli si ridenu di a sucetà corsa.

U segondu dischettu Cunniscenza di u corpu umanu sorte in u 2005 ù u tube interplanetariu Houdini. Menu magagnosu chè u primu album ma sempre satìricu è ancu appena più neru, st'album marca a cunsecrazione di I Cantelli chì si separeranu in u 2007. Scrive Leandri chì I Cantelli sò : "le groupe le plus abouti de la jeune histoire du rock corse". Hè detta.

I Cantelli - Kinahava

I Cantelli - Sciù pa mù (2001)


I Cantelli - Mi sò fattu male (2001)


I Cantelli - Houdini (2005)


L'Altru Latu

L'Altru Latu hè natu in a regione aiaccina à a fine di l'anni 90. A furmazione suttanaccia ci hà rigalatu dui dischetti : Cattivu sognu in u 2001 è Com’un omu in u 2006, cù una ripresa rock di À tè pratendu, di Saveriu Valentini. Menu cunnisciuti chè I Cantelli o Les Varans, meriterebbinu purtantu d'esselu appena di più.

L'Altru Latu - In punta di a lingua

Tonton - Heliofubia (2006)

Dopu à a fine tràgica è a separazione di I Cantelli, Tonton lancia u so album in solò in u 2006 (intitulatu "Tonton"). U Bob Dylan di Luri hà dinù lanciatu u prugettu Back to Lovecraft in u 2011, mettendu in mùsica e puesie di u scrittore americanu H.P. Lovecraft, ricunnisciutu da a crìtica internaziunale.

Tonton - Heliofubia

N9VI - A Pampana (2006)

Natu in u 2006, Novi (o piuttostu N9VI) hè u gruppu fundatu da Jean-Charles Papi è Ceccè Lanfranchi. U so primu dischettu hè un grossu successu (cù i tubes A Pàmpana, Telosi è Socu).

In u 2007 esce l'album U Portaluci è cum'è tutti i grandi gruppi, si separeranu dopu. Ci anu lasciatu duie opere di prima trinca.

N9VI - A Pampana

Da sente dinù nant'à Deezer

N9VI - Telosi (2006)


Novi - Socu (2006)


N9VI - U Portaluci (2007)


Pierre Gambini

Ùn si presenta più à Pierre Gambini. Dopu à I Cantelli, si lancia ellu dinù in una carriera solu. Un omu ordinariu esce in u 2007. Altru mondu in u 2010 è Albe sistemàtiche in u 2011. In listessu tempu, face a mùsica di a quarta stagione di a seria Mafiosa chì cunnosce un bellu successu.

Hà scrittu Stéphane Leandri chì "u so stile si pò definisce cum'è acusticu-pop, ma hè in fatti assai persunale è imbuleghja sunurità muderne è anziane".

Myspace.com/pierregambini

Sekli

Ùn si presenta più à Dédé Sekli chì hà giratu cun Felì, I Surghjenti è Isula. In u 2004 lancia u so primu dischettu (Sekli), dopu ci serà Davanti (2006) piuttostu pop rock.

Jean-Charles Papi - Disoccupatu (2011)

Finita l'aventura di N9VI, Jean-Charles Papi esce u so dischettu D'umani in u 2011. Cù stu tìtulu, Papi tratta d'un sugettu d'attualità tantu alegru. Era ora chì e canzone corse parlinu d'altre cose chè di a bellezza di e muntagne è di u sole chì luccicheghja.

U so situ : jc-papi.com
Jean-Charles Papi - Disoccupatu

Vitalba - Mi ne vocu (2011)

Hè diventatu u tube di l'estate. Dopu à Stirling Bridge, Vitalba face una nova canzona chì tuttu u mondu hà messu nant'à u so teleffuninu. À quandu u prussimu ?

Vitalba - Mi ne vocu

Erin
Erin hè un gruppu di u rughjone aiaccinu chì esce un primu dischettu (Erin) in u 2007 è un segondu (Sempri più chè tè) in u 2009. Ch'elli ci scusinu s'è no ùn avemu trovu videò d'elli... ma i pudete scopre nant'à u so situ internet.

Scrive Stéphane Leandri ch'elli facenu "una musica tònica, sèmplice è efficace, cù riffs hard assai seventies, certe volte hard rock".
www.erin-corsica.com

Noi
Intornu à Freddy Olmeta (ex-Varans), u gruppu Noi sorte u dischettu Resilienza in u 2007. Menu cunnisciti chè l'altri, anch'elli meritanu d'esse appena di più messi in lume. Ùn avemu trovu videò d'elli, ma pudete scopre li nant'à u so situ Myspace.

Scrive Stéphane Leandri chì "l'influenze di Noi vanu da Led Zep è Hendrix, ma dinù Jeff Beck, Nirvana, Clash, Police, Lou Reed, Steevie Ray Vaughan, Jeff Buckley è Django Reinhardt".
Nant'à Myspace : www.myspace.com/noicorsica


Notte
Hà fattu un bellu successu cù a so canzona A mio bandera è hà ancu e so groupies à ogni cuncertu.

A Vindetta
Hè u primu gruppu di Métalohardopunk corsu. Iè, esiste. Andate à vede a so pagina Myspace.

I Sumeri Castrati
V'aviamu digià parlatu di I Sumeri Castrati, in u 2010 (50% rock, 50% magagna, 100% destroy) cù u munumentale clip N'aghju una techja.

Bande à part
Facenu qualchì ripresa di canzone corse, cum'è Ricordu è di Libertà (di E Cardelline).


Ci simu scurdati di qualcosa ? Avemu scrittu una pazzia ? Lasciateci puru un cummentu.

u 18 di Sittembre 2012



1.mandatu da Filippu Manovra u 18/09/2012 09:56
Ci so stati quantunque grossi musicos è veri rockers in Corsica...

Les Varans, I Cantelli, Zia Devota, Novi... era veramente putente !!!

JC Papi è Vitalba sò di più pop chè rock, ma ci hè una grossa qualità

è i Sumeri Castrati sò i più forti...

CUNTINUVATE TUTTI !!! COME ON GUYS !!!

2.mandatu da ziu santu u 18/09/2012 13:11 (da un teleffuninu)
Grazie

Aghju passatu a matinata ad ascultà Ste canzone. Sò fan di i cantelli, i varans, è vitalba hè un geuppu bunissimu. Hà a ragiò filippu manovra i sumeri castrati sò i tarcani

3.mandatu da Massimu u 18/09/2012 13:23
Un bell'articulu, m'hà fattu piacè d'ascultà canzone ch'ùn avia più statu à sente dapoi parechj'anni. Ch'ella campi a musica corsa, di tutti i stilli !

4.mandatu da Hardos corsu u 18/09/2012 14:02
Vitalba so da veru boni

JC Papi dinu

Novi era u toppu di u toppu...

Spergu ch'elli feranu qualcosa d'appena piu pop-rock tutti !

5.mandatu da GWM u 18/09/2012 17:01
"Ch'ella campi a musica corsa, di tutti i stilli ! "
Di tutti i stili... ùn ci vole micca esagerà quantunque...

6.mandatu da Capicursinu rancicu u 18/09/2012 19:02
À nostra musica scambia e diventa di più ricca ! Scambia d'e paghjelle e tuttu què, ancu puru s'elle mi piacenu e paghjelle..

7.mandatu da J A u 18/09/2012 19:21
I piu forti sò quelli di Tapages Nocturnes!!!

8.mandatu da J A u 18/09/2012 22:37
Mi scusu, Tapages Nocturnes ùn cantavanu micca in lingua Corsa...

9.mandatu da Heliofobu u 19/09/2012 11:00
Chi piacè sta compil ! L'utopia è l'energia di l'anni 90, (dinù incù i primi libri di Marcu è Jérôme, Tzek è Pido, I Storti...) U pecatu hè chi a rileva ùn hè mai ghjunta... E avà i rocker corsi anu a quarantina, a panza, pocu capelli, è sò diventati funziunarii o suvvenziunati... Invece, i zittelloni d'oghje sò stati blucati ind'u rumantisimu soprafattu è idealizatu di u (pseudo) riacquistu, è simu sempre à abbuchjassi pienghjulate cheguevaresque... Mi si pare ch'ind'è noi, u ghjovanu vole esse vechju, è u vechju vole esse ghjovanu... A socu, parlu cume un vechju connu, postu chi ne socu diventatu unu anc' eiu... ;-)

10.mandatu da a capra u 19/09/2012 12:19
o chi piaccè sta mane dascultà tutte ste canzone!
a sabete induve si ponu cumprà i cd di i varans, un laghju mai trovi, lasciate mi puru laddirizza.
a ringraziavi

11.mandatu da Pseudonimu u 19/09/2012 16:23
À quandu "I Cantelli Tribute"?

12.mandatu da Antone u 19/09/2012 16:25
A forza e l'originalità di I Cantelli al dilà di a so musica era a critica suciale di i so testi

Quì dinù, nimu ha pigliatu a rilleva

13.mandatu da u spettatore u 19/09/2012 18:26
I Cantelli so stati a piu grande innovazione musicale corsa dapoi à Canta u Populu Corsu.

14.mandatu da FanDiUSgaiuffu u 19/09/2012 18:45
Vitaaaaaaaaaaaaaaaalba!!!!!!!!!!!! I kiiiiiiiiiiiiiiiiiffu!!!!!
Nu u principiu di l'articulu (un bellu articulu, bravu!) dici "ci piaceria à sente di più pop rock, hard rock, metal, electrò o jazz fusion in corsu"... sè Diu vole in 2013 ci serà qualcosa nu u stile electro..

15.mandatu da Quelluchidice u 19/09/2012 20:02
So d'acunsentu cu u spettatore, I Cantelli anu viramente datu un fiatu novu è di qualità à u pop-rock corsu, ch'ellu sia ne i testi o ne a musica. Peccatu tamantu ch'elli un sianu piu !

16.mandatu da p.lazarini u 19/09/2012 20:51 (da un teleffuninu)
ce dinu un gruppu di ghjuvanotti!!si chjamanu L'ALTRI...ciole a sentelli !!!!

17.mandatu da comtipazzu u 19/09/2012 21:09
un bedd' articulu! un sminticate micca Paul Cesari (u dischettu Electric Cultura)

18.mandatu da Ghjù u 19/09/2012 22:28 (da un teleffuninu)
Ùn canta micca Paul Cesari no ?


19.mandatu da un paisanu u 20/09/2012 09:52
Sò ancu eiu d'acuncentu incù u spettatore, inda storia di u cantu corsu c'hè un epica nanzu a i Cantelli, è un epica doppu a i Cantelli... Hanu fattu (incù d'altri, sicuru) d'una certa manera, un Riacquistu II...

20.mandatu da iddu u 20/09/2012 13:02
è Jean-Marc Ceccaldi cu i so "riff" à l'usu AC/DC!!

21.mandatu da Ludo u 21/09/2012 13:01
Bellissime canzone di Vitalba è di JC Papi !!!

22.mandatu da Lisandrina u 21/09/2012 22:37
Ghjè vera chi ci sò parechji gruppi ch'anu pigliatu i trinichelli di u pop-rock, è tantu megliu chi c'hè veramente canzone di qualità è voce bellissime... Ma in più di a musica, ci vulebbe dinù a parlà di a "rock'n roll attitudine", è nant'a stu puntu i pop-rocker in mocassins è in camisjetta d'oghje facenu ride acant'a salvatichezza di I Varans è I Cantelli !

23.mandatu da unione di i rockers corsi u 22/09/2012 12:37
Quessa hè ghjusta. parechji facenu una bella musica, ma ùn sò micca tantu veri rockers.

ci sò dinù i rockers chì ùn facenu micca rock : fidighjate i Chjami Aghjalesi à a grande epica. sempre à tappu, si n'infuttianu di tuttu, si pigliavanu à cazzotti, facianu i cuncerti briaghi... què hè spiritu rock'n'roll !!!

Novu cumentu :


Seguitateci nant'à Facebook



Abbunatevi à a newsletter

Circà nant'à A Piazzetta