U fight club di i mazzeri

I nostri mazzeri dinù avianu i so fight club, chì si chjamanu "e màndrache".

A sapete, un mazzeru hè un omu chì hà u pudere d'induvinà, durante u so sognu, quelli chì avianu da more.

Per diventà mazzeru ci vole à esse mal battizatu. U prete, o u cumpare si sò sbagliati in e parole di u battezimu.

E màndrache sì passavanu in a notte di u 31 di lugliu à u 1 d'agostu, in generale à e bocche. S'affruntavanu tandu e squadre di mazzeri à colpi di bastoni di talavellu (chjamatu dinù luminellu, tirlu, talavucciu...).

Ùn ridite micca, u paese chì perde averà di più morti ch'è l'altru in l'annu à vene. Hè dunque assai più impurtante chè Intervilles o una partita puzzica di "Ligue 1".

Allora attenzione, s'è vo cruciate dui omi chì si techjanu di colpi di notte à colpi di bastoni, hè sia ch'elli sò dui briaconi in fine d'apperitivu, sia ch'elli sò dui mazzeri.

In i dui casi, ùn vale a pena di chjamà a pulizza.

Da leghje : una lista di màndrache in u libru di Roccu Multedo, Le Mazzerisme, un chamanisme corse.

Publicatu u 31/07/2012 messu à ghjornu u 31/7/2014