Accueil
Envoyer à un ami
Version imprimable
Partager

U ghjocu di l'estate : ch'hà da fà Paul Giacobbi

Paul Giacobbi ùn sà micca s'ellu deve cullà o falà, andà à diritta o à manca, travaglià per Sarko o per l'avvene di u so paese ?



U ghjocu di l'estate : ch'hà da fà Paul Giacobbi
Ch'hà da fà Paul Giacobbi ? puderia esse u prùssimu ghjocu di télé réalité à a moda corsa.

Sò parechje e pussibilità :

Scenariu 1 : a frittella. Giacobbi face u so venachese è accetta a pruposta di Sarkozy d'entre in un ministeriu è piglià a CTC cù a diritta. Micca siguru ch'ellu piaccua à tutti l'elettori di manca ma face un pezzu chì vutà un colpu à diritta, un colpu à manca ùn dirangia à tanta ghjente in Corsica.

Scenariu 2 : u lonzu. Paul manda Sarko à spassu è si stà cù i so vechji fratelli di lotta di u PRG, l'Alfonsi, Milù, Alessandrini è cumpagnia. Cume di sòlitu, hè l'UMP chì vince l'elezzioni territuriali è a manca si stà tranquilla à dorme in l'uppusizione., ciò chì arrangia à tutti.

Scenariu 3 : a terza via ? Popol, stumacatu da l'incumpetenza di Santini è Rocca Serra piglia e cose in manu è cerca a terza via cun "l'omi di prugressu" fendu un'unione a più larga pussibule à u terzu giru, perchè micca cù i naziunalisti muderati. Piglianu a regione è si mettenu infine à travaglià per stu paese chì n'hà tantu bisognu.

Scenariu 4 : la reconversion. Stumacatu da e pruposte di Sarkozy (micca abbastanza interessanti per ellu), da a pulitichella di l'UMP è di u PRG, Giacobbi abanduneghja a pulitica, u cunsigliu generale è a Corsica per lanciassi in una carriera nova : "doublure" di Casimir, u bravu mostru aranciu.

Chì serà u scenariu ? A risposta a settimana chì vene cù u rimanimentu ministeriale di Sarko. Una cosa hè certa, hè Paul Giacobbi chì tene e chjave di l'avvene di a Corsica. Sarkozy l'hà capita dapoi un pezzu fenduli a so pruposta.

Allora, chì serà u più impurtante per ellu ? A so carriera o travaglià per u so paese ?

u 20 di Ghjugnu 2009
U Sgaiuffu



1.mandatu da a scimia scimisce u 20/06/2009 16:28
ha da manghjà! què si sà!

2.mandatu da Antò u 20/06/2009 17:21
Mi riccordu dopu à so elezione, Sarkosy ha dettu che vulia fà di Paul Giacobbi "le Monsieur Corse de son quinquennat".

3.mandatu da aerostat u 20/06/2009 18:52
Hè bluccatu paulucciu :
Scenario 4 : Averia pussutu qualch'anni fà, mà avà hà persu 30 chilò, hè troppu magru l'animale!
Scenario 3 : Hà pruvatu 5 anni fà ; ùn l'hà tantu riesciuta! ancu un pocu perdia u cunsigliu generale
Scenario 2 : Quessa a pò fà, ma tandu hà dà ingrassà!
Scenario 1 : Tandu i naziunalisti puderanu vutà à Sarko in 2012 senza à avè vergogna tuttu u mondu saria cuntentu... for di a corsica!

4.mandatu da estrimei u 20/06/2009 20:28
a prima pruposta mi pare a piu sicura ; a fritella he l'arte di u mrg :he cusi chi Alfonsi he ghjuntu a esse senatore e ancu deputatu! i Zuccarelli , babbu , figliolu e dumane figliulinu parlanu di votu a manca e si facenu eleghje 'ncu voti cummunisti e ...di diritta

5.mandatu da altore u 20/06/2009 22:22
o sgaiù u t'articulu hè propiu pensatu bè. ma sapete ciò ch'ellu dicia un grende radicale (u più grende) clemenceau? "u radicale hè cum'è a ravanetta : rossu fora, biancu nentru è sempre vicinu à u piattu cù u butiru..." (a dicia in frencese clemenceau ch'ùn ammaestrava tantu bè u corsu). ùn hè tantu scambiatu dipoi tandu... nò?

6.mandatu da Ghjuvan'Marcu u 21/06/2009 05:39
O altò, l'ai detta ! Giaccobi hè una bella ravanetta! L'avemu vistu per l'elezzione auropeane: era sottu terra ma si pudìa vede a so fronda verde , tandu u so clanu a fattu vutà à Alfonsi per ingrandà i ranghi di u PNC chi t'ha dà francà i 7% a u primu giru di e territoriale per diventà u so acòlitu à u terzu giru. U scenariu 3 hè u più realistu. I manghjoni cu i manghjoni !

7.mandatu da muderatissimu u 21/06/2009 09:37
Bravu ! n'ai torna cusì o amicu ? Stoghjati chì bavacciuleghji ... Ai a pena in corpu ? Ai vutatu à Grossetête o a manca strema ? Ai persu ? Tù voti à Gandolfi Scheit è ti fideghji in u spechju tutte e mane ? Sicura chì hè megliu un UMP in Parigi chè un naziunalistu à Brusselle, chè ? Giacobbi ? Ch'ellu fii ciò ch'ella li pare, frittella, ravanetta o patecca ....

8.mandatu da circinelludiguanenativupeliguagnesusosanguaversatu u 21/06/2009 10:08
"...un naziunalistu à Brussele..."
ALFONSI ÙN HÈ MICCA NAZIUNALISTU ! Voila !
incù tuttu u me rispettu par l'omu, a dicu torna: ùn hè micca naziunalistu. Ponu aghjunghje "muderatu" s'eddi volini, ma u fattu hè quissu...!
u coca light hè cocà
u canada dry ùn hè micca biera
u PNC ùn hè micca pà a Nazione
u vinu rusulatu hè vinu
u pacificò ùn hè micca pastizzu
è a dicu dinò torna: ùn hè micca un'insulta ! ma parchì circà à burlà l'elettori ? parchì inganassi à se stessu ? So "regiunalisti", forse (ùn la pensu) autonomisti, ma Naziunalisti, innò ! Nè muderati,duri. Corsica Libera eddi sì chì so naziunalisti muderati ! So pà un'indipindenza "etapiste", passendu par l'alizzioni. S'assumiglia cusì Corsica Libera à u PNV vascu più ch'è u PNC.
Bon... o sinnò prupongu chì "ravanetta" sia u cugnomu ufficiali di PG (cum'è pà a zucca...)

9.mandatu da estrimei u 21/06/2009 10:48
o circinelludiguanenativupeliguagnesusosanguaversatu ,
aghju lettu tuttu u to scrittu, c'he un puntu chi mi tocca a ripiglià:Bon... o sinnò prupongu chì "ravanetta" sia u cugnomu ufficiali di PG (cum'è pà a zucca...)
pè' a zucca , o N. Alfonsi pò andà , ma pè' Giacobbi c'he u cugnome familiale ch'elli adupravanu i contra pertiti, u chjammavanu : u patataghju

10.mandatu da sumenta u 21/06/2009 12:02
scenariu 4... almenu cusì un omu puliticu mi avera fattu ride...

11.mandatu da Ghjuvan'Marcu u 21/06/2009 13:37
o muderattissimu, eiu spiegu a strategia di a terza via e mi pare chi Giaccobbi e Angelini s'assumiglianu abbastanza è t'anu, tutti dui, pretenzione nu quadru di a republica francese. Per u restu, so cuntentu chi F.Alfonsi sia diputatu; so indipendistu è di manca dunque aghju vutatu a Mosconi; è in fine, ùn aghju mai vutatu per un cunacciu di diritta, mi possu fighjà tutt'e mane in u mo spechju... è trovu chi so un bellu zitellu.

12.mandatu da Paulu Giacobbi (u nostru) u 21/06/2009 14:39
Evviva Paulu,appruntèmu a malba,ò ghjentè!!!!!

13.mandatu da u pastizzu u 21/06/2009 14:41
boh... ma chi so sti cummenti arrabiati ? dopu vi stunate chi a Corsica un avanza dipoi 30 è si capisce perchè : ùn ci pudemu vede trà di noi !

ghjelusia è sumerisimu !

quandu CN circava à fà allianza cun Giacobbi, José Rossi, Ceccaldi o Guazzelli, ùn si dicia nunda.

avà, vistu ch'ella hè a strategia (almenu hè chjara !) di u PNC, so trattati di tutti i nomi...

andate à circà à capì...

14.mandatu da circinelludiguanenativupeliguagnesusosanguaversatu u 21/06/2009 15:24
o pastizzò, trè fatti:
-blog puliticamente scurrettu
-blog scherzosu
-blog appena gattivu
...
ùn sia micca troppu seriu, non plus !

15.mandatu da muderattissimu u 21/06/2009 15:30
allora cusì avemu un usservatore puliticu fine : "mi pare chi Giaccobbi e Angelini s'assumiglianu abbastanza è t'anu, tutti dui, pretenzione nu quadru di a republica francese.". E dopu, ancu più forte : "U scenariu 3 hè u più realistu. I manghjoni cu i manghjoni ! " . Eiu, à a to piazza, circherebbe di fammi "imbuscià" à TF1 o France 2 per fà cumenti pulutichi di qualità. . Poi fà assai megliu chè "serge le jardinier" nant'à RCFM per parlà di patataghji, di ravanette, di patecca è ancu di frittelle.

16.mandatu da kevin u 21/06/2009 15:35
Hà da andà à fassi un giru in u spaziu cu a "succuppa" di u cunsigliu generale.

17.mandatu da estrimei u 21/06/2009 16:17
o pastizzu ,
avà, vistu ch'ella hè a strategia (almenu hè chjara !) di u PNC, so trattati di tutti i nomi...
curegimi so mi sbagliu : u pnc vole fà allianza 'ncu tutti for che 'ncu quelli chi un dinunzianu a "viulenza" ?
quandu CN circava à fà allianza cun Giacobbi, José Rossi, Ceccaldi o Guazzelli, ùn si dicia nunda.
era una dimarchja d'apertura e , tandu , a pusizione di Giacobbi un era quella d'oghje (tandu anch'ellu era pè un "allianza" ma dipoi sé'he fattu frustà dà Zuccarelli e s'he rimessu 'nu u suminatu )
per esse chjari , specificheghju chi un sò , ne un sò statu a CN.
un so micca d'accunsentu per esse scherzosu, gattivu , scurettu ma mi pare chi sta strada ch'ella ci apre a tilatigga a duvimmu aduprà , micca per vince l'ellezzione , ma per fà capì a u Populu Corsu ch'ell'ha duveri e i piglia in contu o da qui a pocu un putera mancu piu anscià!

18.mandatu da saveriu u 21/06/2009 16:57
O estrimei,pudèmu girà in tòndu cume pécure capaghjinòse,per sapè s'ellu ghje bè d'andà incu giacobi ò micca,ma u scoppu di a puliticaccia è di VINCE e basta(o ghjente fattemi u piàce d' un rispondemi a nantu a purèzza di a lotta ecc..)

19.mandatu da circinelludiguanenativupeliguagnesusosanguaversatu u 21/06/2009 17:09
è a purezza di a lotta, allora ?!

ancu à me mi faria piacè di "vince"... ma vince... cosa ?: muneta ? a cuppa di mondu? di l'universu?
senza parlà di "purezza", ùn si po criticà un omu puliticu ? un prugrama ? una dimarchja ?
Chi hè ssu novu mondu induva saremi ubligati d'essa d'accordu ? di amà à ugnunu ?
tu o Savè ci voli dì chì ch'ellu sia bè "d'andà cù giaccobbi o micca" ci voli à fàlla listessu ? Ghjè què ...?
pocu imprema i prugrami, l'omi, u sensu, u scoppu: l'impurtenti, l'impurtentissimu hè di vince !!! pà dorma à l'assemblea dopu.

20.mandatu da estrimei u 21/06/2009 17:54
o savé' ,
mi dispiace di un esse uriginale ma facciu mea a risposta di circinelludiguanenativupeliguagnesusosanguaversatu.
vince per chi fà ? per fà prufittà nepochi e un tene micca contu di l'astri? per mè l'eletti di l'Assemblea di Corsica, u so scopu un deve micca esse quellu di "sviluppà a Corsica " , u so duvere deve esse quellu di fà chi ogni figliolu di a CORSICA àpiè u laziu e possi campà in casa soia e chi nimu un possi pratende a pigliali a piazza quall'ella sia a raggiò.
i nostri eletti , di u cantu o di l'astru sò, so che no' l'emmu fatti. he piu che ora di "prugrammalli" per ch'elli cambiinu - un ci he piu che qualchi mesi - o signò , a prussima assemblea ci ha da mandà a caternu , e ci'ole ch'o siamu cuscenti , chi tandu , i culpevulli un serranu micca elli seremmu noi!

21.mandatu da saveriu u 21/06/2009 20:48
Vince perchè?Per manghjà di capu indé a trova;bella sicurà, (ghje per ride) Pigliendu a strada di"so tutti listessi" un avanzemu più,allora chi fà?postu chi simu incapace di piglià sòli u putere.(vince per u putere,u putere per facci avanzà)

22.mandatu da altore u 21/06/2009 21:55
sò d'accordu cù saveriu. à un mumentu datu ci vole à piglià u putere pè pudè fà avanzà a Corsica. sè i naziunalistiùn lu ponu micca piglià soli, ci vole à truvà i mezi di pigliallu cù una pertita di a manca nant'à un prugramma definitu capunenzu. pè indettu, tutte e cumpetenze suciale à a manca, tutte e cumpetenze ambientale è culturale (cuù l'educazione) à i naziunalisti. u modu di scutinu hà scambiatu è ci obligheghja à riflette cusì... osinò ghjè torna à vignale cù rocca serra è santini (è u so padduc). simu à un crucivia impurtantissimu pè l'avvene di u nostru paese... mi scuserete d'ùn esse nè scherzosu nè scurettu ma sò babbu di famiglia è vogliu un antr'avvene pè i mo figlioli è st'avvene passa pè a vittoria à e territuriale contr'à a diritta...

23.mandatu da circinelludiguanenativupeliguagnesusosanguaversatu. u 21/06/2009 23:22
D'accordu...
Sè di manca è micca naziunalistu, è basta. Voli a vittoria di u to campu; d'accordu...
Ghjè bè, ti filiciteghju pà l'intaressu ch'è tu porti à a Corsica è à a vita pulitica... è sopr'à tuttu ti ringraziu mori di lasciàcci " e cumpetenze ambientale è culturale " ! francamenti, grazie, tante grazie.

24.mandatu da estrimei u 22/06/2009 08:49
o alto',
sò babbu di famiglia è vogliu un antr'avvene pè i mo figlioli è st'avvene passa pè a vittoria à e territuriale contr'à a diritta...
chi he st'avvene che tu voli pe' i to figlioli?
ch'intendi quand'e tu dici "diritta":
l'ump , l'umpprgmodem , l'umpprgmodem+i naziunalisti di diritta+Guazzelli+Ceccaldi ??
un 'he micca una pruvucazione, he una dumanda per acchjarini u discorsu

25.mandatu da balaninucalvi u 22/06/2009 10:22
Eiu ùn ci capiscu ^più nunda à dilla franca...quand'è vecu chì per l'affare di u PADDUC i radicali PRG sò cuntenti di vede u ducumentu cacciatu da u dibattitu di l'assemblea, chì a diritta UMP è a manca radicale (PRG....enfin ùn sò più tantu di manca isse ghjente mi diciarete perchè chì campanuè cum'è sgiò!) sò d'accunsenti pà a mudifica di u modu di scutinu à l'assemblea (da 5 à 7.5%!) mi di cu chì più ch'è mai u muvimentu naziunale deve mettesi inseme pà luttà contr'à issi clanisti perchè chì cridite??? S'è un ghjornu ghjunghje una magiurità naziunalista à u putere à l'assemblea (pà u mumentu partimu malissimu!!!) vidarete chì diritta è manca si mittaranu inseme pà cuntrà i naziunalisti è tandu a pulitica custì ùn esiste più ghjè solu PULITICHELLA!!! Giacobbi ministrru di Sarko è dopu???? un ghjornu forse vidaremu à Santini incù Besancenot, chì u sà??? (spergu chì nò, corci à noi!!!) Infine invece di metteci d'accordi tutti quant'è no simu femu u ghjocu di i clanisti ed eiu pensu chì u ghjornu di l'elezzione, andaraghju à a PESCA chì di st'eletti ùn ne voghju!!!!

26.mandatu da altore u 22/06/2009 17:43
prima sò di manca di sigura cum'è tutti (spergu) i naziunalisti. i naziunalisti di diritta à a le pen ùn m'interessanu tantu. a libertà è a supranità di i populi hè un valore di manca o allora ùn capiscu più nunda. mi si pare dunque nurmale di circà à cuntrà a diritta. pè schjarì u mo discorsu pè l'amicu estrimei a diritta per mè ghjè ump+modem+prg+naziunalisti di diritta+guazzelli+ceccaldi. ancu chì pè guazzelli ci mettu un puntu dinterrogazione. ùn la sà manc'ellu ind'ellu hè... ma sò un affare: sè no ùn chjappemu l'assemblea sta volta a Corsica serà lampata à caternu. allora invece di circà ciò chì ci spicca mettemuci d'accordu nant'à ciò chì c'addunisce... vistu i cummenti "c'est pas gagné!" cum'ellu dice u pinzutu. infine pè l'amicu prete ti si pare nunda a cultura è l'ambiente? pè mè sò 2 cose essenziale di a Corsica di dumane... pè tè serà u sollu po esse..? disgraziata Corsica...

27.mandatu da estrimei u 22/06/2009 18:09
per contu meiu , i naziunalisti so di piu a diritta che a manca (un dicu micca vicinu a i partiti francesi, parlu di riflessione ). mi spieggu, si cercanu i mezi per sviluppà l'agricultura o l'imprese , lancianu l'edee cume Femu Qui (chi pudia esse statu un ernese di prima trinca per a pulitica naziunalista) , chi un ghjovanu che a i patroni o i capi d'impresa. ci vuleria, forse chi 'nu i prussimi prugramma di i canditati naziunalisti una piazza sia fatta a i corsi chi un hanu ne casa , ne tetti (innò , micca tutti i corsi si ponu accasà), ch'elle ci sianu pruposte per impieggà e prutegge l'impieggati corsi - chi so corsi quant'e l'astri e chi hanu u dirittu a a sulidarità naziunale (corsa, he megliu di dillà)- chi ancu 'elli hanu u dirittu d'esse in collu a mamma !
un'assemblea chi circheria u sviluppu senza piglià in contu i figlioli di a Corsica un ghjuveria a nunda .

28.mandatu da circinelludiguanenativupeliguagnesusosanguaversatu u 22/06/2009 19:18
"pè tè serà u sollu po esse..? "
Par me, nò... ma i to amichi "di manca" (Vandasi, zuccarelli, giacobbi, renucci...) i pensi da veru pocu intarassati da u soldu ????
avà s'è par ""sollu" parli di ecunumia, allora sì chì m'intaressa: 250 anni di duminazioni francese ci anu resi povari è impruduttivi ! U scoppu di i naziunalisti, di dritta o di manca (?), hè quissu ! È ùn credu micca a ghjenti citata quì sopra, intarassati da 'ssu dibattitu.

29.mandatu da Spilonca u 22/06/2009 22:15
ùn capiscu manc'à pena a "tiuria" di circinellu: Alfonsi ùn hè micca naziunalistu . Dimmi, in 92, nant'à a lista Corsica nazione, ci era nò? Un ghjornu t'arrangia ch'ellu sia naziunalistu è quill'altru nò ? Secondu l'allianze, secondu a meteò, secondu u to estru ... S'ella esiste a nazione corsa, l'eletti corsi sò eletti di a nazione. Per u restu, guarda chì cù e to strategie, mi spiecherai cum'è tù poi piglià u putere. Aspetti di fà 51% di i voti à l'elezzione ? Aspetti u cundidatu "plus blanc que blanc", vale à dì "transparent"? Dimmi, dormi bè a notte?

30.mandatu da fratellu ficatellu u 23/06/2009 00:22
Cume sempre, è cume tutti l'altri...
Sapete cio ch'hà da fà Paul Giacobbi ?
Ci l'hà da ficcà ben prufundu in qualchi locu !
E andà a vutà, s'assumigla a cumprà u budiru...


31.mandatu da Cumpalliols u 23/06/2009 08:36
A questione, ùn hè micca "ch'hà da fà Paul Giaccobi ?", ma "cosa ne pudemu fà di Paul Giaccobi ?"
D'altronde, da qui à dui o trè ghjorni, averemu infine a risposta.
È videremu...

32.mandatu da circinelludiguanenativupeliguagnesusosanguaversatu u 23/06/2009 14:30
o spilonca, ùn hè man'appena una tiuria: hè un fattu !
è a dicu torna: ùn hè micca un'insulta di ùn essa micca naziunalistu. Alfonsi po s'eddu vo ridiventà naziunalistu dumani. Ma u fattu hè simplici: hè naziunalistu quiddu chi si ricunoscia in l'idea chì a Corsica hè un paesi à custruì, chi un ghjornu sarà indipindenti è chì st'indipindenza si custruiscia !

in 92 ? in 92 Kouchner era di manca, è Bayrou di dritta !

33.mandatu da spilonca u 23/06/2009 18:38
Senza vulè entre in un cuncistoriu tamantu, mi pare ch'ellu ci vole à spiccà nazione è indipendenza. L'idea di nazione esiste in Auropa, puru s'è u statutu di sta nazione ùn hè l'indipendenza. A nazione hè un territoriu identificatu, un populu identificatu, una storia è una lingua. una cultura, ecc. A nazione da custruisce hè tandu di tutti quelli chì pratendenu à u sviluppu di i so valori è à un'avvene per i so figlioli. Ch'ella sia l'autunumia, l'indipendenza o puru a "dipartimentalisazione", hè u cuntenutu di u statutu chì face o chì sface l'affare. Certe regione d'Auropa sò oghje ghjornu più "libare" chè certi paesi francofoni d'Africa "indipendenti". O Circinè, simu, mi pare, d'accunsentu à nantu à "u più". E' a terminulugia ùn hè più tandu ch'è fantasia. Perfine, vogliu vene à dì chì a nazione hè di tutti chì a ricunnoscenu.

34.mandatu da circinelludiguanenativupeliguagnesusosanguaversatu u 23/06/2009 20:25
ùn vuliu micca dì più di què.
Ma mi pari chì sottu à a parula d'indipindenza si pò effettivamenti metta parechji affari. Tandu parchì parlà d'autunumia ch'ùn vole dì nunda ò di regiunalizazioni chì ne dice ancu menu ?
Ci voli à custruiscia u nostru paese cum'è s'eddu avia da essa indipindenti un ghjornu, è micca privassi d'un'ambizioni sinònima di eccellenza.
a vita hè una battaglia, a custruzzioni hè un travagliu d'ogni ghjornu, u statu, i stati, ùn càlanu mai u capu, ùn pesanu mai u pedi. `ùn ci hè ca noi pà fassi alusingà cusì faciuli da 2 ò 3 paruli...
Guarda in tutti i paesi duva a lotta hè stanciata: u statu hà ripigliatu a suprana, chi hè cusì ch'eddu viaghja u mondu da chì l'omu hè omu !

35.mandatu da EL u 23/06/2009 21:06
mon commentaire n'a pas été publié, je vois qu'on aime être caressé dans le sens du poil,
mais pas l'inverse.

36.mandatu da u modo u 23/06/2009 21:31
o EL, nisun cummentu hè statu sfassatu... cerca bè in a discussione nant'à a festa di a musica, u to cummentu ci hè

37.mandatu da Jack Obiwan u 23/06/2009 21:47
pas de Giacobbi au gouvernement !

purtantu, discudava cun Claude Guéant l'altru ghjornu. Ma chi si serà passatu???

38.mandatu da saveriu u 23/06/2009 21:56
O circinellu,u fattu chi a corsica sia un paese a custruisce ,"và incù i so scarpi",ma,custruisce chè?per qualle?Anch'eiu, indè u core è l'idee so per l'indipendenza,ma per avà simu indè a nassa(divintèmu ògni ghjòrnu chi passa ,più minoritarii a nantù 'ssa terra) e se lu ci vole à almanachà qualcòsa incù u diavule per avanza d'un palmu, ebbè ci vole à fala. (in più di quèssa giacobbi un'hè ministru di sarko).D'altronde guarda in irlanda incù u Sinn fein ,(naziunalisti arrabbiati ch'hanu pigliatu u putere,spartendellu incù i so nemici)

39.mandatu da circinelludiguanenativupeliguagnesusosanguaversatu u 23/06/2009 22:10
Ma chi dici ???
u Sinn fein, ghjust'à puntu, ùn hà micca fattu allianza cù i nemichi !
So andati soli à l'alizzioni è so stati eletti nantu à u so prugrama, contr'à i "legalisti". ùn anu micca calatu u capu, t'anu sempri a listessa rivindicazione: unificà TUTTU u paesi... Ti ramentu chi i 2/3 di l'Irlanda so Indipindenti !!!

40.mandatu da heliofobu u 23/06/2009 23:27
Aiò o ghjenti ! rallegremucci, u patriottu Popaul hà lampatu un segnu forte a u statu culuniale, ricusentu una piazza di ministru a l'opressore ! Eccu un fieru fratellu di lotta, ereddu degnu di lu grande Paoli, oghje pront'a purtà la nostra bandera anant'a l'altare sacru di a libertà. Tutti daret'a Paulo !

41.mandatu da saveriu u 24/06/2009 15:24
O amicu prete,l'accordu,dettu di belfast di u 10 aprile 1998( chjamatu accordu di u veneri santu) ti dice qualcòsa?

42.mandatu da scarafagnulu u 24/06/2009 15:26
vulia ringrazià tutti quelli chi so daretu à sti belli cumenti, ùn aghju più u murale, so in perdizione ma mi fate sempre ride, cù u vostru sensu sputicu di a macagna è e vostre riflessione piene di bon sensu; forza amichi di a piazzetta site i più forti!!!

43.mandatu da circinelludiguanenativupeliguagnesusosanguaversatu u 24/06/2009 16:54
l'accordi di u vinnari Santu hè un testu, firmatu da tutti, chi, par u più, autoriza torna l'alizzioni di l'assemblea d'Irlanda di u Nordu, è i gruppi viulenti s'impegnani à cissà i "cumbatti"... Ma u Sinn Fein à st'alizzioni hà mantenutu a so andatura, i so idei è u so scoppu, senza fà allianza nè cù i "muderati" catòlichi, nè cù i "loyalistes" ! Ghjè par quissa ch'ùn vegu micca, incù tuttu u rispettu, u rapportu cù ciò ch'è tu dici tu ! Senza vulè paragunà i dui situazzioni bien évidemment.

44.mandatu da SERRA u 27/06/2009 14:32
o circinè a to referenza à u sinn fein e à l'accordi di u venneri santu so senz'oggettu se tu voli fà un paragone cu a situazione corsa . ci pudimu montà a sega ma u nostru nivellu di lotta cume e nostre suffrenze (ch'un vogliu sminuì) un hanu nunda à chi vede cun quelle subite in irlanda duve i catolichi cunniscianu un veri apartheid istituziunale , in piu (e sopra tuttu ) l'irlanda he digià un paese indipendente e s'asgisce custi di rattaccàli un pruvincia manchante . in ulster so guasi centu per centu di i catolichi chi so in favore di una separazione cu a gran brittagna (serà u casu qui ??) , muderati o no , a disferenza essendu sopra tuttu nant'a a tactica e a lea à a lotta armata . faci piu sopra dino referenza à u pnv bascu chi tu ghjudicheghji piuttostu vicinu à corsica libera , he a t'idea ma sappia chi u pnv he un vecchju partitu xenoffobbu chi ripresenta una burghesia catolica tradiziunalista agradicata à diritta e chi cuntroleghja l'economia e l'impiechi à u paese bascu , per u piu si cuntentanu di cuntrolà l'istituzioni in piazza (ma certi volenu andà piu luntanu versu a suvranità ) ;.in quant'à a situazione corsa vecu chi ti permetti di distribuisce i diplomi di bon naziunalisti à certi nu u mentre chi d'altri so qualificati di regiunalisti (manc'autonomisti !!!!) . parli dino di purezza , voli sicuramente parlà di quelli chi piuttostu che di chjamà à votà à u secondu giru per u pertitu naziunalistu restante priferiscenu di di fàlla quand'ellu he un ump chi ci vole à fà eleghje deputatu , e quelli chi finalamente cu i so atti facenu tuttu per mantene u statu quo cumu i qualificheghji ?. per me he naziunalistu quellu chi si batte per fà avanzà e cosi e ancu tenendu contu ch'un simu micca maggioritarii e chi forse nu u seremu mai . he naziunalistu quellu ch'un si chjode nu un fondu di cummerciu falzamente estremistu ( à parte u discorsu duve ne simu ...?) per fà in sottu peghju che i clanisti . tandu ghjocà a purezza nu u discorsu ma stà dopu nu u so scornu à l'assemblea cu i so dece o quindeci per centu (chi cuntentezza !!!) ghje solu fàssi l'alleati oggettivi di u sistemu . i naziunalisti per me so quelli chi piglianu stu populu cum'ellu he per chi si spera dumane sia in statu di sceglie un destinu piu liberu micca quelli chi li contanu e parafattule .
ps : eo di a frittella di popol mi ne impippu ma ricordami , qual'he qualch'annu fà ch'andava à cunfabulà cun ellu à l'isule alland ?

45.mandatu da circinelludiguanenativupeliguagnesusosanguaversatu u 28/06/2009 21:50
quant'è tu ne sai o Serra...!
mi poi sorta tutti i stalvatoghji di "a lotta", tutti i puttachji ch'è tu voli, eu pensu cusì è basta ! Un naziunalistu hè par a nazioni ! In l'Auropa o nò, "statu assuciatu" o micca, tappa à tappa, forse, ma un naziunalistu ùn hè calchissia chi cerca à mudernisà a repubblicca francese, ancu s'è t'aghju u più prufondu rispettu pà quiddi chi, sinceramenti, volini avanzà cusì ! ma ùn hè micca a me strada, ùn hè micca u me scoppu ! Pigli tu cum'è un'inghjulia d'ùn essa più chjamatu "naziunalistu", ma t'assicurgu chi par me ùn hè micca un' inghjulia; pensu solu ch'ùn si devi micca burlà l'elettori, è dìssi naziunali quand'è tu sè autonomistu ! tandu si, chi capiraghju megliu !
T'invitu à leghja torna ssu (longu) filu: ùn sogu po eiu ad avè paragunatu i situazioni. Ghjè saveriu chi parlava di u Sinn Fein, aghju solu rispostu.
In quant'à u PNV, ùn parlavu micca di i so idei suciali, ma di u so "pusizziunamentu" par rapportu à l'indipindenza...

46.mandatu da saveriu u 29/06/2009 17:46
U fattu di paragunà,corsica e irlanda di u nordu,ghjéra per palisà ,chi in pulitica tuttu é pussibule ancu truvassi ind'e u listessu guvernu,trà nemici,per u bè di u so paese.(u scopu di'ssa cuntrastata un'era di paragunà e dùie lotte,un li ghjunghjimu manc'a e calcagne.

47.mandatu da circinelludiguanenativupeliguagnesusosanguaversatu u 29/06/2009 22:19
"un li ghjunghjimu manc'a e calcagne."
Semi ciò ch'è no semi o fratè...!

Novu cumentu :